Bijografija

Nagħraf dak li Hu Tajjeb u Nagħmlu

KIF RAKKONTATA MINN HADYN SANDERSON

Ġesù darba qal lill-​appostli tiegħu: “Jekk tafu dan, henjin intom jekk tagħmluh.” (Ġwanni 13:17) Iva, nistgħu nkunu nafu x’inhu t-​tajjeb, iżda xi drabi, l-​isfida tkun li nagħmlu dan! Madankollu, issa li għandi iktar minn 80 sena, li 40 sena minnhom qattajthom fis-​servizz missjunarju, jien konvint li l-​kliem taʼ Ġesù huwa minnu. Meta tagħmel dak li jgħid Alla tassew iwassal għall-​hena. Ħalli nispjega.

FL-​1925, meta kelli tliet snin, il-​ġenituri tiegħi attendew taħdita bbażata fuq il-​Bibbja fi Newcastle, l-​Awstralja, il-​belt fejn konna noqogħdu. It-​taħdita, “Millions Now Living Will Never Die” (Miljuni li Qegħdin Jgħixu Issa Ma Se Jmutu Qatt), ikkonvinċiet lil ommi li hi kienet sabet il-​verità, u bdiet tattendi l-​laqgħat Kristjani regolarment. Iżda l-​interess taʼ missieri malajr naqas. Hu oġġezzjona għat-​twemmin ġdid t’ommi u heddidha li jitlaq jekk hi ma titlaqx dan it-​twemmin. Ommi kienet tħobbu lil missieri u riedet iżżomm il-​familja magħquda. Madankollu, hi kienet taf li l-​ubbidjenza lejn Alla kienet iżjed importanti, u kienet determinata li tagħmel dak li hu tajjeb f’għajnejh. (Mattew 10:​34-​39) Missieri telaqna, u minn dakinhar ’l hemm rajtu darba kultant biss.

Meta nħares lura, nammira l-​lealtà t’ommi lejn Alla. Id-​deċiżjoni tagħha wasslet għal ħajja mimlija barkiet spiritwali għalija u għal oħti l-​kbira, Beulah. Għallmitna wkoll lezzjoni importanti​—meta nafu x’inhu t-​tajjeb, għandna nistinkaw biex nagħmluh.

Provi tal-​Fidi

L-​Istudenti tal-​Bibbja, kif kienu jissejħu xXhieda taʼ Ġeħova, għamlu sforzi kbar biex jgħinu l-​familja tagħna. In-​nanna tiegħi ġiet toqgħod magħna u ħaddnet il-​verità tal-​Bibbja wkoll. Hi u ommi saru mseħbin inseparabbli fix-​xogħol taʼ l-​ippridkar, u kisbu r-​rispett tan-​nies permezz taʼ l-​apparenza dinjituża u l-​manjieri dħulin tagħhom.

Sadattant, aħwa Kristjani rġiel imdaħħlin fiż-​żmien ħadu ħsiebi u tawni taħriġ imprezzabbli. Malajr tgħallimt kif nuża l-​kard tat-​testimonjanza biex nagħmel preżentazzjonijiet sempliċi lin-​nies fid-​djar tagħhom. Ukoll kont nuża fonografu li setaʼ jinġarr biex insemmaʼ lin-​nies taħditiet Bibliċi rekordjati u ħadt sehem f’mixjiet bil-​kartelluni tul it-​toroq prinċipali tal-​belt. Dan kien diffiċli minħabba li kont nissielet mal-​biżaʼ mill-​bniedem. Madankollu jien kont naf x’inhu t-​tajjeb u kont determinat li nagħmlu.

Wara li spiċċajt l-​iskola bdejt naħdem ġo bank u minħabba f’hekk kelli nivvjaġġa lejn għadd taʼ friegħi tal-​bank fl-​istat taʼ New South Wales. Għalkemm ix-​Xhieda f’dawk l-​inħawi kienu ftit, it-​taħriġ tiegħi għenni nżomm il-​fidi tiegħi ħajja. Ommi kienet tiktibli ittri inkuraġġanti li saħħewni spiritwalment.

Dawn l-​ittri tawni l-​għajnuna fil-​ħin u fil-​waqt. It-​tieni gwerra dinjija kienet bdiet u jien inqbadt bil-​lieva. Il-​maniġer tal-​bank kien reliġjuż ferventi u kien kmandant militari tal-​lokal. Meta spjegajt dwar il-​waqfa newtrali tiegħi bħala Kristjan, hu tani l-​ultimatum​—nitlaq ir-​reliġjon tiegħi jew nitlaq mill-​bank! L-​affarijiet laħqu l-​quċċata meta mort fiċ-​ċentru lokali tar-​reklutaġġ taʼ l-​armata. Il-​maniġer kien preżenti u ħares b’interess kbir malli rsaqt lejn il-​mejda tar-​reġistrazzjoni. Meta rrifjutajt li niffirma l-​karti tar-​reklutaġġ, l-​uffiċjali ħaduha kontrija. Kien mument taʼ tensjoni, imma kont determinat li nagħmel dak li kien tajjeb. Bl-​għajnuna taʼ Ġeħova jien bqajt kalm u determinat. Meta wara sirt naf li xi bulijiet kienu qed ifittxuni, jien malajr ippakkjajt ħwejġi u tlaqt bil-​ferrovija li kien imiss ’il barra mill-​belt!

Wara li mort lura lejn Newcastle, tressaqt quddiem il-​qorti biex niġi interrogat flimkien maʼ sebaʼ aħwa rġiel oħra li rrifjutaw is-​servizz militari. L-​imħallef tana sentenza taʼ tliet xhur il-​ħabs, u kellna nagħmlu xogħol iebes. Għalkemm il-​ħabs kien esperjenza kerha, li nagħmel dak li hu tajjeb ġabli l-​barkiet. Wara li ġejna meħlusin, wieħed minn sħabi taċ-​ċella, li kien sieħbi fit-​twemmin, jismu Hilton Wilkinson, stidinni biex naħdem miegħu fl-​istudjo tar-​ritratti tiegħu. Hemmhekk iltqajt maʼ dik li kellha tkun marti fil-​futur, Melody, li kienet taħdem fl-​istudjo bħala receptionist. Ftit wara li nħlist, tgħammidt b’simbolu tad-​dedikazzjoni tiegħi lil Ġeħova.

Nagħmlu l-​Mira biex Nidħlu fis-​Servizz Full-Time

Wara li żżewwiġna, jien u Melody ftaħna l-​istudjo tagħna tar-​ritratti fi Newcastle. Ftit biss wara, tant kellna xogħol x’nagħmlu li dan effettwalna ħażin is-​saħħa u l-​ispiritwalità tagħna. Sadattant, Ted Jaracz, li dak iż-​żmien kien jaqdi fl-​uffiċċju tal-​fergħa tax-​Xhieda taʼ Ġeħova taʼ l-​Awstralja u li issa huwa membru tal-​Ġemgħa li Tiggverna, kellimna dwar il-​miri spiritwali tagħna. Wara dik id-​diskussjoni ddeċidejna li nbigħu n-​negozju tagħna u nissimplifikaw ħajjitna. Fl-​1954 xtrajna karavan u morna noqogħdu fil-​belt taʼ Ballarat fl-​istat taʼ Victoria u bdejna naqdu bħala pijunieri, jew evanġelizzaturi full-time.

Matul il-​ħidma tagħna fil-​kongregazzjoni żgħira f’Ballarat, Ġeħova bierek l-​isforzi tagħna. Fi żmien sena u nofs l-​għadd taʼ nies li jattendu l-​laqgħat telaʼ minn 17 għal 70. Imbagħad irċivejna stedina biex nibdew il-​ministeru taʼ l-​ivvjaġġar fl-​istat taʼ South Australia. Għat-​tliet snin li kien imiss, aħna kellna l-​inkarigu pjaċevoli li nżuru l-​kongregazzjonijiet fil-​belt t’Adelaide u fir-​reġjuni tul ix-​Xmara Murray, fejn jipproduċu l-​inbid u l-​frott taċ-​ċitru. Kemm kienet inbidlet ħajjitna! Konna ferħanin naqdu flimkien maʼ ħutna rġiel u nisa kollhom imħabba. Xi ħlas kellna talli għamilna dak li hu tajjeb!

Inkarigu Missjunarju

Fl-​1958 avżajna l-​uffiċċju tal-​fergħa taʼ lAwstralja bl-​intenzjoni tagħna li nattendu l-​Assemblea Internazzjonali “Divine Will” (Rieda Divina) fil-​Belt taʼ New York iktar tard dik is-​sena. Huma wiġbuna billi bagħtulna formoli taʼ l-​applikazzjoni għall-​iskola missjunarja taʼ Gilgħad fl-​Istati Uniti. Peress li kellna ’l fuq minn tletin sena aħna ħsibna li konna kbar iżżejjed biex nattendu l-​iskola taʼ Gilgħad. Madankollu, aħna bagħatna l-​applikazzjonijiet u ġejna mistidnin nattendu t-​32 klassi. F’nofs il-​kors irċivejna l-​inkarigu missjunarju tagħna​—l-​Indja! Minkejja li fil-​bidu konna xi ftit beżgħana, aħna ridna nagħmlu dak li hu tajjeb, u bil-​ferħ aċċettajna l-​inkarigu tagħna.

Kmieni darba fil-​għodu fl-​1959 wara li vvjaġġajna bil-​vapur, wasalna Bombay (issa Mumbai). Mijiet taʼ ħaddiema reqdin kienu mimdudin tul ix-​xatt. Fl-​arja kien hemm irwejjaħ li ma kinux familjari. Meta telgħet ix-​xemx ħadna idea taʼ x’kien qed jistenniena. Qatt ma konna esperjenzajna sħana bħal din! Koppja missjunarja, Lynton u Jenny Dower, li kienu qdew bħala pijunieri flimkien magħna f’Ballarat, tawna merħba. Huma ħaduna l-​uffiċċju tal-​fergħa taʼ l-​Indja u d-​Dar taʼ Betel li kienu jikkonsistu f’appartament żgħir li jinsab viċin iċ-​ċentru tal-​belt. Kien hemm sitt ħaddiema volontieri joqogħdu f’Betel. Ħuna Edwin Skinner, li kien qeda bħala missjunarju fl-​Indja sa mill-​1926, issuġġerielna li nixtru żewġ bagalji taʼ l-​ivvjaġġar tal-​kanvas qabel ma mmorru għall-​inkarigu tagħna. Il-​bagalji kienu adattati peress li dawk li kienu jivvjaġġaw kienu jġorru kull xorta t’oġġetti fihom. Kont tarahom spiss fuq il-​ferroviji Indjani u kienu utli ħafna matul l-​ivvjaġġar tagħna li konna se nagħmlu.

Wara jumejn nivvjaġġaw bil-​ferrovija wasalna għall-​inkarigu tagħna f’Tiruchchirappalli, belt fl-​istat tan-​nofsinhar taʼ Madras (issa Tamil Nadu). Hemmhekk ngħaqadna maʼ tliet pijunieri speċjali Indjani li kienu qed jagħtu xiehda lil popolazzjoni taʼ 250,000 ruħ. Il-​kundizzjonijiet taʼ l-​għajxien kienu bażiċi. Darba minnhom kellna inqas minn erbaʼ dollari fil-​but. Iżda meta dawk il-​flus spiċċaw, Ġeħova ma nsiniex. Persuna li kienet tistudja l-​Bibbja silfitna l-​flus ħalli nikru dar adattata biex nagħmlu l-​laqgħat fiha. Darba minnhom meta konna neqsin mill-​ikel, wieħed ġâr ġabilna ftit ikel bil-​curry. Lili għoġobni, imma tant kien jaħraq bil-​ħwawar li qabadni s-​sulluzzu!

Fil-​Ministeru taʼ l-​Għalqa

Għalkemm xi ftit nies f’Tiruchchirappalli kienu jitkellmu bl-​Ingliż, il-​maġġuranza kienu jitkellmu bit-​Tamil. Għalhekk, aħna ħdimna iebes biex nitgħallmu preżentazzjoni sempliċi għall-​ministeru taʼ l-​għalqa f’dik il-​lingwa. B’hekk ksibna r-​rispett taʼ ħafna nies tal-​lokal.

Konna nieħdu pjaċir ferm fil-​ministeru minn dar għal dar. L-​Indjani huma nies ospitabbli u ħafna kienu jistidnuna ġewwa għal xi xarba kiesħa. Peress li t-​temperatura spiss kienet tilħaq l-​40 grad Celsius, konna napprezzaw ferm l-​ospitalità tagħhom. Għan-​nies kien normali li qabel ma nippreżentaw il-​messaġġ jitkellmu magħna dwar affarijiet persunali. L-​inkwilini spiss kienu jistaqsu lili u lil marti: “Minfejn intom? Għandkom tfal? Għaliex le?” Malli ngħidulhom li m’għandniex tfal, normalment kienu jirreferuna għal tabib tajjeb! Minkejja dan, dawn il-​konversazzjonijiet ippermettewlna li nintroduċu lilna nfusna u nispjegaw l-​importanza tax-​xogħol tagħna li ngħallmu lin-​nies dwar il-​Bibbja.

Ħafna nies li konna nagħtuhom xiehda kienu jappartjenu lir-​reliġjon tal-​Ħindu​—sistema taʼ twemmin differenti ħafna mill-​Kristjanità. Minflok ma niddibattu fuq komplessitajiet tal-​filosofija tal-​Ħindu, aħna sempliċement ippridkajna dwar l-​aħbar tajba tas-​Saltna t’Alla​—u b’riżultati tajbin. Fi żmien sitt xhur kważi 20 persuna bdew jattendu l-​laqgħat fid-​dar missjunarja tagħna. Wieħed minn dawn l-​individwi kien inġinier ċivili jismu Nallathambi. Hu u ibnu Vijayalayan iktar tard għenu lil madwar 50 persuna jsiru qaddejja taʼ Ġeħova. Vijayalayan ukoll qeda għal xi żmien fil-​fergħa taʼ l-​Indja.

Iktar Ivvjaġġar

Konna ilna inqas minn sitt xhur l-​Indja meta ġejt mistieden naqdi bħala l-​ewwel indokratur tad-​distrett taʼ dak il-​pajjiż b’mod permanenti. Dan kien jinvolvi vvjaġġar madwar l-​Indja, organizzar t’assembleat u ħidma flimkien maʼ gruppi b’disaʼ lingwi differenti. Dan kien xogħol iebes. Ippakkjajna xi ħwejjeġ u tagħmir għal sitt xhur fi tliet bagolli tal-​landa u fil-​bagalji tal-​kanvas tajbin li kellna u tlaqna minn Madras (issa Chennai) bil-​ferrovija. Peress li t-​territorju tad-​distrett kellu dawra taʼ madwar 6,500 kilometru, aħna konna nivvjaġġaw minn post għall-​ieħor il-​ħin kollu. F’okkażjoni minnhom temmejna assemblea l-​Ħadd fil-​belt taʼ Bangalore, lejn in-​naħa tan-​nofsinhar. Imbagħad ivvjaġġajna lejn it-​tramuntana għal Darjeeling, taħt il-​muntanji tal-​Himalayas, biex naqdu f’assemblea oħra l-​ġimgħa taʼ wara. Il-​vjaġġ lejn Darjeeling kien taʼ madwar 2,700 kilometru u aħna u sejrin bdilna l-​ferrovija ħames darbiet.

Matul il-​vjaġġi bikrin tagħna konna nieħdu pjaċir nuru l-​film The New World Society in Action (Is-Soċjetà tad-​Dinja l-​Ġdida fl-​Azzjoni). Permezz taʼ dan il-​film, in-​nies saru familjari maʼ l-​iskop u l-​attività taʼ l-​organizzazzjoni taʼ Ġeħova fuq l-​art. Spiss, mijiet taʼ nies kienu jattendu dawn it-​turijiet. F’okkażjoni waħda ppreżentajna l-​film lil grupp li nġabar f’ġenb taʼ triq. Waqt li kien għaddej il-​film, sħab iswed beda jinġemaʼ u jersaq fuqna b’ħeffa kbira. Peress li darba minnhom kien hemm folla taʼ nies li rvellat minħabba li l-​film ġie interrott, jien iddeċidejt li nkompli nurih iżda b’ritmu mgħaġġel. Fortunatament, il-​film spiċċa mingħajr ebda interruzzjoni maʼ l-​ewwel qtar tax-​xita.

Fis-snin taʼ wara, jien u Melody ivvjaġġajna lejn ħafna mill-​partijiet taʼ l-​Indja. Peress li kull reġjun għandu l-​ikel, l-​ilbies, il-​lingwa, u x-​xenarji uniċi tiegħu, kien bħallikieku qed nivvjaġġaw minn pajjiż għall-​ieħor. X’varjetà meraviljuża nsibu fil-​ħolqien taʼ Ġeħova! Dan huwa minnu wkoll fejn jidħlu l-​annimali salvaġġi taʼ l-​Indja. Darba, waqt li konna qed nikkampjaw fil-​ġungla Nepaliża, stajna naraw sew tigra enormi. Kien annimal mill-​isbaħ. Il-​fatt li rajnieha saħħilna x-​xewqa tagħna li nkunu fil-​Ġenna taʼ l-​art, fejn, finalment se jkun hemm il-​paċi bejn in-​nies u l-​annimali.

Titjib fl-​Organizzazzjoni

F’dawk iż-​żminijiet bikrin, l-​aħwa kellhom bżonn li jsegwu iktar l-​arranġamenti organizzazzjonali taʼ Ġeħova. F’xi kongregazzjonijiet, l-​aħwa rġiel kienu jpoġġu fuq naħa waħda tal-​kamra fejn kien ikun hemm il-​laqgħa, waqt li n-​nisa kienu jpoġġu fuq in-​naħa l-​oħra. Il-​laqgħat rari kienu jibdew fil-​ħin. F’post minnhom, il-​pubblikaturi tas-​Saltna kienu jinġabru għal-​laqgħat mad-​daqq qawwi taʼ qanpiena. F’postijiet oħra, xi pubblikaturi kienu jidħlu għal-​laqgħa meta x-​xemx tkun laħqet ċerta pożizzjoni fis-​sema. L-​assembleat u ż-​żjajjar taʼ l-​indokraturi li jivvjaġġaw ma kinux regulari. L-​aħwa kienu lesti li jagħmlu dak li hu tajjeb, iżda kellhom bżonn it-​taħriġ.

Fl-1959, l-​organizzazzjoni taʼ Ġeħova stabbiliet l-​Iskola tal-​Ministeru tas-​Saltna. Dan il-​programm taʼ taħriġ li jsir mad-​dinja kollha għen lill-​indokraturi tas-​circuit, pijunieri speċjali, missjunarji, u l-​anzjani tal-​kongregazzjoni biex iwettqu r-​responsabbiltajiet Skritturali b’mod iktar effettiv. Meta bdiet l-​iskola fl-​Indja, f’Diċembru taʼ l-​1961, jien qdejt bħala għalliem tal-​klassi. Bil-​mod il-​mod, ir-​riżultati taʼ dan it-​taħriġ daħlu fil-​kongregazzjonijiet tal-​pajjiż, u bdew mexjin ’il quddiem malajr. Ladarba l-​aħwa kienu jafu x’inhu t-​tajjeb, l-​ispirtu t’Alla kien jimmotivahom biex jagħmluh.

Konvenzjonijiet kbar ukoll inkuraġġew u għaqqdu lill-​aħwa. Waħda li tispikka kienet l-​Assemblea Internazzjonali “Everlasting Good News” (L-Aħbar Tajba taʼ Dejjem) li saret fi New Delhi fl-​1963. Xi Xhieda minn madwar l-​Indja vvjaġġaw eluf taʼ kilometri biex jattendu din l-​assemblea, u ħafna nefqu kulma kellhom biex jagħmlu dan. Peress li 583 delegat minn 27 pajjiż ieħor kienu preżenti wkoll, kienet l-​ewwel darba li x-​Xhieda fl-​Indja setgħu jiltaqgħu u jassoċjaw m’għadd kbir t’aħwa li kienu qegħdin iżuruhom.

Fl-1961, jien u Melody ġejna mistidnin biex ningħaqdu mal-​familja taʼ Betel f’Bombay, fejn iktar tard qdejt bħala membru tal-​Kumitat tal-​Fergħa. Wara dan kelli iktar inkarigi. Għal ħafna snin qdejt bħala indokratur taż-​żona f’partijiet mill-​Asja u l-​Lvant Nofsani. Minħabba li x-​xogħol taʼ l-​ippridkar kien projbit f’ħafna minn dawn il-​pajjiżi, il-​pubblikaturi taʼ dawn il-​pajjiżi kellhom bżonn ikunu “għaqlin bħas-​sriep iżda innoċenti bħall-​ħamiem.”​—Mattew 10:16.

Tkabbir u Bidliet

Fl-​1959, meta ġejna l-​Indja, kien hemm 1,514-il pubblikatur attiv fil-​pajjiż. Illum dan in-​numru żdied għal iktar minn 24,000. Biex nieħdu ħsieb dan it-​tkabbir, iċċaqlaqna darbtejn f’bini ġdid taʼ Betel ġewwa jew qrib taʼ Bombay. Imbagħad f’Marzu taʼ l-​2002, il-​familja taʼ Betel reġgħet iċċaqalqet​—din id-​darba f’kumpless ġdid mibni viċin Bangalore fin-​nofsinhar taʼ l-​Indja. Din il-​faċilità moderna bħalissa tilqaʼ 240 membru taʼ Betel u wħud minn dawn il-​membri bħalissa jittraduċu letteratura f’20 lingwa differenti.

Għalkemm jien u Melody konna qegħdin inħarsu ’l quddiem bil-​ħerqa biex immorru f’Bangalore, is-​saħħa fiżika dgħajfa ġagħlitna nirritornaw lejn l-​Awstralja fl-​1999. Issa qed naqdu bħala membri tal-​familja taʼ Betel f’Sydney. Minkejja li tlaqna mill-​Indja, l-​imħabba li għandna lejn il-​ħbieb għeżież tagħna u lejn dawk li għenna biex jitgħallmu dwar il-​verità f’dik l-​art, tibqaʼ qawwija. Kemm nieħdu gost meta nirċievu xi ittra mingħandhom!

Meta nħarsu lura lejn dawn il-​50 sena u iktar taʼ servizz full-time, jien u Melody inħossuna mberkin bil-​kbir. Xi darba konna naħdmu biex nippreservaw ir-​ritratti tan-​nies permezz tal-​fotografija, iżda l-​ħidma biex nippreservaw lin-​nies ħajjin fil-​memorja t’Alla kienet deċiżjoni ferm aħjar. X’esperjenzi prezzjużi rriżultaw mid-​deċiżjoni tagħna li npoġġu ’l Alla l-​ewwel f’ħajjitna! Iva, li nagħmlu dak li Alla jgħid li hu tajjeb verament iwassal għall-​hena!

[Mappep f’paġna 15]

(Għall-formazzjoni sħiħa tat-test, ara pubblikazzjoni)

L-​INDJA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Stampi f’paġna 13]

Hadyn u Melody fl-​1942

[Stampa f’paġna 16]

Il-​familja taʼ Betel fl-​Indja, 1975