Fis-​Sigurtà Issa—Fis-​Sigurtà għal Dejjem

GĦALA hija s-​sigurtà taʼ spiss diffiċli biex tinstab, u jekk tinstab, għala tkun biss għal ftit żmien? Jistaʼ jkun li s-​sens tagħna taʼ sigurtà huwa bbażat fuq l-​immaġinazzjoni—fuq dak li nittamaw li niksbu pjuttost milli fuq dak li jistaʼ jinkiseb? Delużjoni bħal din tistaʼ tissejjaħ ħajja f’dinja tal-​ħolm.

L-immaġinazzjoni ġġiegħel lill-​moħħ iħalli warajh ir-​realtà tal-​ħajja bin-​nuqqas taʼ sigurtà tagħha u jidħol f’kundizzjoni sabiħa u taʼ sigurtà, waqt li jinjora kull ħaġa li tistaʼ tħassar il-​ħolma. Iżda, taʼ spiss il-​problemi tad-​dinja reali jtellfulna f’daqqa waħda din id-​dinja tal-​ħolm u mingħajr ebda ħniena, lil dak li jkun qed jgħix fil-​ħolm iġibuh f’sensih u b’hekk ma jibqax iħossu tajjeb.

Ejja nikkunsidraw aspett wieħed fejn in-​nies ifittxu s-​sigurtà—il-​post fejn jgħixu. Per eżempju, il-​ħajja f’belt kbira għandha mnejn tidher li hi s-​soluzzjoni taʼ kollox, u ġġagħlek timmaġina kemm pjaċiri se tgawdi, il-​paga kbira li se ddaħħal, u d-​dar lussuża li se jkollok. Iva, dan jistaʼ jidher li qed joffri s-​sigurtà li wieħed tant kien ilu jistenna. Imma huwa dan realistiku?

Il-​Post—Fil-​Belt jew fil-​Ħolm?

Fil-​pajjiżi li qed jiżviluppaw, qed isir ċertu reklamar biex iħajjar lil dak li jkun biex imur joqgħod fil-​belt u dan jistaʼ jkun taʼ tentazzjoni għal dawk li jħallu l-​immaġinazzjoni tiġri bihom. L-​organizzazzjonijiet li jiffinanzjaw dan ir-​reklamar mhux bilfors li jkunu interessati fis-​sigurtà tiegħek imma, pjuttost, fil-​bejgħ tagħhom. Huma jgħattu l-​problemi li hemm fid-​dinja reali b’xeni taʼ suċċess li juru s-​sigurtà. B’hekk, is-​sigurtà tiġi assoċjata mal-​prodott li jkunu qed jagħmlu reklam tiegħu u mal-​belt.

Ikkunsidra l-​eżempju li ġej. Xi uffiċjali minn belt fl-​Afrika tal-​Punent poġġew xi kartelluni li kienu juru b’mod ċar li t-​tipjip fir-​realtà hu l-​istess bħal li wieħed jeqred il-​flus li jkun ħadem tant iebes għalihom. Dan kien parti minn kampanja li kienet twissi liċ-​ċittadini tagħha kontra t-​tipjip. Il-​manifatturi u l-​bejjiegħa tas-​sigaretti opponew billi waħħlu kartelluni magħmulin b’sengħa kbira li kienu juru xeni li jolqtu l-​għajn li fihom kienu jidhru nies ferħanin u taʼ suċċess bis-​sigarett f’idhom. Iżjed minn hekk, kumpanija waħda tas-​sigaretti ġagħlet lil xi wħud mill-​ħaddiema tagħha jilbsu uniformijiet elaborati u brieret sbieħ tal-​baseball biex iqassmu s-​sigaretti liż-​żgħażagħ fit-​toroq, waqt li jinkuraġġuhom biex jipprovawhom. Ħafna minn dawn iż-​żgħażagħ kienu ġew mill-​irħula u, billi ma kienu jafu xejn dwar il-​metodi taʼ reklamar makakk, ġew imqarrqin minn din l-​istedina. Spiċċaw bil-​vizzju tat-​tipjip. Iż-​żgħażagħ mill-​irħula kienu ġew fil-​belt biex ifittxu s-​sigurtà sabiex jgħinu lill-​familji tagħhom jew biex ikollhom suċċess finanzjarju. Minflok, kienu qed jarmu l-​biċċa l-​kbira tal-​flus tagħhom li setgħu użaw għal skopijiet aħjar.

Ir-reklamar li jiddeskrivi ħajja taʼ suċċess fil-​belt mhux dejjem jiġi min-​negozjanti. Jistaʼ jiġi mit-​tpaċpiċ tan-​nies li jkunu marru joqogħdu fil-​belt u li jħossuhom imbarazzati li jerġgħu jmorru lura lejn ir-​raħal tagħhom. Minħabba li ma jkunux iridu jidhru li fallew, huma jibdew jiftaħru u jivvintaw kemm irnexxielhom jagħmlu flus u x’suċċessi kellhom mindu marru joqogħdu fil-​belt. Madankollu, meta wieħed jifli iktar mill-​qrib dak li qalu dwar il-​pożizzjoni tagħhom isib li l-​mod kif qed jgħixu ħajjithom fil-​preżent m’huwiex aħjar minn dak li kellhom qabel fir-​raħal tagħhom. Huma qed jissieltu finanzjarjament bħalma qed jagħmlu l-​biċċa l-​kbira taʼ dawk li jgħixu fil-​belt.

B’mod speċjali fil-​bliet il-​kbar, dawk l-​uħud ġodda li jmorru jfittxu s-​sigurtà jaqgħu vittmi taʼ wħud bla skrupli. Għala? Ġeneralment, dan jiġri minħabba li ma kellhomx żmien jiżviluppaw ħbiberiji mill-​qrib u għax jinsabu ’l bogħod mill-​membri tal-​familja. Għalhekk, m’għandhom lil ħadd li jagħtihom parir u li jistaʼ jgħinhom jevitaw il-​perikli tal-​ħajja materjalistika tal-​belt.

Josué ma ġiex imħajjar biex ipejjep. Barra minn hekk, hu beda jirrealizza li dak li kienet titlob minnu l-​ħajja tal-​belt kien ferm iktar minn dak li kien kapaċi jimmaniġġa b’suċċess. Fil-​każ tiegħu, fl-​iktar ċirkustanzi favorevoli, l-​unika ħaġa li l-​belt setgħet tassew toffrilu kienet ħafna ħolm li ma twettaqx. Hu rrikonoxxa li ma kellux sigurtà ġenwina fil-​belt; sempliċement li din il-​ħajja ma kinitx tgħodd għalih. Ġie maħkum minn sens kbir taʼ vojt, inferjorità, u falliment, u maż-​żmien umilja lilu nnifsu u mar lura lejn ir-​raħal.

Kien qed jibżaʼ li se jiġi mwaqqaʼ għaċ-​ċajt. Minflok, il-​familja tiegħu u ħbiebu laqgħuh id-​dar b’idejhom miftuħa. Grazzi għall-​imħabba tal-​familja tiegħu, l-​ambjent familjari tar-​raħal, u l-​imħabba taʼ ħbiebu fil-​kongregazzjoni Kristjana, hu malajr ħassu ħafna iktar fis-​sigurtà milli kien iħossu fil-​belt, fejn il-​ħolm taʼ ħafna nies isir tal-​biżaʼ. B’sorpriża għalih, billi ħadem iebes maʼ missieru fl-​għelieqi, qalaʼ iktar flus għalih u għall-​familja tiegħu milli kien jaqlaʼ li kieku baqaʼ fil-​belt.

Il-​Flus—X’Inhi l-​Problema Vera?

Se jagħtuk il-​flus sens taʼ sigurtà? Liz mill-​Kanada tgħid: “Bħala żagħżugħa, kont naħseb li l-​flus jeħilsuk mill-​inkwiet.” Saret tħobb raġel li kien tat-​tajjeb finanzjarjament. F’qasir żmien iżżewġu. Ħassitha hi fis-​sigurtà? Liz tkompli: “Meta żżewwiġt, kellna dar sabiħa u żewġ karozzi, u s-​sitwazzjoni finanzjarja tagħna kienet tant tajba li setaʼ jkollna kulma tixtieq qalbna inkwantu għal affarijiet materjali, vjaġġi, u rikreazzjoni. Forsi tidher stramba imma xorta kont ninkwieta fuq il-​flus.” Hi tispjega għaliex: “Kellna ħafna x’nitilfu. Jidher li iktar ma jkollok, inqas tħossok fis-​sigurtà. Il-​flus ma ħelsunix mill-​inkwiet jew l-​ansjetà.”

Jekk tħoss li m’għandekx biżżejjed flus biex tkun fis-​sigurtà, staqsi lilek innifsek, ‘X’inhi l-​problema vera? Hija tassew in-​nuqqas taʼ flus, jew hija n-​nuqqas taʼ maniġġar għaqli tal-​flus?’ Waqt li tirrifletti dwar il-​passat tagħha, Liz tgħid: “Issa nirrealizza li s-​sors tal-​problemi tal-​familja tiegħi meta kont għadni tifla kien in-​nuqqas taʼ ħila fl-​immaniġġar tal-​flus. Konna nixtru bid-​dejn, u b’hekk dejjem kellna uġigħ taʼ ras biex naraw kif se nħallsuh. Dan kien iġibilna l-​ansjetà.”

Madankollu, illum Liz u żewġha jħossuhom iktar fis-​sigurtà, minkejja li għandhom inqas flus. Meta tgħallmu l-​verità tal-​Kelma t’Alla, huma waqqfu milli jisimgħu stqarrijiet li jħajru dwar il-​flus u bdew jagħtu widen għall-​għerf t’Alla, inkluż dan il-​kliem: “Imma min jismaʼ lili jgħix moħħu mistrieħ [“fis-​sigurtà,” NW], bla ebda tfixkil, bla biżaʼ tal-​ħsara.” (Proverbji 1:33) Huma riedu li ħajjithom ikollha iktar sinifikat milli qatt setaʼ jagħtihom xi kont kbir fil-​bank. Issa, bħala missjunarji f’pajjiż ’il bogħod, Liz u żewġha qed jgħallmu lin-​nies sew għonja u sew foqra dwar li Alla Jehovah dalwaqt se jġib sigurtà ġenwina mad-​dinja kollha. Din l-​attività tagħti sodisfazzjon kbir u stabbilità li jiġu minn skop superjuri u l-​aqwa valuri, mhux minn qligħ finanzjarju.

Ftakar din il-​verità bażika: Li tkun għani m’Alla huwa iktar prezzjuż milli jkollok għana materjali. Fl-​Iskrittura Mqaddsa kollha, l-​enfasi titpoġġa, mhux fuq li jkollok l-​għana materjali, imma li jkollok l-​approvazzjoni taʼ Jehovah, xi ħaġa li nistgħu nżommuha jekk kontinwament nagħmlu r-​rieda t’Alla bil-​fidi. Kristu Ġesù inkuraġġiena biex ‘nistagħnew quddiem Alla’ u naħżnu ‘teżor fis-​sema.’—Luqa 12:​21, 33.

Il-​Pożizzjoni —Fejn Se Tasal?

Jekk int taħseb li jekk tikseb pożizzjoni ogħla se jkollok iktar sigurtà, staqsi lilek innifsek: ‘Min fil-​fatt bil-​pożizzjoni għolja tiegħu kiseb sigurtà vera? Liema pożizzjoni rrid nilħaq biex nikseb dan?’ Karriera taʼ suċċess tistaʼ tqarraq bik u ġġagħlek tħoss sens taʼ sigurtà li jwasslek għal diżappunt jew, iktar agħar, għal waqgħa diżastruża.

L-esperjenzi stess juru li meta wieħed ikollu l-​approvazzjoni t’Alla se jgawdi ħafna iktar sigurtà milli meta jkollu l-​approvazzjoni tal-​bniedem. Jehovah biss jistaʼ jagħti l-​għotja taʼ ħajja eterna lill-​bnedmin. Dan jinvolvi li isimna jkun miktub, mhux f’xi direttorju soċjali, imma fil-​ktieb tal-​ħajja t’Alla.—Eżodu 32:32; Apokalissi 3:5.

Meta twarrab daqsxejn ix-​xewqat mhux realistiċi tiegħek, kif tqisha s-​sitwazzjoni preżenti tiegħek, u x’tistaʼ tistenna onestament mill-​futur? Ħadd m’għandu kollox. Kif poġġieha wieħed Kristjan għaqli, “Kelli nitgħallem li l-​ħajja qatt m’hi dan U dak imma dan JEW dak.” Ieqaf għal ftit u aqra l-​kaxxa “Ġiet Rakkontata f’Benin.”

Issa staqsi dawn il-​mistoqsijiet: Liema għan, jew mira, huwa importanti f’ħajti? Liema hi l-​iktar triq diretta biex nasal għal dan l-​għan? Jistaʼ jkun li jien qbadt triq li hija itwal u bla sigurtà, u li dak li tassew irrid u li huwa verament possibbli jistaʼ jinkiseb permezz taʼ triq inqas komplikata?

Wara li ta parir dwar il-​valur li għandhom l-​affarijiet materjali mqabbel mal-​valur taʼ l-​affarijiet spiritwali, Ġesù qal li wieħed għandu jżomm għajnejh “sempliċi,” jew “iffokati” kif tpoġġiha n-​nota taʼ taħt fin-​New World Translation. (Mattew 6:​22, NW) Hu wera b’mod ċar li l-​affarijiet prinċipali fil-​ħajja huma l-​valuri u l-​miri spiritwali li jiċċentraw madwar l-​isem t’Alla u s-​Saltna tiegħu. (Mattew 6:​9, 10) Affarijiet oħra huma inqas importanti jew, bħallikieku, m’humiex fiċ-​ċentru taʼ l-​attenzjoni.

Ħafna mill-​magni tar-​ritratti llum jiffokaw awtomatikament fuq l-​affarijiet li jinsabu kemm fil-​bogħod u kemm fil-​viċin. Għandek int it-​tendenza li tagħmel hekk? ‘Tiffoka’ int kważi fuq kull ħaġa li tara—jiġifieri, tqisha bħala li hi importanti, mixtieqa, u li xi darba tistaʼ tinkiseb? Anki jekk forsi mhux f’kollox, il-​mira importanti għall-​Kristjani, is-​Saltna, tistaʼ faċilment tintilef fil-​geġwiġija taʼ ideat oħra, hekk kif kull idea tipprova tiġbed l-​attenzjoni tiegħek. It-​twissija qawwija taʼ Ġesù kienet: “Mela fittxu l-​ewwel is-​Saltna u l-​ġustizzja taʼ Alla, u dan kollu jingħatalkom ukoll.”—Mattew 6:33.

Fis-​Sigurtà Issa u għal Dejjem

Aħna lkoll nistgħu noħolmu dwar li jkollna affarijiet aħjar kemm għalina nfusna u kemm għall-​maħbubin tagħna. Madankollu, il-​fatt li aħna imperfetti, ngħixu f’dinja imperfetta, u għandna ħajja mhux daqstant twila jġagħalna nillimitaw l-​affarijiet li nistgħu b’mod realistiku nittamaw li niksbu. Kittieb Bibliku spjega eluf taʼ snin ilu: “Rajt ukoll taħt ix-​xemx li ma tintrebaħx mill-​ħfief it-​tiġrija, lanqas mill-​felħana t-​taqbida. M’huwiex taʼ l-​għorrief il-​ħobż jew taʼ min jifhem il-​ġid; lanqas taʼ min jinqalaʼ s-​suċċess, iżda f’kollox jidħol iż-​żmien u ċ-​ċirkustanzi.”—Koħèlet 9:11.

Xi drabi, tant inkunu medhijin bir-​rutina monotona tal-​ħajja taʼ kuljum li ninsew inħarsu lejn l-​iktar kwistjoni importanti dwar min aħna u x’tassew għandna bżonn sabiex inħossuna verament fis-​sigurtà. Ikkunsidra dan il-​kliem tal-​qedem kollu għerf: “Min iħobb il-​flus ma jixbax bil-​flus, u min iħobb l-​għana ma jixbax bil-​qligħ. Dan ukoll hu frugħa. Il-​ħaddiem, jiekol ftit jew jiekol wisq, jiġih ħelu l-​irqad, imma l-​għani x-​xabaʼ ma jħallihx jieħu nagħsa.” (Koħèlet 5:​9, 11 [5:​10, 12, NW]) Iva, fejn tinsab is-​sigurtà tiegħek?

Jekk is-​sitwazzjoni tiegħek b’xi mod hi bħall-​ħolma mhux realistika taʼ Josué, tistaʼ int tbiddel il-​pjanijiet tiegħek? Dawk li tassew iħobbuk se jappoġġawk, sewwa sew bħalma għamlu l-​familja taʼ Josué u ħbiebu fil-​kongregazzjoni Kristjana. Tistaʼ ssib iktar sigurtà f’ambjent umli flimkien maʼ dawk li jħobbuk milli f’belt maʼ dawk li jistgħu jipprofittaw ruħhom minnek.

Jekk int diġà għandek bl-​abbundanza, bħalma kellhom Liz u żewġha, tistaʼ tagħmel xi bidliet fil-​mod kif qed tgħix biex tiddedika iktar ħin u enerġija ħalli tgħin lin-​nies, sew għonja u sew foqra, jitgħallmu dwar is-​Saltna, il-​mezz li wieħed jikseb sigurtà vera?

Jekk ilek tipprova tilħaq xi pożizzjoni ogħla fis-​soċjetà jew fuq ix-​xogħol, forsi trid tirrifletti onestament fuq x’qed iqanqlek. Veru li xi vantaġġi persunali jistgħu jġibulek iktar ferħ f’ħajtek. Madankollu, kapaċi int iżżomm ruħek iffokat fuq is-​Saltna—il-​veru mezz biex wieħed jikseb sigurtà għal dejjem? Ftakar fil-​kliem taʼ Ġesù: “Min jagħti hu aktar hieni minn min jieħu.” (Atti 20:35) Jekk tinvolvi ruħek fid-​diversi attivitajiet tal-​kongregazzjoni Kristjana, int se tesperjenza sigurtà sodisfaċenti.

Dawk li jpoġġu fiduċja sħiħa f’Jehovah u fis-​Saltna tiegħu jgawdu sigurtà li tqawwi l-​qalb issa u jħarsu ’l quddiem lejn sigurtà assoluta fil-​futur. Is-​salmista qal: “Nżomm il-​Mulej dejjem quddiemi, għax bih f’leminti qatt ma nitħarrek. Hekk tifraħ qalbi u tithenna ruħi, u ġismi wkoll jistrieħ fil-​kwiet [“fis-​sigurtà,” NW].”—Salm 16:​8, 9.

[Kaxxa/Stampa f’paġna 6]

Ġiet Rakkontata f’Benin

Din l-​istorja ġiet rakkontata eluf taʼ drabi b’ħafna modi differenti. Ftit ilu, wieħed avanzat fl-​età li kien jgħix fir-​raħal taʼ Benin, fl-​Afrika tal-​Punent, irrakkonta l-​verżjoni li ġejja lil xi żgħażagħ.

Sajjied imur lura d-​dar bid-​dgħajsa żgħira tiegħu u jiltaqaʼ miegħu espert barrani li qed jaqdi f’dan il-​pajjiż li għadu qed jiżviluppa. L-​espert jistaqsi lis-​sajjied għala ġie lura daqshekk malajr. Hu jwieġeb li setaʼ baqaʼ iktar kieku ried imma kien qabad biżżejjed biex jieħu ħsieb il-​familja tiegħu.

“U issa fuq kollox, x’se tagħmel bil-​ħin kollu li għandek?” jistaqsi l-​espert.

Is-​sajjied iwieġeb: “Ħeqq, noqgħod nistad ftit. Nilgħab mat-​tfal tiegħi. Wara nofs in-​nhar, fl-​eqqel tas-​sħana, ilkoll nieħdu xi nagħsa. Fil-​għaxija, nieklu flimkien. Iktar tard, niltaqaʼ maʼ ħbiebi biex nisimgħu ftit mużika, u affarijiet bħal dawn.”

L-​espert iwaqqfu: “Ara, jien għandi l-​lawrja taʼ l-​università u studjajt dwar dawn l-​affarijiet. Nixtieq ngħinek. Int trid iddum iżjed ħin tistad. B’hekk taqlaʼ iktar flus u fi ftit żmien tistaʼ tixtri dgħajsa akbar minn din li għandek. B’dgħajsa akbar, tkun tistaʼ taqlaʼ ħafna iktar flus u fi ftit żmien jistaʼ jkollok ħafna dgħajjes tas-​sajd.”

“U mbagħad?” jistaqsi s-​sajjied.

“Imbagħad, minflok tbigħ permezz taʼ xi pitkal, tkun tistaʼ tinnegozja direttament mal-​fabbrika jew saħansitra inti stess ikollok il-​fabbrika tiegħek fejn jiġi proċessat il-​ħut. Tkun tistaʼ titlaq mir-​raħal tiegħek u tmur Cotonou, jew Pariġi, jew New York u tmexxi kollox minn hemm. Tistaʼ tikkunsidra wkoll li tpoġġi l-​ishma tan-​negozju tiegħek fil-​Borża tal-​pajjiż u ssir sinjur.”

“Kemm jieħu żmien dan kollu?” jistaqsi s-​sajjied.

“Forsi bejn 15 u 20 sena,” iwieġeb l-​espert.

“U mbagħad?” ikompli s-​sajjied.

“Dan ikun iż-​żmien meta l-​ħajja tibda tkun interessanti,” jispjega l-​espert. “Imbagħad tkun tistaʼ tirtira. Tistaʼ titlaq mill-​konfużjoni tal-​belt u tmur f’xi raħal imwarrab.”

“U fl-​aħħar mill-​aħħar xi jkun ir-​riżultat?” jistaqsi s-​sajjied.

“Imbagħad ikollok il-​ħin biex tmur tistad ftit, tilgħab mat-​tfal tiegħek, wara nofs in-​nhar fl-​eqqel tas-​sħana tieħu xi nagħsa, tiekol flimkien mal-​familja, u iktar tard tiltaqaʼ flimkien mal-​ħbieb biex tisimgħu ftit mużika.”

[Stampi f’paġna 7]

Il-​promozzjoni ġġib sigurtà?

[Stampi f’paġna 8]

Sħabek il-​Kristjani huma verament interessati fis-​sigurtà tiegħek