Kif id-​Diżabilità Se Tintemm

IMMAĠINA għajnejn l-​għomja jaraw, widnejn it-​torox jisimgħu kull ħoss, ilsien l-​imbikkmin ikanta bil-​ferħ, u saqajn iz-​zopop sodi u jistgħu jippassiġġaw ’l hawn u ’l hinn! Hawnhekk m’aħniex qed nitkellmu dwar xi żvilupp ġdid fix-​xjenza medika, imma dwar ir-​riżultati taʼ l-​intervent t’Alla għan-​nom taʼ l-​umanità. Il-​Bibbja tbassar: “Mbagħad jinfetħu għajnejn l-​għomja, jinfetħu widnejn it-​torox. Mbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” (Isaija 35:​5, 6) Imma kif nistgħu nkunu ċerti li se titwettaq din il-​profezija verament taʼ l-​għaġeb?

L-​ewwelnett, meta Ġesù Kristu kien fuq l-​art, hu attwalment fejjaq lil nies minn kull xorta taʼ mard u diżabilità. Barra minn hekk, il-​biċċa l-​kbira mill-​mirakli tiegħu rawhom ħafna xhieda—saħansitra l-​għedewwa tiegħu. Fil-​fatt, għall-​inqas f’każ wieħed, opponenti suspettużi investigaw bir-​reqqa fejqan li sar minn Ġesù sabiex iwaqqgħulu ġieħu. Imma kollox baqaʼ f’wiċċhom, għax kulma għamlu kien li kkonfermaw il-​miraklu tiegħu. (Ġwann 9:​1, 5-34) Wara li Ġesù wettaq jerġaʼ miraklu ieħor li ħadd ma setaʼ jiċħdu, huma qalu b’diżappunt: “X’sejrin nagħmlu? Għax dan il-​bniedem qiegħed jagħmel ħafna sinjali.” (Ġwann 11:47) Madankollu, in-​nies komuni rreaġixxew aħjar, għax ħafna minnhom bdew ipoġġu l-​fidi tagħhom f’Ġesù.—Ġwann 2:23; 10:​41, 42; 12:​9-11.

Il-​Mirakli taʼ Ġesù —Dehra bil-​Quddiem tal-​Fejqan Globali

Il-​mirakli taʼ Ġesù mhux biss urew li Ġesù kien il-​Messija u l-​Iben t’Alla imma wkoll fornew bażi għall-​fidi fil-​wegħdi tal-​Bibbja li fil-​futur il-​bnedmin ubbidjenti se jitfejqu. Dawn il-​wegħdi jinkludu l-​profezija li hemm f’Isaija kapitlu 35, imsemmija fl-​ewwel paragrafu. Isaija 33:24 jgħid dwar is-​saħħa futura tal-​bnedmin li jibżgħu minn Alla: “Ħadd minn min jgħammar hemm ma jgħid: ‘Jien marid.’” Bl-​istess mod, Apokalissi 21:4 jwiegħed: “[Alla] jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel [il-provi u s-​sofferenzi taʼ llum].”

In-nies jitolbu regolarment għat-​twettiq taʼ dawn il-​profeziji meta jirrepetu t-​talba mudell taʼ Ġesù, li parti minnha tgħid: “Tiġi saltnatek, ikun li trid int, kif fis-​sema, hekkda fl-​art.” (Mattew 6:10) Iva, ir-​rieda t’Alla tinkludi l-​art u l-​umanità. Il-​mard u d-​diżabilità, għalkemm hemm raġuni għala tħallew, dalwaqt ma jeżistux iktar; m’humiex se jħassru ‘mirfes riġlejn’ Alla għal dejjem.—Isaija 66:1.a

Imfejqin Mingħajr Uġigħ jew Spejjeż

Kien x’kien il-​mard li n-​nies setaʼ kellhom, Ġesù fejjaqhom bla wġigħ, bla dewmien, u bla spejjeż. M’għandniex xi ngħidu, il-​kelma dwar dan ġriet maʼ kullimkien, u malajr “bdew resqin lejh ġemgħat kbar taʼ nies, li kellhom magħhom zopop, għomja, mmankati, mbikkmin, u ħafna oħrajn; qegħduhomlu f’riġlejh, u hu fejjaqhom.” Kif irreaġixxew in-​nies? Ir-​rakkont taʼ Mattew, li ra x’ġara b’għajnejh stess, ikompli: “In-​nies kollha baqgħu mistagħġba meta raw l-​imbikkmin jitkellmu, l-​immankati qawwijin u sħaħ, iz-​zopop jimxu u l-​għomja jaraw; u bdew jagħtu glorja lil Alla taʼ Iżrael.”—Mattew 15:​30, 31.

Innota li dawk li tfejqu minn Ġesù ma kinux magħżulin bir-​reqqa minn qalb il-​folla—ingann użat mill-​imposturi. Minflok, il-​ħafna qraba u ħbieb tal-​morda ‘qegħduhom f’riġlejn Ġesù, u hu fejjaqhom.’ Ejja issa nagħtu ħarsa lejn xi eżempji speċifiċi taʼ l-​abbiltà li Ġesù għandu biex ifejjaq in-​nies.

L-għomja: Waqt li kien Ġerusalemm, Ġesù ta d-​dawl lil raġel li kien “agħma minn twelidu.” Dan ir-​raġel kien magħruf sewwa fil-​belt bħala tallab agħma. Mela tistaʼ timmaġina l-​eċċitament u l-​għagħa tan-​nies meta rawh miexi ’l hawn u ’l hinn u jara! Madankollu, mhux kulħadd kien kuntent. Xi wħud mill-​Fariżej, setta Lhudija li kienet prominenti u influwenti, kienu ddisprati biex isibu xi evidenza taʼ ingann min-​naħa taʼ Ġesù peress li ftit qabel kien niggiżhom għax kixef il-​ħażen tagħhom. (Ġwann 8:​13, 42-44; 9:​1, 6-31) Għalhekk, huma interrogaw lir-​raġel li ġie mfejjaq, imbagħad lill-​ġenituri tiegħu, u mbagħad mill-​ġdid lir-​raġel. Imma l-​istħarriġ tal-​Fariżej sempliċement ikkonferma l-​miraklu taʼ Ġesù, u dan irrabjahom. Imħawwad minħabba r-​raġunar mgħawweġ taʼ dawn l-​ipokriti reliġjużi, ir-​raġel imfejjaq innifsu qal: “Qatt fid-​dinja ma nstemaʼ li xi ħadd fetaħ għajnejn wieħed agħma mit-​twelid. Li kieku dan ma kienx ġej mingħand Alla, xejn ma kien ikollu ħila jagħmel.” (Ġwann 9:​32, 33) Minħabba din l-​espressjoni taʼ fidi sinċiera u intelliġenti, il-​Fariżej “keċċewh ’il barra,” u dan donnu jfisser li dan ir-​raġel li darba kien agħma tkeċċa mis-​sinagoga.—Ġwann 9:​22, 34.

It-torox: Waqt li Ġesù kien fid-​Dekapoli, reġjun lejn il-​lvant tax-​Xmara Ġordan, in-​nies “ġibulu wieħed, trux u mbikkem.” (Mark 7:​31, 32) Ġesù mhux biss fejjaq lil dan l-​individwu imma wkoll wera dehen profond rigward is-​sentimenti tat-​torox, li għandhom mnejn iħossuhom imbarazzati fil-​folol. Il-​Bibbja tgħidilna li Ġesù qabad lir-​raġel trux u “ħarġu għalih waħdu minn qalb in-​nies” u fejqu. Mill-​ġdid, dawk li raw dan b’għajnejhom stess kienu “mimlijin bil-​għaġeb” u qalu: “Kollox għamel tajjeb: jagħti s-​smigħ lit-​torox u l-​kliem lill-​imbikkmin.”—Mark 7:​33-37.

Il-paralitiċi: Waqt li Ġesù kien Kafarnahum, in-​nies resqu lejh b’raġel paralizzat mixħut fuq friex. (Mattew 9:2) Versi 6 sa 8 jiddeskrivu x’ġara. Ġesù qal lill-​mifluġ: “‘Qum, aqbad il-​friex u mur lejn darek.’ Dak qam u telaq lejn daru. In-​nies, meta raw dan, beżgħu u qabdu jfaħħru lil Alla li ta setgħa bħal din lill-​bnedmin.” Dan il-​miraklu wkoll twettaq fil-​preżenza kemm tad-​dixxipli taʼ Ġesù u kemm taʼ l-​għedewwa tiegħu. Innota li d-​dixxipli, li ma kinux mogħmijin bil-​mibegħda u l-​preġudizzju, ‘faħħru lil Alla’ għal dak li raw b’għajnejhom.

Il-morda: “Resaq [fuq Ġesù] wieħed lebbruż jitolbu bil-​ħerqa, nxteħet għarkubbtejh quddiemu u qallu: ‘Jekk trid, tistaʼ tnaddafni.’ Mqanqal mill-​ħniena, Ġesù medd idu fuqu, messu u qallu: ‘Irrid, kun imnaddaf.’ U minnufih il-​lebbra marritlu.” (Mark 1:​40-42) Innota li Ġesù ma fejjaqx lil dan l-​individwu kontra qalbu imma kien imqanqal minn mogħdrija ġenwina. Immaġina li int kont lebbruż. Kif kont tħossok kieku xi ħadd fejqek minnufih u mingħajr uġigħ minn marda tal-​biżaʼ li bil-​mod il-​mod kienet sfiguratlek ġismek u għamlitek imkeċċi mis-​soċjetà? Bla dubju tistaʼ tifhem għala lebbruż ieħor li tfejjaq b’mod mirakoluż “inxteħet wiċċu fl-​art f’riġlejn Ġesù u raddlu ħajr.”—Luqa 17:​12-16.

L-imweġġgħin: L-​aħħar miraklu taʼ Ġesù qabel m’arrestawh u sammruh maʼ zokk kien att taʼ fejqan. X’ħin ġew biex jieħdu lil Ġesù, bla ma ħasibha darbtejn, l-​appostlu Pietru “kellu sejf, siltu, u darab lill-​qaddej tal-​qassis il-​kbir u qatagħlu barra widintu l-​leminija.” (Ġwann 18:​3-5, 10) L-​istess rakkont f’Luqa jgħidilna li Ġesù “messlu widintu u fejjqu.” (Luqa 22:​50, 51) Mill-​ġdid, dan il-​ġest taʼ mogħdrija twettaq fil-​preżenza tal-​ħbieb kif ukoll taʼ l-​għedewwa taʼ Ġesù—f’dan il-​każ, dawk li arrestawh.

Iva, iktar ma neżaminaw il-​mirakli taʼ Ġesù mill-​qrib, iktar naraw kemm huma awtentiċi. (2 Timotju 3:16) U bħalma ssemma qabel, dan l-​istudju għandu jsaħħilna l-​fidi fil-​wegħda t’Alla li jfejjaq lill-​bnedmin ubbidjenti. Il-​Bibbja tagħti definizzjoni tal-​fidi Kristjana bħala ‘pedament tal-​ħwejjeġ li għandna nittamaw, il-​prova tal-​ħwejjeġ li ma narawx.’ (Lhud 11:1) Jidher ċar li Alla ma jridniex nibilgħu kollox jew nittamaw f’xi xewqa bla temma imma jinkuraġġina biex nibnu fidi soda bbażata fuq l-​evidenza. (1 Ġwann 4:1) Hekk kif inkunu qed niksbu din il-​fidi, se nsibu li qegħdin insiru iktar sodi, f’saħħitna, u henjin spiritwalment.—Mattew 5:3; Rumani 10:17.

Il-​Fejqan Spiritwali Jrid Jiġi l-​Ewwel!

Ħafna nies li huma f’saħħithom fiżikament m’humiex henjin. Xi wħud saħansitra jipprovaw jikkommettu suwiċidju għaliex m’għandhomx tama għall-​futur jew għaliex iħossu li m’għandhomx soluzzjoni għall-​problemi tagħhom. Fil-​fatt, dawn għandhom diżabilità spiritwali—kundizzjoni ferm iktar serja f’għajnejn Alla minn xi diżabilità fiżika. (Ġwann 9:41) Mill-​banda l-​oħra, ħafna li għandhom xi diżabilità fiżika, bħal Christian u Junior li ssemmew fl-​artiklu taʼ qabel, jgħixu ħajja hienja u sodisfaċenti. Għala? Għaliex huma sodi spiritwalment u jieħdu l-​enerġija tagħhom minn tama ċerta bbażata fuq il-​Bibbja.

Meta rrefera għall-​ħtieġa unika tagħna bħala bnedmin, Ġesù qal: “Il-​bniedem mhux bil-​ħobż biss jgħix, iżda b’kull kelma li toħroġ minn fomm Alla.” (Mattew 4:4) Iva, kuntrarju għall-​annimali, il-​bnedmin jeħtieġu xi ħaġa iktar minbarra ikel materjali. Peress li ġejna maħluqin fix-​‘xbieha’ t’Alla, aħna neħtieġu l-​ikel spiritwali—l-​għarfien dwar Alla u kif niffittjaw fl-​iskop tiegħu, kif ukoll li nagħmlu r-​rieda tiegħu. (Ġenesi 1:27; Ġwann 4:34) L-​għarfien dwar Alla jimlielna ħajjitna bl-​iskop u bl-​enerġija spiritwali. Iqegħdilna wkoll il-​bażi għal ħajja eterna fuq l-​art magħmula ġenna. “Din hi l-​ħajja taʼ dejjem,” qal Ġesù, “li jagħrfu lilek, Alla waħdek veru, u lil Ġesù Kristu, li inti bgħatt.”—Ġwann 17:3.

Taʼ min jinnota li n-​nies taʼ żmien Ġesù ma indirizzawhx bħala “Tabib” imma bħala “Għalliem.” (Luqa 3:12; 7:40) Għala? Għaliex Ġesù għallem lin-​nies dwar is-​soluzzjoni permanenti għall-​problemi tal-​bnedmin—is-​Saltna t’Alla. (Luqa 4:43; Ġwann 6:​26, 27) Dan il-​gvern tas-​sema f’idejn Ġesù Kristu se jaħkem l-​art kollha kemm hi u jwettaq il-​wegħdi Bibliċi kollha dwar il-​fejqan sħiħ u dejjiemi taʼ bnedmin twajbin u taʼ l-​art li hija d-​dar tagħhom. (Apokalissi 11:15) Kien għalhekk li Ġesù, fit-​talba mudell tiegħu, rabat il-​miġja tas-​Saltna maʼ li ssir ir-​rieda t’Alla fuq l-​art.—Mattew 6:10.

Għal ħafna individwi li jbatu minn xi diżabilità, il-​fatt li tgħallmu dwar din it-​tama eċċitanti bidlilhom id-​dmugħ taʼ swied il-​qalb fi dmugħ taʼ ferħ. (Luqa 6:21) Fil-​fatt, Alla mhux biss se jelimina l-​mard u d-​diżabilità; hu se jħassar għalkollox dak li jikkaġuna s-​sofferenza umana—id-​dnub innifsu. Tabilħaqq, Isaija 33:24 u Mattew 9:​2-7, li ġew kwotati qabel, jorbtu l-​mard mal-​kundizzjoni midinba tagħna. (Rumani 5:12) B’hekk, meta jintrebaħ id-​dnub, il-​bnedmin sa fl-​aħħar se jgawdu “l-​ħelsien tal-​glorja taʼ wlied Alla,” ħelsien li jinkludi l-​perfezzjoni tal-​moħħ u tal-​ġisem.—Rumani 8:21.

Dawk li huma relattivament b’saħħithom jistgħu faċilment ma jibqgħux japprezzaw is-​sitwazzjoni tagħhom. Imma dan m’huwiex il-​każ taʼ dawk li jafu x’jiġifieri li tgħix b’xi diżabilità. Huma jafu preċiż kemm huma prezzjużi s-​saħħa u l-​ħajja u kemm l-​affarijiet jistgħu jinbidlu f’ħakka t’għajn u bla mistenni. (Koħèlet 9:11) Għalhekk, hija t-​tama tagħna li dawk li jbatu minn xi diżabilità fost il-​qarrejja tagħna jagħtu konsiderazzjoni speċjali lejn il-​wegħdi meraviljużi t’Alla kif insibuhom fil-​Bibbja. Ġesù ta ħajtu sabiex jiżgura t-​twettiq taʼ dawn il-​wegħdi. Liema garanzija aħjar jistaʼ jkollna?—Mattew 8:​16, 17; Ġwann 3:16.

[Nota taʼ taħt]