‘Reliġjon Vera’—Waħda Biss Hemm?
“SEWWASEW bħalma hemm Kristu wieħed, hekk ukoll jeżisti ġisem taʼ Kristu wieħed, għarusa taʼ Kristu waħda: ‘Knisja Kattolika u appostolika waħda.’”—Dominus Iesus.
Dan huwa kif il-kardinal Kattoliku Ruman, Joseph Ratzinger, enfasizza t-tagħlim tal-knisja tiegħu li jistaʼ jkun hemm biss reliġjon waħda vera. Din il-knisja, qal hu, hija “Knisja taʼ Kristu waħda, li hija l-Knisja Kattolika.”
“Mhux Reliġjonijiet fil-Veru Sens tal-Kelma”
Għalkemm il-Papa Ġwanni Pawlu II insista li d-dokument Dominus Iesus ma kien fih “ebda arroganza, jew diżrispett, lejn reliġjonijiet oħra,” mexxejja tal-knisja Protestanta rreaġixxew bl-ikrah. Per eżempju, fl-Assemblea Ġenerali tal-Presbiterjani f’Belfast, fl-Irlanda taʼ Fuq, f’Ġunju tas-sena 2001, ministru wieħed qal li dan id-dokument kien ix-xogħol taʼ “grupp li għandu ċerta saħħa fil-Knisja Kattolika Rumana . . . imwerwrin min-nuqqas taʼ preġudizzju li ntwera għall-ewwel darba fil-konċilju Vatikan II.”
Robin Eames, il-Prelat ewlieni tal-Knisja taʼ l-Irlanda, qal li kien se jkun “diżappuntat ħafna” jekk dan id-dokument kien “ritorn lejn il-mod taʼ kif il-Knisja Kattolika kienet taħsibha qabel il-Konċilju Vatikan II.” Meta kkummenta dwar l-istqarrija tal-Vatikan, li l-knejjes li ma jaċċettawx ċerti duttrini Kattoliċi “m’humiex knejjes fil-veru sens tal-kelma,” Eames qal: “Dan għalija jistaʼ jkun insult kbir.”
X’ġiegħel li jinkiteb id-Dominus Iesus? Jidher li l-Kurja Kattolika Rumana kienet inkwetata minħabba dak li ġie msejjaħ relattiviżmu reliġjuż. Skond The Irish Times, “il-bidu tat-teoloġija pluralista—li bażikament tgħid li r-reliġjonijiet kollha huma tajbin . . . beda jdejqu iktar u iktar lill-Kardinal Ratzinger.” Jidher li kienet din il-ħarsa li qanqlet il-kummenti tiegħu dwar knisja waħda vera.
Jagħmel Differenza X’Reliġjon Tħaddan?
M’għandniex xi ngħidu, għal xi wħud, ir-“relattiviżmu reliġjuż” jew it-“teoloġija pluralista” hija ħafna iktar raġunevoli u attraenti minn kwalunkwe suġġeriment li jistaʼ jkun hemm biss reliġjon waħda vera. Għalihom, ir-reliġjon għandha tkun sempliċement kwistjoni taʼ preferenza persunali. Huma jgħidu: ‘Fl-aħħar mill-aħħar, ma jimpurtax liema reliġjon tħaddan.’
Din forsi tidher li hi l-iktar ħarsa tolleranti—avolja wieħed mill-effetti tagħha kien li r-reliġjon inqasmet f’eluf taʼ denominazzjonijiet differenti. Ħafna jgħidu: ‘Din il-varjetà fir-reliġjon m’hi xejn ħlief espressjoni valida tal-libertà individwali.’ Madankollu, skond il-kittieb Steve Bruce, din “it-tolleranza reliġjuża” hija fil-fatt “indifferenza reliġjuża.”—A House Divided: Protestantism, Schism, and Secularization.
Allura, liema hija l-ħarsa t-tajba? Hemm biss reliġjon waħda vera? U hija l-Knisja Kattolika Rumana l-unika waħda tajba? Huma r-reliġjonijiet l-oħra aċċettabbli daqsha għal Alla? Ladarba dawn il-mistoqsijiet jinvolvu r-relazzjoni tagħna mal-Ħallieq, żgur li huwa importanti li nkunu nafu l-ħarsa tiegħu dwar dan. Kif nistgħu nagħmlu hekk? Billi nfittxu fil-Kelma ispirata t’Alla, il-Bibbja. (Atti 17:11; 2 Timotju 3:16, 17) Ejja nikkunsidraw dak li għandha x’tgħidilna dwar is-suġġett taʼ reliġjon waħda vera.
[Sors tal-Istampa f’paġna 2]
QOXRA: Mark Gibson/Index Stock Photography