Għandna Bżonn Messija?

GĦANDEK raġun jekk tistaqsi l-​mistoqsija, “Għandna bżonn Messija?” Iva, ikun raġunevoli li tistaqsi jekk Messija jistax tassew jeffettwak.

Xi wħud li għandek mnejn tirrispetta l-​opinjoni tagħhom jistgħu jiżgurawk li t-​tweġiba hi ċara u definita: Dażgur li għandek bżonn Messija, l-​istess bħalma kulħadd għandu bżonnu. Espert fil-​liġi Lhudija fl-​ewwel seklu kiteb dwar il-​Messija: “Il-​wegħdi kollha t’Alla, huma kemm huma, saru Iva permezz tiegħu.” Għalhekk, hu enfasizza l-​irwol importanti li għandu l-​Messija fl-​iskop tal-​Ħallieq tagħna biex ibierek lill-​ġnus kollha taʼ l-​art. (2 Korintin 1:20) Tant hu importanti l-​irwol tal-​Messija, li l-​wasla tiegħu u ħajtu fuq l-​art huma ċ-​ċentru tal-​profezija Biblika. Fi ktejjeb li ntuża minn miljuni taʼ nies f’dawn l-​aħħar 70 sena, Henry H. Halley qal b’ċertezza: “It-​Testment il-​Qadim inkiteb biex joħloq antiċipazzjoni, jew biex iwitti t-​triq, għall-​Miġja [tal-Messija].” Imma hija l-​Miġja tiegħu neċessarja? Għala għandha tinteressak?

Il-kelma “Messija” fil-​fatt tfisser “Midluk” u hija ekwivalenti għat-​terminu magħruf “Kristu.” Dan il-​Midluk, li l-​Encyclopædia Britannica, l-​Edizzjoni taʼ l-​1970, tirreferi għalih bħala l-​“akbar feddej,” kellu jiġi minħabba l-​għemejjel neqsin mir-​rispett taʼ l-​ewwel koppja umana, Adam u Eva. Huma nħolqu perfetti, bil-​prospett mill-​isbaħ taʼ ħajja taʼ dejjem f’Ġenna taʼ l-​art, imma dan il-​prospett tilfuh. Anġlu ribelluż, li sar magħruf bħala Satana x-​Xitan, issuġġerixxa li l-​Ħallieq tagħhom kien wisq restrittiv u li kien se jkun aħjar għalihom jekk jiddeċiedu għalihom infushom x’kien tajjeb u x’kien ħażin.—Ġenesi 3:​1-5.

Eva ġiet imqarrqa u emmnet dik il-​gidba. Adam, li milli jidher il-​kumpanija taʼ martu kienet iktar importanti għalih mil-​lealtà lejn Alla, sar kompliċi f’din ir-​ribelljoni mxewxa mix-​Xitan. (Ġenesi 3:6; 1 Timotju 2:14) Bl-​azzjonijiet tagħhom huma mhux biss tilfu prospett taʼ ħajja taʼ dejjem f’ġenna għalihom infushom. Huma għaddew lil nisilhom id-​dnub u l-​konsegwenza tiegħu, il-​mewt.—Rumani 5:12.

Il-Ħallieq tagħna, Ġeħova, mill-​ewwel iddetermina mezz kif ireġġaʼ lura l-​effetti ħżiena tas-​serje taʼ ġrajjiet li qajmet ir-​ribelljoni. Hu kien se jwettaq rikonċiljazzjoni permezz taʼ dak li iktar tard kien se jkun prinċipju legali fil-​Liġi Mosajka—tpattija ekwivalenti. (Dewteronomju 19:21; 1 Ġwanni 3:8) Dan il-​prinċipju legali ried jitwettaq jekk xi ħadd mid-​dixxendenti sfortunati taʼ Adam u Eva kellu xi darba jirċievi l-​ħajja taʼ dejjem f’art magħmula ġenna, bħalma kien l-​iskop tal-​Ħallieq għall-​familja umana. Dan iwassalna għall-​Messija.

Meta ta s-​sentenza lix-​Xitan, Alla Ġeħova ddikjara fl-​ewwel profezija tal-​Bibbja: “Jien inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Ġenesi 3:15) Wieħed studjuż tal-​Bibbja nnota li “l-​istorja tal-​wegħdi messjaniċi kif inhi preżentata fl-​Iskrittura tibda [b’din] l-​istqarrija.” Studjuż ieħor osserva li l-​Messija hu l-​għodda t’Alla li se “treġġaʼ lura l-​inkwiet kollu li ġab [id-dnub taʼ l-​ewwel koppja umana],” u li fl-​istess waqt se ġġib magħha barkiet lill-​bnedmin.—Ebrej 2:​14, 15.

Madankollu, għandek mnejn tħoss li lumanità bħalissa żgur mhix qed tiġi mbierka. Minflok, ir-​razza umana tinsab mgħaddsa fid-​disprament u n-​nuqqas taʼ tama. Għalhekk, The World Book Encyclopedia tgħid li “ħafna Lhud għadhom qed jistennew il-​miġja tal-​Messija” u li hu se “jikkoreġi l-​ħażen u jeqred l-​għedewwa tan-​nies.” Però, il-​Bibbja tgħid li l-​Messija diġà ġie. Għandna għalxiex nemmnu dak li tgħid il-​Bibbja? L-​artiklu li jmiss se jiddiskuti t-​tweġiba.