It-​Tfittxija tal-​Bniedem għall-​Ħajja taʼ Dejjem

SA MILL-​EQDEM żminijiet tal-​bidu, il-​bnedmin ilhom jixxennqu li jgħixu għal dejjem. Madankollu, din ix-​xenqa għadha ma twettqitx​—ħadd għadu ma sab il-​mod kif jegħleb lill-​mewt. Però, reċentement, ir-​riċerka medika reġgħet ġeddet it-​tama li jistaʼ tassew ikun possibbli li l-​ħajja tal-​bniedem tiġi mtawla b’mod drammatiku. Ikkunsidra dak li qed jiġi studjat f’oqsma differenti taʼ l-​istudju xjentifiku.

Il-bijoloġi qegħdin jesperimentaw bl-​enzimi telomerase biex jipprovaw irażżnu dak li jidher bħala limitu taʼ kemm-il darba ċ-​ċelluli jerġgħu jimmultiplikaw ruħhom. Ix-​xjenzati jafu li ċ-​ċelluli qodma li qed jiddeterjoraw jiġu eliminati u mibdula maʼ wħud ġodda. Fil-​fatt, parti kbira tal-​ġisem tiġġedded ħafna drabi matul il-​ħajja tal-​bniedem. Ir-​riċerkaturi jaħsbu, li jekk il-​proċess tat-​tiġdid jistaʼ jiġi mtawwal, “il-​ġisem tal-​bniedem jistaʼ jġedded lilu nnifsu għal ħafna żmien​—saħansitra għal dejjem.”

Il-cloning terapewtiku, qasam kontroversjali tar-​riċerka, jistaʼ teoretikament jipprovdi fwied, kliewi, jew qlub ġodda għat-​trapjanti li jkunu perfettament kompatibbli mal-​pazjenti. Dawn l-​organi jkunu replika taċ-​ċelluli formattivi tal-​pazjent innifsu.

Ir-riċerkaturi tan-​nanuteknoloġija qed iħarsu bil-​quddiem għal meta t-​tobba se jintroduċu fid-​demm robots b’daqs taʼ ċellula li jiġru fil-​ġisem biex isibu u jeqirdu ċ-​ċelluli tal-​kanċer u batterji perikolużi. Xi wħud jemmnu li dan il-​qasam tax-​xjenza, flimkien maʼ terapiji ġenetiċi, maż-​żmien se jwassal biex il-​ġisem uman isostni lilu nnifsu għal dejjem.

Dawk li huma favur il-​krijonika jiffriżaw l-​iġsma taʼ dawk li jkunu mietu. L-​idea hi li l-​iġsma jiġu preservati sakemm isiru skoperti ġodda fil-​mediċina li jippermettu lit-​tobba jfejqu l-​mard, ireġġgħu lura l-​effetti tax-​xjuħija, u jirrestawraw kemm il-​ħajja u kemm is-​saħħa tal-​mejjet. L-​American Journal of Geriatric Psychiatry isejjaħ lil dan il-​konċett “l-​ekwivalenti modern għall-​ibbalzmar fost l-​Eġizzjani tal-​qedem.”

It-tfittxija persistenti tal-​bniedem għall-​immortalità turi kemm hu diffiċli biex wieħed jaċċetta l-​idea taʼ li ma jibqax jeżisti. Huwa tassew possibbli għall-​bniedem li jasal biex jikseb il-​ħajja taʼ dejjem? X’tgħid il-​Bibbja dwar dan is-​suġġett? L-​artiklu li jmiss se jipprovdi ttweġibiet.