Il-​Qima Vera Tgħaqqad Familja

MARIA kellha 13-il sena meta hi u oħtha ż-​żgħira, Lucy, semgħu dwar Jehovah mingħand xi ħadd li jiġi minnhom. Hu spjegalhom ukoll it-​tama taʼ Ġenna fuq l-​art. Tant qanqlilhom l-​interess li huma marru miegħu s-​Sala tas-​Saltna tax-​Xhieda taʼ Jehovah. Maria baqgħet impressjonata bit-​tagħlim ċar li ngħata hemmhekk. Kien differenti ħafna mill-​knisja, għax hemm ħlief ikantaw ma kinux! It-​tfal ma damux ma bdew jistudjaw il-​Bibbja maʼ waħda mix-​Xhieda taʼ Jehovah.

Ħuhom il-​kbir, Hugo, kien interessat fil-​filosofija u l-​evoluzzjoni. Kien jgħid li hu ateu. Imma waqt li kien fis-​servizz militari, hu qara l-​ktieb Life​—How Did It Get Here? By Evolution or by Creation? a Hu sab it-​tweġibiet għal mistoqsijiet li l-​ebda reliġjon oħra ma setgħet tagħtih. Meta spiċċa s-​servizz militari tiegħu, hu beda jsaħħaħ il-​fidi ġdida tiegħu f’Alla billi studja l-​Bibbja u attenda l-​laqgħat maʼ ħutu l-​bniet. Maria u Lucy tgħammdu fl-​1992, sentejn wara li semgħu bil-​verità għall-​ewwel darba, u ħuhom tgħammed sentejn warajhom.

Sadanittant il-​ġenituri tagħhom, li kienu devoti lejn tradizzjonijiet Kattoliċi, ftit li xejn urew interess fil-​verità. Lix-​Xhieda taʼ Jehovah kienu jarawhom fitti, għalkemm kienu jammiraw il-​manjieri tajbin u l-​ilbies modest tax-​Xhieda żgħażagħ li kienu jiġu d-​dar mat-​tfal tagħhom. Barra minn hekk, meta kienu joqogħdu bil-​qiegħda biex jieklu, it-​tfal kienu jirrakkontaw l-​affarijiet li jkunu tgħallmu fil-​laqgħat, u dan kien iqanqal il-​kurżità tal-​ġenituri tagħhom.

Madankollu, il-​ġenituri kienu t-​tnejn interessati fis-​seħer. Missierhom kien sakranazz u kien isawwat lil ommhom. Kienu kważi waslu biex jinfirdu. Imbagħad, il-​missier qattaʼ ħmistax fil-​ħabs minħabba kondotta ħażina waqt li kien fis-​sakra. Waqt li kien il-​ħabs, hu beda jaqra l-​Bibbja. X’ħin beda jaqra, hu nnota l-​kliem taʼ Ġesù rigward is-​sinjal taʼ l-​aħħar jiem. Dan qanqal ħafna mistoqsijiet f’moħħhom, u kemm il-​missier kif ukoll l-​omm marru s-​Sala tas-​Saltna u aċċettaw studju tal-​Bibbja fid-​dar. Meta bdew jitgħallmu l-​verità, huma qerdu l-​kotba kollha tagħhom dwar is-​seħer u sabu serħan minn attakki demoniċi billi sejħu l-​isem taʼ Jehovah. Bdew jagħmlu bidliet konsiderevoli fil-​personalitajiet tagħhom.

Tistaʼ timmaġina kif ħassewhom Maria u Lucy meta raw lill-​ġenituri tagħhom jiġu mgħammdin minn Hugo f’waħda mill-​konvenzjonijiet distrettwali fil-​Bolivja fl-​1999! Għaddew xi disaʼ snin mindu Maria u Lucy semgħu l-​ewwel darba dwar Jehovah u l-​wegħdi tiegħu. Huma, flimkien maʼ Hugo, issa qegħdin jaqdu fil-​ministeru full-time. Kemm huma ferħanin li l-​qima vera għaqqdet lill-​familja tagħhom!

[Nota taʼ taħt]