M’Hemmx Fruntieri għad-​Diżabilità

CHRISTIAN, li jgħix f’pajjiż Afrikan, inħataf minn xi suldati li pprovaw jisforzawh biex jissieħeb magħhom fl-​armata, imma hu rrifjuta għax ma riedx imur kontra l-​kuxjenza tiegħu mħarrġa fuq il-​Bibbja. Is-​suldati mbagħad ħaduh f’kamp militari fejn, wara li sawtuh għal erbat ijiem, wieħed minnhom sparalu f’riġlu. Christian irnexxielu jasal l-​isptar, imma kellhom jaqtgħulu riġlu mill-​irkobba ’l isfel. F’pajjiż Afrikan ieħor, saħansitra tfal ċkejknin kellhom partijiet minn ġisimhom maqtugħin barra minn ribelli armati. U mill-​Kambodja sal-​Balkani, mill-​Afganistan sa l-​Angola, splussivi moħbijin fl-​art ikomplu jisfiguraw u jimmankaw liż-​żgħar u lill-​kbar bl-​addoċċ.

Ħafna diżabilitajiet jiġu kaġunati wkoll mill-​aċċidenti u l-​mard, bħad-​dijabete. Anki s-​sustanzi velenużi li hemm fl-​ambjent jistgħu jikkaġunaw id-​diżabilitajiet. Per eżempju, fl-​inħawi qrib taʼ belt fl-​Ewropa tal-​Lvant, twieldu għadd taʼ tfal mingħajr il-​parti t’isfel taʼ driegħhom tal-​lemin. Dawn għandhom biss bħal boċċa ħierġa mill-​minkeb. L-​evidenza turi li din hija ħsara ġenetika kaġunata mit-​tinġis kimiku. Għadd taʼ nies oħrajn għad għandhom il-​partijiet kollha taʼ ġisimhom imma xorta waħda għandhom diżabilità minħabba l-​paralisi jew xi marda oħra. Tabilħaqq, m’hemmx fruntieri għad-​diżabilità.

Hu x’inhu l-​kaġun, id-​diżabilità tistaʼ tkissrek. Meta kellu għoxrin sena, Junior tilef il-​parti t’isfel taʼ riġlu x-​xellugi. Hu qal iktar tard: “Kelli ħafna diffikultajiet emozzjonali. Kont nibki ħafna minħabba l-​fatt li kont naf li qatt ma kien se jerġaʼ jkolli riġli. Ma kontx naf x’se nagħmel. Kont imħawwad.” Madankollu, maż-​żmien, l-​attitudni taʼ Junior inbidlet ħafna. Hu beda jistudja l-​Bibbja u tgħallem affarijiet li mhux biss għenuh ikampa imma wkoll tawh tama meraviljuża taʼ futur hieni preċiż hawnhekk fuq l-​art. Jekk għandek xi diżabilità, tixtieq int li jkollok l-​istess tama?

Jekk iva, jekk jogħġbok aqra l-​artiklu li jmiss. Aħna nirrikkmandawlek li tfittex ir-​referenzi taʼ l-​Iskrittura fil-​Bibbja tiegħek stess sabiex tkun tistaʼ tara għalik innifsek dak li l-​Ħallieq għandu maħżun għal dawk li jitgħallmu dwar l-​iskop tiegħu u jgħixu ħajjithom fi qbil miegħu.