Il-​Waqt li Tinkixef Kwistjoni Kunfidenzjali

Il-​fatt li ċerti affarijiet jinżammu kunfidenzjali jistaʼ jagħmel id-​differenza bejn li tinżamm il-​paċi jew li jinqalgħu l-​argumenti. Madankollu, hemm xi drabi meta kwistjoni kunfidenzjali għandha tinkixef? Innota x’jgħid il-​profeta Għamos dwar dak Alla tiegħu: “Ebda ħaġa ma jagħmel Sidi l-​Mulej, jekk ma jurix il-​ħwejjeġ moħbija tiegħu lill-​qaddejja tiegħu l-​profeti.” (Għamos 3:7) Minn dan il-​kliem, nistgħu nitgħallmu xi ħaġa dwar il-​kunfidenzjalità. Jehovah jistaʼ jżomm xi affarijiet kunfidenzjali għal ċertu żmien u mbagħad jurihom lil xi individwi. Kif nistgħu nimitaw lil Jehovah f’dan?

Kultant, ir-​rgħajja maħturin fil-​kongregazzjoni Kristjana jarawha taʼ benefiċċju li kwistjoni partikulari tinżamm sigrieta. (Atti 20:28) Per eżempju, filwaqt li jżommu f’moħħhom il-​ġid tal-​kongregazzjoni, jistgħu jiddeċiedu li jżommu lura b’mod kunfidenzjali ċerti dettalji dwar xi arranġamenti jew bidliet fir-​responsabbiltajiet tal-​kongregazzjoni sa ċertu żmien speċifiku.

Madankollu, f’każ bħal dan huwa importanti li jintwera biċ-​ċar lil min hu involut jekk, meta, u b’liema mod il-​kwistjoni għandha tinkixef. Il-​fatt li jkunu jafu meta l-​kwistjoni se tinkixef pubblikament jistaʼ jgħinhom iżommu l-​kunfidenzjalità.—Proverbji 25:9.