‘Alla, Għala Ħallejt Dan Jiġri?’
RICARDO għadu jiftakar meta kien bil-qiegħda maʼ martu, Maria, f’kamra jistennew sakemm ikun imisshom jidħlu għand it-tabib.a Ħadd minnhom ma kellu l-kuraġġ jaqra r-riżultati taʼ l-aħħar testijiet mediċi li kienet għamlet Maria. Imbagħad, Ricardo fetaħ l-envelop, u t-tnejn li huma taw daqqa t’għajn lejn il-kliem mediku li kien hemm fir-rapport. Għajnejhom waqgħu fuq il-kelma “kanċer,” u nfexxew jibku hekk kif irrealizzaw dan x’kien ifisser verament.
“It-tabib kien tassew qalbu tajba,” jiftakar Ricardo, “imma hu ovvjament irrealizza kemm kienet gravi s-sitwazzjoni għax tgħidx kemm-il darba qalilna biex nafdaw f’Alla.”
Qabel ma Maria bdiet tieħu l-kura bir-raġġi, it-tabib innota ċertu movimenti involontarji f’sieqha l-leminija. Iktar testijiet irrivelaw li l-kanċer kien infirex sal-moħħ. Wara biss ġimgħa li kienet bdiet il-kura, kellhom iwaqqfulha r-raġġi. Maria waqgħet f’koma u mietet xahrejn wara. “Ħadt gost li ma baqgħetx issofri,” jispjega Ricardo, “imma tant immissjajtha li bdejt nixtieq li mmut jien ukoll. Spiss kienet toħroġ karba lil Alla: ‘Għala ħallejt dan jiġri?’”
Meta Tiġri Xi Traġedja, Iqumu Ħafna Mistoqsijiet
Bħal Ricardo, ħafna nies madwar id-dinja jiġu wiċċ imbwiċċ mar-realtà tas-sofferenza. Ħafna drabi, huma l-innoċenti li jsofru. Aħseb ftit dwar il-qsim il-qalb kaġunat mill-ġlied bl-armi li ma jaqtaʼ xejn, u li qed jifni lill-umanità. Jew ikkunsidra l-uġigħ li ħassew l-għadd taʼ wħud li sfaw vittmi taʼ vjolenza domestika, stupru, abbuż taʼ tfal, u ħażen ieħor li jaf jagħmel il-bniedem. Matul l-istorja tal-bniedem jidher li ma kienx hemm limitu għall-inġustizzji u l-uġigħ li rġiel u nisa kienu lesti jikkaġunaw lil xulxin. (Koħèlet 4:1-3) Imbagħad, hemm in-niket taʼ wħud li sfaw vittmi taʼ diżastri naturali jew taʼ xi mard emozzjonali, mentali, u fiżiku. Mhux taʼ b’xejn li ħafna jistaqsu, “Alla għala jippermetti din is-sofferenza?”
Anki nies li huma reliġjużi ma jsibuhiex faċli biex ikampaw mas-sofferenza. Forsi anki int għandek mnejn staqsejt lilek innifsek x’raġuni jistaʼ jkollu Alla taʼ mħabba u li jistaʼ kollox biex jippermetti li l-bnedmin isofru. Huwa vitali li nsibu tweġiba sodisfaċenti u vera għal din il-mistoqsija li tant tħabbel imħuħ, għax din it-tweġiba teffettwa l-paċi tal-moħħ u r-relazzjoni tagħna m’Alla. Il-Bibbja tipprovdi din it-tweġiba. Jekk jogħġbok ikkunsidra dak li għandha x’tgħid il-Bibbja bħalma se naraw fl-artiklu li jmiss.
[Nota taʼ taħt]
a L-ismijiet ġew mibdulin.
[Stampi f’paġna 3]
It-tabib qalilna kemm-il darba biex nafdaw f’Alla