Il-​Valuri Spiritwali​—X’Se Jsir Minnhom?

“Ħmistax-il koppja jattendu laqgħa [Kattolika] fil-​għaxija li fiha jingħataw pariri lil dawk li jkunu se jiżżewġu. Mit-​30 persuna preżenti, 3 biss jgħidu li għandhom fidi.”

La Croix, gazzetta Kattolika Franċiża.

IL-​VALURI reliġjużi jinsabu fi kriżi. Fuq il-​faċċata tal-​ħarġa tat-​12 taʼ Lulju, 1999, taʼ l-​edizzjoni internazzjonali Newsweek, kien hemm il-​mistoqsija: “Huwa Alla mejjet?” It-​tweġiba tar-​rivista kienet li għall-​Ewropa tal-​punent jidher li dan hu l-​każ. F’rapport dwar is-​sinodu tal-​Knisja Kattolika li sar ġo Ruma f’Ottubru taʼ dik is-​sena, il-​gazzetta Franċiża Le Monde qalet: “Il-​Knisja qed issibha diffiċli iktar minn qatt qabel li twassal il-​messaġġ tagħha f’kultura li saret ‘allerġika’ għalih. . . . Fl-​Italja, il-​Kattoliċiżmu m’għadux daqshekk magħqud f’dak li jemmen u jipprattika. . . . Fil-​Ġermanja, il-​kwistjoni taċ-​ċentri għall-​pariri dwar l-​abort qed tkompli tkabbar il-​firda li hemm bejn il-​papa u d-​demokrazija li mhix lesta taċċetta stqarrijiet dittatorjali iktar. Xi osservaturi diġà qed jgħidu li l-​pożizzjoni riskjuża li ħadet [l-Olanda] dwar il-​morali u l-​ewtanasja hija riżultat taʼ li m’għadhomx jipprattikaw il-​valuri Kristjani.”

Is-sitwazzjoni hija l-​istess kważi kullimkien. Fl-​1999, l-​Arċisqof taʼ Canterbury, George Carey, wissa li l-​Knisja taʼ l-​Ingilterra kienet “ġenerazzjoni waħda ’l bogħod mill-​estinzjoni.” F’artiklu li jġib it-​titlu “It-​Tmiem taʼ l-​Ewropa Kristjana,” il-​gazzetta Franċiża Le Figaro qalet: “L-​istess qed jiġri kullimkien. . . . In-​nies għal darba wara l-​oħra qed jesprimu d-​dubji tagħhom dwar l-​opinjonijiet etiċi u duttrinali.”

Inqas Parteċipazzjoni Reliġjuża

Fl-​Ewropa, l-​attendenza fil-​knisja qed tonqos b’mod drastiku. Inqas minn 10 fil-​mija mill-​Kattoliċi Franċiżi jmorru l-​quddies kull nhar taʼ Ħadd, filwaqt li minn 3 sa 4 fil-​mija biss minn dawk li jgħixu f’Pariġi jmorru l-​knisja regolarment. Attendenza simili jew saħansitra inqas ġiet osservata fir-​Renju Unit, fil-​Ġermanja, u fil-​pajjiżi Skandinavi.

L-​awtoritajiet reliġjużi huma mħassbin serjament dwar in-​nuqqas taʼ vokazzjonijiet. F’inqas minn seklu, in-​numru taʼ qassisin fi Franza naqas b’mod drastiku, minn 14-il qassis kull 10,000 abitant għal inqas minn 1 kull 10,000 fi żmienna. Madwar l-​Ewropa, l-​età medja tal-​qassisin qed tiżdied, u saħansitra f’pajjiżi bħall-​Irlanda u l-​Belġju qed jiġi notat li n-​numru taʼ qassisin qed jonqos. Fl-​istess ħin, in-​numru taʼ tfal li jattendu l-​klassijiet tal-​katekiżmu qed jonqos, u dan qed iqajjem dubji serji dwar jekk il-​Knisja Kattolika għandhiex l-​abbiltà li ġġedded lilha nfisha.

Fejn tidħol ir-​reliġjon, il-​fiduċja donnha saret xi ħaġa tal-​passat. Sitta fil-​mija biss min-​nies Franċiżi jemmnu li “l-​verità tistaʼ tinstab biss f’reliġjon waħda,” imqabbla maʼ 15 fil-​mija fl-​1981 u maʼ 50 fil-​mija fl-​1952. L-​apatija reliġjuża qed tinfirex. Il-​persentaġġ taʼ nies li jgħidu li m’humiex membri t’ebda għaqda reliġjuża żdied minn 26 fil-​mija fl-​1980 għal 42 fil-​mija fis-​sena 2000.​—Les valeurs des Français​—Évolutions de 1980 à 2000 (Valuri Franċiżi​—L-​Iżvilupp mill-​1980 sa l-​2000).

Bidla Kbira fil-​Valuri Morali

Il-​kriżi fil-​valuri hija evidenti wkoll fil-​kwistjoni tal-​morali. Bħalma diġà ssemma, ħafna minn dawk li jattendu l-​knisja jirrifjutaw li jaċċettaw id-​digrieti morali tal-​knisja tagħhom. Huma ma jaqblux mal-​ħsieb li l-​mexxejja reliġjużi għandhom id-​dritt jistabbilixxu l-​livelli taʼ imġiba. L-​istess folol li japprovaw il-​waqfa tal-​papa fuq id-​drittijiet tal-​bniedem jirrifjutaw li jobduh meta kliemu jolqot il-​ħajjiet persunali tagħhom. Per eżempju, ħafna huma dawk li jinjoraw il-​waqfa tiegħu kontra l-​kontraċezzjoni, saħansitra ħafna koppji Kattoliċi.

Din l-​attitudni teffettwa kemm lin-​nies reliġjużi kif ukoll lil dawk li m’humiex, minn kull livell tas-​soċjetà. Prattiċi li huma kundannati b’mod ċar fl-​Iskrittura Mqaddsa huma tollerati. Għoxrin sena ilu, 45 fil-​mija miċ-​ċittadini Franċiżi ma kinux jittolleraw l-​omosesswalità. Illum, 80 fil-​mija jaċċettawha. Avolja l-​maġġuranza huma favur il-​fedeltà fiż-​żwieġ, 36 fil-​mija biss jikkundannaw relazzjonijiet barra ż-​żwieġ bħala li qatt ma jistgħu jkunu ġustifikati.​—Rumani 1:​26, 27; 1 Korintin 6:​9, 10; Lhud 13:4.

Balbuljata Reliġjuża

Fis-​soċjetà tal-​punent, kulħadd qed joħloq reliġjon għalih innifsu li fiha jassumi li għandu d-​dritt jagħżel x’jemmen u x’ma jemminx. Ċerti duttrini huma aċċettati, filwaqt li oħrajn jiġu mwarrbin. Xi wħud isejħu lilhom infushom Kristjani waqt li jemmnu fir-​riinkarnazzjoni, u oħrajn ma jsibuhiex bi tqila li jsegwu twemmin reliġjuż differenti fl-​istess ħin. (Koħèlet 9:​5, 10; Eżekjel 18:​4, 20; Mattew 7:21; Efesin 4:​5, 6) Il-​ktieb Les valeurs des Français wera biċ-​ċar li llum ħafna minn dawk li jemmnu qed jiżvijaw u qatt ma jerġgħu lura lejn il-​knisja.

Però, din ix-​xejra lejn iktar individwaliżmu reliġjuż m’hijiex mingħajr perikli. Jean Delumeau, studjuż taʼ l-​istorja reliġjuża u membru taʼ l-​Institut de France, jemmen li huwa impossibbli li wieħed jivvinta r-​reliġjon tiegħu stess li tkun indipendenti minn kwalunkwe sistema stabbilita. ‘Il-​fidi ma tistax tibqaʼ ħajja jekk ma jkollhiex l-​għeruq fis-​saħħa taʼ kredu speċifiku.’ Il-​valuri spiritwali f’lokhom u l-​prattiċi reliġjużi jridu jkunu fi qbil b’mod loġiku. Fejn jistaʼ jinsab qbil bħal dan fost dinja mifnija bil-​bidliet?

Fil-paġni tagħha, il-​Bibbja tfakkarna li huwa Alla li jistabbilixxi r-​regoli aċċettabbli taʼ kondotta u moralità, għalkemm iħalli lill-​bnedmin fil-​libertà li jagħżlu jekk jimxux fuqhom jew le. Miljuni madwar id-​dinja jirrikonoxxu li dan il-​ktieb li tant ilu stmat huwa taʼ valur prattiku llum u huwa bħal ‘fanal għal riġlejhom, u dawl fil-​mogħdija tagħhom.’ (Salm 119:105) Kif waslu għal din il-​konklużjoni? Dan se jiġi diskuss fl-​artiklu li jmiss.