Ħu Vantaġġ minn Ċirkustanzi Differenti

Pum, Jan, Dries, u Otto, erbaʼ anzjani Kristjani li jgħixu fl-​Olanda, għandhom ħafna affarijiet jixtiebhu. Kollha huma miżżewġin u għandhom it-​tfal. Ukoll, xi snin ilu, kollha kemm huma kellhom xogħol sekulari full-time u kienu jgħixu fi djar komdi. Però, kollha kemm huma waqfu mix-​xogħol sekulari u bdew jużaw il-​ħin u s-​saħħa kollha tagħhom biex imexxu ’l quddiem l-​interessi tas-​Saltna. X’għenhom jagħmlu bidla bħal din? L-​erbgħa li huma għamlu użu tajjeb minn ċirkustanzi differenti.

IĊ-​ĊIRKUSTANZI li jinbidlu jeffettwaw kważi lil kulħadd maż-​żmien. Ħafna bidliet, bħaż-​żwieġ, it-​tfal, u l-​kura taʼ ġenituri avanzati, iġibu magħhom iktar responsabbiltajiet. Imma, xi ftit minnhom jipprovdulna iktar ħin biex inżidu fil-​ministeru Kristjan tagħna. (Mattew 9:​37, 38) Per eżempju, nistgħu nirtiraw mix-​xogħol, jew inkella t-​tfal tagħna jistgħu jitilqu mid-​dar meta jikbru.

Iktar minn hekk, minkejja li huwa veru li ċ-​ċirkustanzi tagħna jistgħu jinbidlu rridu jew ma rridux, xi Kristjani rnexxielhom joħolqu bidliet fiċ-​ċirkustanzi tagħhom li fetħulhom opportunitajiet biex iżidu sehemhom fil-​ministeru. Dan huwa eżatt dak li għamlu Pum, Jan, Dries, u Otto. Kif?

Meta t-​Tfal Jitilqu mid-​Dar

Xogħol Pum kien li jieħu ħsieb il-​kotba taʼ negozju farmaċewtiku. Hu u martu Anny kemm-il darba qdew bħala pijunieri awżiljarji flimkien maż-​żewġt itfal bniet tagħhom. Pum u Anny kienu jagħmlu wkoll arranġamenti għal sħubija bnina maʼ oħrajn li kienu fil-​ministeru taʼ pijunier. “Dan ipproteġiena minn problemi li setgħu jinqalgħu minn tipi oħra taʼ sħubija,” jgħidu huma. Imħeġġin mill-​eżempju tal-​ġenituri tagħhom, iż-​żewġt ibniet tagħhom saru pijunieri regulari malli spiċċaw l-​iskola.

Meta wliedhom telqu mid-​dar, Pum u Anny irrealizzaw li din il-​bidla fiċ-​ċirkustanzi tathom iktar libertà u finanzi u setgħu jaħtfu l-​opportunità biex jivvjaġġaw lejn postijiet interessanti jew igawdu xi rikreazzjoni oħra. Madankollu, huma ddeċidew li minflok jagħmlu dan, jużaw dawn iċ-​ċirkustanzi differenti biex iżidu fil-​ministeru Kristjan tagħhom. Għalhekk, Pum talab permess mingħand l-​imgħallem tiegħu biex jaħdem ġurnata inqas fil-​ġimgħa. Wara, Pum irranġa biex ikun jistaʼ jibda x-​xogħol fis-​7:00 taʼ fil-​għodu u jieqaf fis-​2:00 taʼ wara nofsinhar. Ovvjament, inqas xogħol kien ifisser li jgħaddu b’inqas flus. Xorta waħda, huma rnexxielhom, u fl-​1991, Pum ngħaqad mal-​mara tiegħu bħala pijunier regulari.

Wara dan, Pum intalab biex ikun l-​assistent inkarigat mis-​Sala taʼ l-​Assembleat tax-​Xhieda taʼ Jehovah. Dik l-​istedina kienet tfisser li t-​tnejn li huma kellhom iħallu d-​dar fejn kienu ilhom jgħixu 30 sena u jmorru joqogħdu f’appartament qrib is-​Sala taʼ l-​Assemblea. Huma hekk għamlu. Kien diffiċli dan? Anny tgħid li kulmeta kienet tibda tħossha ’l bogħod minn darha, kienet tistaqsi lilha nfisha, ‘Jiena bħall-​mara taʼ Lot?’ Hi rrifjutat li ‘tħares lura.’​—Ġenesi 19:26; Luqa 17:32.

Pum u Anny iħossu li d-​deċiżjoni li ħadu ġabitilhom ħafna barkiet. Fost ħafna affarijiet oħrajn, jieħdu pjaċir bis-​servizz tagħhom fis-​Sala taʼ l-​Assemblea, jagħmlu t-​tħejjijiet għall-​konvenzjonijiet distrettwali, u jiltaqgħu maʼ ħafna indokraturi tas-​circuit (ministri li jivvjaġġaw) li jagħtu taħditiet fis-​sala. Kultant, iżuru kongregazzjonijiet differenti meta Pum jaqdi bħala sostitut għall-​indokratur tas-​circuit.

Din il-​koppja kif irnexxielha żżid is-​servizz tagħha? Pum jgħid: “Meta ħajtek tinbidel radikalment, trid tkun determinat li tagħmel l-​aħjar użu possibbli miċ-​ċirkustanzi l-​ġodda.”

Bdew Jgħixu Ħajja Iktar Sempliċi

Jan u l-​mara tiegħu, Woth, għandhom tlett itfal. L-​istess bħal Pum u l-​familja tiegħu, Jan, għamel użu għaqli minn ċirkustanzi differenti. Għal snin sħaħ, Jan kellu xogħol b’paga tajba ġo bank u kien jipprovdi ħajja komda għall-​familja tiegħu. Imma hu beda jħoss xewqa li dejjem tikber biex iżid fil-​ministeru tiegħu. Hu jispjega: “Tul ħajti, l-​apprezzament tiegħi għall-​verità sar iktar profond, u l-​imħabba tiegħi għal Jehovah kibret.” Għalhekk, fl-​1986, Jan biddel iċ-​ċirkustanzi tiegħu. Hu jgħid: “Ħadt vantaġġ mit-​tibdil li sar fl-​uffiċċju u bdejt naħdem inqas sigħat. Sħabi tax-​xogħol laqqmuni Diwodo għax jien kont naħdem biss nhar taʼ dinsdag [it-Tlieta], woensdag [l-Erbgħa], u donderdag [il-Ħamis]. Is-​salarju tiegħi naqas b’40 fil-​mija. Begħt id-​dar tagħna u xtrajt dgħajsa li konna nużawha bħala dar sabiex inkunu nistgħu naqdu fejn kien hemm l-​iktar bżonn għall-​pubblikaturi tas-​Saltna. Iktar tard, ġiet l-​opportunità li nirtira mix-​xogħol kmieni. Id-​dħul tiegħi niżel b’20 fil-​mija oħra, imma fl-​1993, stajt nibda naqdi bħala pijunier regulari.”

Illum, Jan huwa membru taʼ Kumitat taʼ Koordinazzjoni maʼ l-​Isptarijiet u qeda regolarment bħala indokratur tal-​konvenzjoni. Minkejja li ma tantx tiflaħ, Woth taqdi bħala pijuniera awżiljarja minn żmien għal żmien. It-​tlett itfal tagħhom issa żżewġu u flimkien maʼ l-​imseħbin tagħhom, qed jaqdu bħala ministri żelużi tas-​Saltna.

Jan u Woth kif irnexxielhom jaddattaw ruħhom għal livell t’għajxien iktar baxx? “Meta konna mhux ħażin,” iwieġeb Jan, “konna noqogħdu attenti li ma nsirux inħobbu żżejjed l-​affarijiet materjali. Illum, jistaʼ jkun ftit skomdu li toqgħod tistenna xi ftit sakemm tkun tistaʼ takkwista xi ħaġa, imma l-​barkiet spiritwali u l-​privileġġi li ngħatajna jpattu bil-​kbir.”

Bħal Jan u Woth, Dries u martu, Jenny, ukoll iddeċidew li jżommu ħajjithom sempliċi biex jiddedikaw iktar ħin għall-​interessi tas-​Saltna. Dries u Jenny qdew bħala pijunieri sakemm saru ġenituri. Imbagħad, biex jieħu ħsieb il-​familja tiegħu, Dries ħadem bħala amministratur f’kumpanija kbira. L-​imgħallmin tiegħu apprezzawh ħafna x-​xogħol tiegħu u offrewlu promozzjoni. Madankollu, Dries irrifjuta l-​promozzjoni għax li kieku aċċettaha kien ikun ifisser inqas ħin għal attivitajiet Kristjani.

Biex irabbu familja u jieħdu ħsieb omm Jenny li kienet marida, it-​tnejn li huma kellhom jinvestu ħafna ħin u enerġija. Xorta waħda, huma komplew jikkultivaw spirtu taʼ pijunier. X’għenhom jagħmlu dan? Jenny tispjega: “Aħna kellna l-​pijunieri joqogħdu magħna, konna nistiednu lill-​pijunieri biex jieklu għandna, u konna nistiednu lill-​indokraturi tas-​circuit biex joqogħdu magħna.” Dries ikompli: “Żammejna l-​ħajja sempliċi u evitajna li nimtlew bid-​dejn. Iddeċidejna li qatt ma nidħlu f’negozju kbir jew nixtru dar, ħalli fil-​futur dawn l-​affarijiet ma jżommuniex lura.”

Id-deċiżjoni li ħadu Dries u Jenny biex joħolqu ċirkustanzi li jippermettulhom iktar ħin għall-​interessi tas-​Saltna kellha riżultati premjanti. Iż-​żewġ subien tagħhom illum jaqdu bħala anzjani, u wieħed minnhom jaqdi bħala pijunier flimkien maʼ martu. Dries u Jenny qdew bħala pijunieri speċjali, u wara Jenny akkumpanjat lil żewġha fix-​xogħol tas-​circuit. Issa huma jinsabu f’Betel bħala volontieri, u Dries jaqdi bħala membru tal-​Kumitat tal-​Fergħa.

Irtirar Kmieni mix-​Xogħol

Bħal Dries u Jenny, Otto u martu, Judy, kienu pijunieri qabel ma kellhom liż-​żewġt itfal bniet tagħhom. Meta Judy kienet tqila bl-​ewwel tarbija tagħhom, Otto sab xogħol bħala għalliem fi skola.

Meta t-​tfal kienu qed jikbru, Otto u Judy kemm-il darba stiednu lill-​pijunieri d-​dar tagħhom sabiex b’hekk it-​tfal tagħhom setgħu jaraw il-​ferħ taʼ ħaddiema Kristjani full-time. Maż-​żmien, it-​tifla l-​kbira saret pijuniera. Wara, hi attendiet l-​Iskola taʼ Gilgħad u flimkien maʼ żewġha, issa taqdi bħala missjunarja f’art Afrikana. It-​tifla l-​oħra saret pijuniera fl-​1987, u Judy ngħaqdet magħha.

Meta ċirkustanzi differenti kienu jippermettu lil Otto biex jaħdem inqas sigħat l-​iskola, hu kien juża l-​ħin żejjed biex jagħmel ix-​xogħol taʼ pijunier. Maż-​żmien, hu waqaf mix-​xogħol kompletament. Illum, fix-​xogħol taʼ l-​ivvjaġġar, Otto juża l-​abbiltà tiegħu bħala għalliem biex isaħħaħ spiritwalment lill-​kongregazzjonijiet.

X’inhu l-​parir li jagħti Otto lil dawk li jirtiraw kmieni mix-​xogħol? “Meta tirtira, taqbadx u tiddeċiedi biex tiħodha bil-​mod għal sena jew għal ċertu żmien. Faċli ħafna biex tidra ‘tiħodha bil-​mod.’ U qabel ma tkun taf, tkun insejtu s-​servizz taʼ pijunier. Minflok, ibda agħmel iktar xogħol fil-​ministeru u fil-​kongregazzjoni mill-​ewwel.”

Uża l-​Esperjenza li Ksibt fil-​Ħajja

Veru, aħwa bħal Pum, Jan, Dries, u Otto m’għadx għandhom is-​saħħa li kellhom meta kienu iżgħar. Imma issa huma għandhom iktar maturità, esperjenza, u għerf. (Proverbji 20:29) Jafu x’jiġifieri li tkun missier u billi ħadmu maʼ marthom, għandhom idea taʼ kemm hemm xogħol involut meta tkun omm. Flimkien man-​nisa tagħhom, ħadu ħsieb il-​problemi tal-​familja u għamlu miri teokratiċi għal uliedhom. Otto jgħid: “Meta nagħti pariri bħala indokratur tas-​circuit fi kwistjonijiet fejn tidħol il-​familja, il-​fatt li jien stess rabbejt familja jgħin ħafna.” Din l-​istess esperjenza bħala missier issa tagħmlu membru utli tal-​familja Betel, bil-​ħafna ħaddiema żgħażagħ li hemm fiha.

Iva, l-​għarfien li jiksbu mill-​ħajja jgħin lil aħwa bħal dawn biex jieħdu ħsieb ħafna bżonnijiet differenti fil-​kongregazzjonijiet. L-​esperjenza li għandhom, biex ngħidu hekk, sennitilhom l-​għodod tagħhom sabiex jużaw l-​enerġija tagħhom bl-​aħjar mod possibbli. (Koħèlet 10:10) Fil-​fatt, dawn spiss jirnexxilhom jagħmlu x-​xogħol f’inqas ħin minn uħud li huma iktar b’saħħithom fiżikament imma li għandhom inqas esperjenza.

Aħwa bħal dawn flimkien man-​nisa tagħhom, huma eżempji tajbin għaż-​żgħażagħ fost il-​poplu taʼ Jehovah. Iż-​żgħażagħ josservaw li koppji bħal dawn esperjenzaw personalment ħafna mill-​isfidi u l-​barkiet li huma rapportati fil-​pubblikazzjonijiet Kristjani tagħna. Huwa inkuraġġanti li tara rġiel u nisa li juru spirtu bħal dak taʼ Kaleb li, minkejja li kien avanzat fl-​età, talab biex jagħmel inkarigu li kien jinvolvi sforz kbir.​—Ġożwè 14:​10-​12.

Imita l-​Fidi Tagħhom

Tistaʼ forsi timita l-​fidi u l-​azzjonijiet tal-​koppji li ssemmew f’dan l-​artiklu? Ftakar, huma għamlu l-​verità bħala l-​mod kif jgħixu ħajjithom. Żviluppaw f’uliedhom ix-​xewqa li jkunu pijunieri. Dan għamluh billi, kif jgħid Jan, “kienu taʼ eżempju fl-​imħabba għal Jehovah u l-​organizzazzjoni tiegħu, billi għamlu arranġamenti għal sħubija tajba, u billi għallmu lil uliedhom ikunu kapaċi jmantnu lilhom infushom.” Ukoll, huma ħadmu u lagħbu flimkien bħala familja. “Normalment, meta konna nkunu fuq btala,” jiftakar Pum, “il-​familja kollha kienet toħroġ fix-​xogħol taʼ l-​ippridkar fil-​għodu, u wara nofsinhar konna nirrilassaw flimkien.”

Dawn il-​Kristjani kienu wkoll jippjanaw bil-​quddiem, ħalli meta ċ-​ċirkustanzi tagħhom jinbidlu, kienu jkunu lesti biex jieħdu vantaġġ mis-​sitwazzjoni l-​ġdida tagħhom. Huma għamlu miri u ħadu deċiżjonijiet li għenuhom jilħqu l-​miri tagħhom iktar malajr. Raw kif jistgħu jaħdmu inqas sekularment u kienu lesti li jgħaddu b’inqas. (Filippin 1:​10) In-​nisa taw lil żwieġhom appoġġ sħiħ. Flimkien, kellhom xewqa qawwija biex jidħlu fil-​‘bieb kbir miftuħ fejn jistgħu jaħdmu’ u, bħala riżultat ikunu jistgħu jgawdu barkiet kbar mingħand Jehovah.​—1 Korintin 16:9; Proverbji 10:22.

Għandek inti wkoll xewqa biex tkabbar is-​sehem tiegħek fil-​ministeru? Jekk iva, jistaʼ jirnexxilek tagħmel dan propju billi tagħmel użu tajjeb minn ċirkustanzi differenti.

[Stampa f’paġna 20]

Pum u Anny jieħdu ħsieb is-​Sala taʼ l-​Assemblea

[Stampa f’paġna 20]

Jan u Woth jieħdu sehem fix-​xogħol taʼ l-​ippridkar

[Stampa f’paġna 21]

Dries u Jenny jaqdu f’Betel

[Stampa f’paġna 21]

Otto u Judy jippreparaw għaż-​żjara tal-​kongregazzjoni li jmiss