L-​Isfida taʼ li Tħarreġ lit-​Tfal Illum

TARD fil-​għaxija, sid taʼ restorant qed iħejji biex jagħlaq il-​ħanut u jitlaq lejn id-​dar. F’ħin minnhom jidħlu żewġ nisa b’tifel u jordnaw ikla. Peress li jħossu għajjien mejjet, is-​sid għandu aptit jgħidilhom li r-​restorant magħluq, imma jiddeċiedi li jservihom xorta. Waqt li ż-​żewġ nisa jitkellmu u jieklu, it-​tifel joqgħod jiġri ’l hawn u ’l hemm fir-​restorant, iwaqqaʼ l-​gallettini fl-​art u jfarrakhom b’saqajh. Omm it-​tifel tiggostah minflok ma twaqqfu. Meta sa fl-​aħħar il-​klijenti jitilqu, is-​sid eżawrit ikollu jnaddaf il-​ħmieġ li ħallew warajhom.

Bħalma x’aktarx li taf, din is-​sitwazzjoni tiġri fir-​realtà u turi li f’ħafna familji, it-​taħriġ tat-​tfal m’huwiex sejjer tajjeb. Ir-​raġunijiet ivarjaw. Xi ġenituri permissivi jħallu lil uliedhom jagħmlu li jridu, għax jaħsbu li t-​tfal għandhom jitrabbew f’ambjent liberu. Jew inkella, għax tant kemm għandhom x’jagħmlu fil-​ħajja, xi ġenituri ma jwarrbux ħin biex jagħtu lil uliedhom l-​attenzjoni mill-​qrib u t-​taħriġ meħtieġ. Xi ġenituri jħossu li l-​edukazzjoni taʼ wliedhom hija l-​iktar ħaġa importanti, u allura jagħtu lil uliedhom libertà kważi bla limitu basta jġibu riżultati tajbin fl-​iskola u jidħlu f’università prestiġjuża.

Madankollu, xi wħud jgħidu li l-​valuri tal-​ġenituri u tas-​soċjetà in ġenerali jridu jitranġaw. Dawn jirraġunaw li t-​tfal qed jinvolvu ruħhom f’kull tip taʼ kriminalità u li l-​vjolenza fl-​iskola qed tiżdied minn jum għal jum. Għalhekk, surmast taʼ skola f’Seoul, fir-​Repubblika tal-​Korea, enfasizza li l-​prijorità għandha tkun li t-​tfal jiġu edukati biex itejbu l-​personalità tagħhom. Hu qal: “L-​għoti taʼ l-​għarfien jiġi wara li jkun ġie fformat karattru tajjeb.”

Ħafna ġenituri li jridu li wliedhom jidħlu l-​università u jirnexxu fil-​ħajja jagħlqu widnejhom għal dan il-​kliem taʼ twissija. Jekk int ġenitur, x’tip taʼ persuni tixtieq li jkunu wliedek? Adulti b’sens taʼ moralità u responsabbiltà? Uħud li jagħdru lil ħaddieħor, li jafu jaddattaw ruħhom, u li għandhom ħarsa pożittiva? Jekk iva, jekk jogħġbok ikkunsidra l-​artiklu li jmiss.