Tagħlim Veru—Fejn Tistaʼ Ssibu?

RAĠEL fit-​Tibet idawwar rota tat-​talb, tanbur tond bit-​talb miktub ġo fih. Hu jemmen li t-​talb tiegħu jiġi ripetut kull darba li jdawwar ir-​rota. F’dar spazjuża fl-​Indja, kamra żgħira tintuża għall-​puja​—qima li tistaʼ tinkludi l-​offerta taʼ inċens, fjuri, u affarijiet oħra lil xbihat taʼ diversi allat irġiel u nisa. Eluf taʼ mili ’l bogħod fl-​Italja, fi knisja mżejna b’mod elaborat mara tinżel għarkopptejha quddiem xbieha taʼ Marija, omm Ġesù, u titlob b’kuruna tar-​rużarju f’idha.

Forsi rajt b’għajnejk stess l-​influwenza li r-​reliġjon għandha fuq il-​ħajjiet tan-​nies. “Ir-​reliġjon . . . kellha u għad għandha rwol importanti fis-​soċjetajiet madwar id-​dinja,” jgħid il-​ktieb The World’s Religions​—Understanding the Living Faiths. Fil-​ktieb God​—A Brief History, l-​awtur John Bowker josserva: “Qatt ma kien hemm soċjetà umana fejn Alla ma kellux sehem fiha, ġeneralment sehem li jikkontrolla u joħloq. Dan huwa minnu anki f’dawk is-​soċjetajiet li għall-​ewwel jagħżlu li jkunu atei.”

Tabilħaqq, ir-​reliġjon influwenzat il-​ħajjiet taʼ miljuni taʼ persuni. M’hijiex din evidenza biżżejjed li l-​bnedmin għandhom ħtieġa u xewqa spiritwali? Fil-​ktieb tiegħu The Undiscovered Self, it-​Tabib Carl G. Jung, psikologu famuż, jirreferi għall-​bżonn tal-​bniedem li jqim xi qawwa iktar għolja u jgħid li “sinjali taʼ dan jistgħu jidhru tul l-​istorja umana.”

Madankollu, ħafna nies la jistqarru li jemmnu f’Alla u lanqas m’għandhom interess fir-​reliġjon. Xi wħud li jiddubitaw jew jiċħdu li Alla jeżisti jaħsbu hekk primarjament minħabba li r-​reliġjonijiet li huma familjari magħhom naqsu li jissodisfaw il-​bżonn spiritwali tagħhom. Ir-​reliġjon ġiet definita bħala “devozzjoni għal xi prinċipju; lealtà jew fedeltà stretta; xi ħaġa li għandha x’taqsam mal-​kuxjenza; affezzjoni jew rabta devota.” B’din id-​definizzjoni, kważi kulħadd juri xi tip taʼ devozzjoni reliġjuża f’ħajtu. Dan jinkludi wkoll lil dawk li huma atei.

Matul l-​eluf taʼ snin taʼ storja umana, l-​attentati tal-​bnedmin biex jissodisfaw il-​bżonn spiritwali tagħhom wassalhom biex jipprovaw ħafna forom taʼ qima. Ir-​riżultat hu d-​diversità enormi t’opinjonijiet reliġjużi li jinsabu madwar id-​dinja. Per eżempju, għalkemm kważi r-​reliġjonijiet kollha jemmnu f’xi qawwa iktar għolja, għandhom ideat differenti taʼ min hemm wara din il-​qawwa jew x’inhi. Il-​maġġuranza mir-​reliġjonijiet jenfasizzaw ukoll l-​importanza tas-​salvazzjoni jew il-​liberazzjoni. Imma t-​tagħlim tagħhom hu differenti fejn tidħol x’inhi s-​salvazzjoni u kif jiksbuha. Mill-​varjetà kbira taʼ reliġjonijiet, kif nistgħu nidentifikaw it-​tagħlim veru li jogħġob lil Alla?