Meta Teżerċita l-​Awtorità, Imita lill-​Kristu

XI SNIN ilu, esperiment fuq l-​imġiba umana ħareġ riżultati interessanti. Dawk li ħadu sehem ġew imqassmin f’żewġ gruppi. Il-​membri taʼ grupp wieħed ġew inkarigati jkunu gwardjani u kellhom jgħassu fuq il-​grupp l-​ieħor, li ġew inkarigati jkunu ħabsin. X’ġara?

“Wara ftit jiem,” ġie rapportat, “il-​maġġuranza [mill-gwardjani] bdew jabbużaw mill-​ħabsin u jintimidawhom, u jimponu fuqhom ħafna kastigi, filwaqt li l-​ħabsin bdew jiġu sforzati jissottomettu ruħhom u jagħmlu kulma jordnawlhom.” Il-​konklużjoni li waslu għaliha r-​riċerkaturi kienet din: Kważi kulħadd jistaʼ jaqaʼ fin-​nassa li juża ħażin l-​awtorità li jkollu.

Użu Ħażin u Tajjeb taʼ l-​Awtorità

M’għandniex xi ngħidu, meta l-​awtorità tintuża tajjeb tistaʼ ġġib influwenza pożittiva. Tistaʼ tipprovdi direzzjoni adattata u tistaʼ tirriżulta f’benefiċċji fiżiċi, emozzjonali, u spiritwali. (Proverbji 1:5; Isaija 48:​17, 18) Però, bħalma wera l-​esperiment li semmejna qabel, hemm periklu kontinwu li min ikollu l-​awtorità ma jibqax jeżerċitaha b’mod raġunevoli. Il-​Bibbja tiġbed l-​attenzjoni lejn dan il-​periklu u tgħid: “Meta jaħkmu l-​ħżiena, il-​poplu jitniehed.”—Proverbji 29:2; Koħèlet 8:9.

Meta xi ħadd jabbuża mill-​awtorità tiegħu jagħmel il-​ħsara, anki jekk jagħmel dan b’motiv tajjeb. Per eżempju, dan l-​aħħar, fratellanza reliġjuża u edukattiva fl-​Irlanda talbet maħfra lill-​pubbliku għall-​mod kif ċertu għalliema abbużaw mill-​awtorità tagħhom fuq tfal li ġew fdati f’idejhom. Żgur li l-​objettivi taʼ ħafna minn dawn l-​għalliema kienu nobbli, imma l-​metodi użati minn xi wħud minnhom għamlu ħsara kbira. Gazzetta waħda rrapportat li “ħafna tfal [ġarrbu] ħsara b’xi mod jew ieħor mill-​vjolenza eċċessiva u l-​mod aħrax li bih ittrattawhom ħafna mill-​għalliema reliġjużi taʼ din il-​fratellanza.” (The Irish Times) Imma allura, kif tistaʼ teżerċita l-​awtorità b’tali mod li tgħin lill-​oħrajn jagħtu l-​aqwa tagħhom minflok ma tirrabjahom u tweġġagħhom minħabba dak li tgħid jew tagħmel?—Proverbji 12:18.

“Kull Awtorità” Ngħatat lil Ġesù Kristu

Ikkunsidra l-​eżempju taʼ Ġesù Kristu. Ftit qabel ma telaʼ s-​sema, hu qal lid-​dixxipli tiegħu: “Lili ngħatat kull awtorità fis-​sema u fuq l-​art.” (Mattew 28:18) Beżżagħhom b’xi mod dan il-​kliem lid-​dixxipli? Ħassew huma li issa Ġesù kien se juri l-​istess attitudni taʼ l-​Imperaturi Rumani li kienu magħrufa għall-​qawwa li jużaw biex ikissru lil min jirribella jew jipprotesta?

Ir-​rakkont imniżżel fil-​Bibbja jwieġeb ċar u tond: Le! Ġesù Kristu jeżerċita l-​awtorità bl-​istess mod bħalma jagħmel Missieru. Għalkemm Ġeħova bi dritt hu s-​Sovran Universali li jistaʼ kollox, hu jixtieq li s-​sudditi tiegħu jaqduh mill-​qalb u ma jixtiqhomx jobduh bla raġuni, bil-​biżaʼ, jew bħala lsiera. (Mattew 22:37) Ġeħova qatt ma jabbuża mill-​awtorità tiegħu. Dan nistgħu narawh mill-​viżjoni drammatika li ra l-​profeta Eżekjel.

F’din il-​viżjoni, Eżekjel ra erbaʼ ħlejjaq anġeliċi li appoġġaw is-​sovranità t’Alla. Kull waħda minnhom kellha erbaʼ wċuħ. Eżekjel kiteb: “Ix-​xbieha taʼ wiċċhom kienet wiċċ taʼ bniedem minn quddiem, u wiċċ taʼ ljun fuq il-​lemin tagħhom l-​erbgħa, u wiċċ taʼ għoġol fuq ix-​xellug tagħhom l-​erbgħa, u wiċċ taʼ ajkla fuq wara.” (Eżekjel 1:10) Dawn l-​erbaʼ wċuħ jirrappreżentaw l-​erbaʼ kwalitajiet kardinali, jew attributi, t’Alla li huma bilanċjati perfettament. Dawn huma identifikati fil-​Kelma t’Alla bħala: l-​imħabba, rappreżentata mill-​wiċċ taʼ bniedem; il-​ġustizzja, rappreżentata mill-​wiċċ taʼ ljun; u l-​għerf, rappreżentat mill-​wiċċ t’ajkla. Dawn it-​tliet attributi jaħdmu flimkien mar-​rabaʼ waħda—il-​qawwa, kif murija mill-​wiċċ t’għoġol. Xi jfisser dan kollu? Din il-​viżjoni turi li Ġeħova qatt ma jeżerċita l-​qawwa u l-​awtorità bla limitu tiegħu b’tali mod li ma jkunx fi qbil mal-​kwalitajiet kardinali l-​oħrajn li għandu.

Peress li imita lil Missieru, Ġesù Kristu dejjem uża l-​awtorità tiegħu b’tali mod li kienet perfettament fi qbil maʼ l-​imħabba, l-​għerf, u l-​ġustizzja. Id-​dixxipli tiegħu ħassew serħan kbir meta qdew taħt l-​awtorità taʼ Ġesù. (Mattew 11:​28-30) Kieku kellu jkun hemm kwalità li tiddeskrivi kemm lil Alla Ġeħova u kemm lil Ġesù Kristu, din hi l-​imħabba, mhux il-​qawwa jew l-​awtorità!—1 Korintin 13:13; 1 Ġwanni 4:8.

Int Kif Teżerċita l-​Awtorità?

Int kif sejjer f’dan l-​aspett? Per eżempju, fil-​familja, tikkontrolla int l-​affarijiet sforz l-​awtorità li għandek anki meta jkun ifisser li tinsisti fuq ix-​xewqat spontanji jew il-​preferenzi tiegħek? L-​oħrajn fil-​familja tiegħek jimxu skond id-​deċiżjonijiet tiegħek għax jibżgħu minnek jew għax iħobbuk? Huwa minħabba li għandek qawwa superjuri li l-​familja tiegħek tobdik? Dawn huma mistoqsijiet li l-​kapijiet tal-​familja jagħmlu tajjeb li jikkunsidrawhom sabiex ikunu jistgħu jżommu l-​ordni teokratiku fl-​arranġament tal-​familja.—1 Korintin 11:3.

Xi ngħidu dwar jekk għandek ċertu awtorità fil-​kongregazzjoni Kristjana? Biex tiċċekkja jekk intix qed teżerċitaha kif suppost, staqsi lilek innifsek jekk intix tapplika l-​prinċipji ispirati minn Alla Ġeħova u li Ġesù Kristu tana eżempju tagħhom.

“Ilsir tal-​Mulej . . . għandu jkun ġentili maʼ kulħadd, . . . iżomm ruħu mrażżan quddiem il-​ħażen, jistruwixxi bil-​ħlewwa lil dawk li ma jurux attitudni favorevoli.”—2 Timotju 2:​24, 25.

Xi individwi fil-​kongregazzjoni Kristjana tal-​bidu kellhom awtorità kbira. Per eżempju, Timotju saħansitra setaʼ ‘jordna lil ċerti wħud biex ma jgħallmux duttrina differenti.’ (1 Timotju 1:3) Però, nistgħu nkunu ċerti li Timotju rrifletta l-​kwalitajiet t’Alla f’dak kollu li għamel, għaliex hu żgur li aġixxa fi qbil mal-​parir taʼ Pawlu biex jgħallem “bil-​ħlewwa” u jkun “ġentili maʼ kulħadd” meta ġie inkarigat biex jindokra l-​kongregazzjoni Kristjana. Peress li hu nnifsu kien għadu relattivament żgħir, kellu jaġixxi bħala iben li juri rispett lejn dawk akbar minnu u bħala wieħed li jieħu ħsieb lil ħutu iżgħar minnu. (1 Timotju 5:​1, 2) Meta l-​kongregazzjoni titmexxa b’dan l-​interess ġenwin u bl-​imħabba, se tirrifletti l-​attitudni kollha affezzjoni taʼ familja maħbuba, mhux taʼ xi kumpanija li m’għandha ebda interess fis-​sentimenti u l-​interessi tal-​ħaddiema.—1 Korintin 4:14; 1 Tessalonikin 2:​7, 8.

“Il-​ħakkiema tal-​ġnus jiddominawhom u l-​kbarat għandhom awtorità fuqhom. Dan m’għandux ikun fostkom; imma kulmin irid isir kbir fostkom irid ikun il-​qaddej tagħkom.”—Mattew 20:​25, 26.

Id-dittaturi tad-​dinja ‘jiddominaw’ lil oħrajn billi jimponu dak li jridu huma u jinsistu li l-​oħrajn jagħmlu l-​affarijiet b’ċertu mod, u jheddu li jikkastigawhom jekk ma jobdux. Madankollu, Ġesù Kristu enfasizza li għandna naqdu lil oħrajn u mhux nagħmlulhom pressjoni. (Mattew 20:​27, 28) Hu dejjem ittratta lid-​dixxipli tiegħu b’qalb tajba u bi mħabba. Meta ssegwi l-​eżempju taʼ Ġesù, ikun ħafna iktar faċli għal oħrajn biex jikkooperaw miegħek. (Ebrej 13:​7, 17) Ukoll, tagħmilhielhom ħafna iktar faċli biex jissottomettu ruħhom għall-​awtorità tiegħek u saħansitra jagħmlu iktar milli titlobhom jekk ikunu jistgħu, u dan jagħmluh minn qalbhom u mhux minħabba li tkun sforzajthom b’xi mod.—Mattew 5:41.

“Irgħu l-​merħla t’Alla li hemm fil-​ħarsien tagħkom, mhux . . . billi tiddominaw fuq dawk li huma l-​wirt t’Alla, imma billi ssiru eżempji għall-​merħla.”—1 Pietru 5:​2, 3.

L-indokraturi llum jirrealizzaw li huma jridu jagħtu kont lil Alla għas-​saħħa spiritwali taʼ kull membru fil-​kongregazzjoni. Huma jieħdu din ir-​responsabbiltà bis-​serjetà. Huma jistinkaw biex jieħdu ħsieb il-​merħla t’Alla minn qalbhom, bil-​ħerqa, u bl-​imħabba. Bħall-​appostlu Pawlu, huma jaħdmu iebes biex jibnu u jsaħħu l-​fidi taʼ dawk li huma fil-​ħarsien tagħhom, mhux jaġixxu bħala sidien tal-​fidi tagħhom.—2 Korintin 1:24.

Meta jkun hemm bżonn li jingħata parir xieraq, l-​anzjani jagħtuh bil-​ħlewwa sabiex jaġġustaw lil dak li jkun qed jiżbalja jew biex jgħinu lil xi sieħeb Kristjan jagħmel progress spiritwali. Huma jżommu f’moħħhom it-​tfakkira taʼ l-​appostlu Pawlu: “Ħuti, anki jekk bniedem jagħmel xi pass falz qabel ma jinduna, intom li għandkom kwalifiki spiritwali ipprovaw aġġustawh mill-​ġdid bi spirtu taʼ ħlewwa, waqt li kull wieħed minnkom joqgħod attent għalih innifsu, minħabba l-​biżaʼ li hu wkoll jiġi ttantat.”—Galatin 6:1; Ebrej 6:​1, 9-12.

“Komplu issaportu lil xulxin u aħfru lil xulxin mill-​qalb . . . Ilbsu l-​imħabba, għax hi rabta perfetta li tgħaqqad.”—Kolossin 3:​13, 14.

Kif tittratta lil dawk li forsi ma jirnexxilhomx iżommu perfettament mal-​livelli Kristjani? Tagħraf u tikkunsidra l-​kaġun taʼ l-​imperfezzjonijiet tagħhom, bħalma jagħmlu Ġeħova u Ġesù Kristu? (Isaija 42:​2-4) Jew tinsisti li għandhom japplikaw il-​liġi t’Alla sa l-​inqas dettall f’kull każ? (Salm 130:3) Ftakar li huwa xieraq li turi l-​ġentilezza kulmeta hu possibbli u turi s-​sodizza biss meta jkun hemm bżonn. Jekk taġixxi bl-​imħabba se tgħin biex jiġu fformati rabtiet qawwija taʼ fiduċja miż-​żewġ naħat, bejnek u bejn dawk li fuqhom teżerċita l-​awtorità.

Jekk tiġi fdat bi kwalunkwe tip t’awtorità, aħdem iebes biex timita lil Alla Ġeħova u Ġesù Kristu meta teżerċitaha. Ftakar fid-​deskrizzjoni meraviljuża li ta s-​salmista meta tkellem dwar il-​mod li bih Ġeħova jeżerċita l-​awtorità li għandu fuq il-​poplu tiegħu. David għanna: “Il-​Mulej hu r-​ragħaj tiegħi, xejn ma jonqosni; f’mergħat kollha ħdura jqegħedni. Ħdejn l-​ilma, fejn nistrieħ, jeħodni; hemm hu jrejjaqni. Imexxini fit-​triq tas-​sewwa minħabba l-​isem tiegħu.” B’mod simili, naqraw dwar Ġesù: “Jien ir-​ragħaj mill-​aħjar, u naf lin-​nagħaġ tiegħi u n-​nagħaġ tiegħi jafu lili, bħalma l-​Missier jaf lili u jien naf lill-​Missier; u nagħti ruħi għan-​nagħaġ.” Liema eżempji aqwa minn dawn jistaʼ jkollna taʼ kif neżerċitaw l-​awtorità bl-​imħabba?—Salm 23:​1-3; Ġwanni 10:​14, 15.

[Kumment f’paġna 18]

Ġeħova dejjem juża l-​qawwa tiegħu b’tali mod li tkun perfettament fi qbil mal-​ġustizzja, l-​għerf, u l-​imħabba

[Stampa f’paġna 18]

Kultant, l-​anzjani jkollhom jagħtu parir bl-​imħabba lil dawk li jiżbaljaw

[Stampa f’paġna 19]

Pawlu ta l-​parir lil Timotju biex iġib ruħu bħala iben li juri rispett u bħala wieħed li jieħu ħsieb lil ħutu

[Stampa f’paġna 20]

Ġesù Kristu jeżerċita l-​awtorità tiegħu bl-​għerf, bil-​ġustizzja, u bl-​imħabba