Tibżaʼ Int mill-​Futur?

IL-​BIŻAʼ għandu ħafna wċuħ. Per eżempju, xi nies jibżgħu dwar il-​futur taʼ l-​ambjent naturali tad-​dinja. “Minn mewġ taʼ sħana kbira għal maltempati għal għargħar għal nirien għal glaċieri enormi li jinħallu, il-​klima globali madwarna donnha qed tisfaxxa,” qalet ir-​rivista Time, fil-​ħarġa tat-​3 t’April, 2006.

F’Mejju taʼ l-​2002, il-​Programm tal-​Ġnus Magħquda għall-​Ambjent ħareġ rapport bl-​isem “Ħarsa Lejn l-​Ambjent Globali-3.” Dan ġie mħejji bil-​kooperazzjoni taʼ iktar minn 1,000 ruħ. Skond rapport fl-​aħbarijiet, dan kien jgħid: “Il-​pjaneta tinsab f’punt fejn trid tittieħed deċiżjoni għaliex l-​għażliet li se jsiru llum qed jeffettwaw serjament il-​foresti, l-​oċeani, ix-​xmajjar, il-​muntanji, l-​annimali salvaġġi, u sistemi ekoloġiċi oħrajn li minnhom jiddependu l-​ġenerazzjonijiet t’issa u tal-​futur.”

Il-kundizzjoni preżenti taʼ l-​ambjent globali hija biss kaġun wieħed taʼ l-​ansjetà. In-​nies madwar id-​dinja issa jgħixu f’biżaʼ minn attakki terroristiċi. Id-​direttur deputat tax-​xogħlijiet għall-​aġenzija primarja taʼ l-​ispiji fil-​Kanada qal: “Aħna nibqgħu mqajmin il-​lejl kollu ninkwetaw dwar theddid li ma nafux bih.” Fil-​fatt, anki min jara l-​aħbarijiet taʼ fil-​għaxija fuq it-​televixin jistaʼ jħossu ansjuż!

Ħafna adulti ħabrieka jibżgħu li jitilfu l-​impjieg tagħhom. Il-​telf taʼ l-​impjieg, fabbriki li jagħlqu, il-​kompetizzjoni fuq il-​post tax-​xogħol, u domandi eċċessivi oħrajn mill-​imgħallmin joħolqu atmosfera taʼ nuqqas taʼ sigurtà fuq ix-​xogħol. L-​adoloxxenti jiffaċċjaw il-​biżaʼ li jiġu mwarrbin minn dawk taʼ mparhom. It-​tfal żgħar għandhom mnejn jibżgħu li l-​ġenituri tagħhom ma jħobbuhomx verament. Imma xi ngħidu dwar il-​kundizzjonijiet fid-​dinja taʼ madwarhom? “Għaż-​żgħar u l-​innoċenti, id-​dinja barra darhom bilfors li kultant tidher bħala post kbir u tal-​biżaʼ,” tgħid waħda omm inkwetata. U ħafna ġenituri jinsabu ansjużi li dawk li jħobbu, speċjalment uliedhom, qed jiġu effettwati mill-​morali tad-​dinja li qed jiddeterjoraw.

L-anzjani spiss jibżgħu li se jaqgħu xi taraġ jew li jiġu attakkati fit-​triq. Iva, għalihom “kull telgħa tbażża’, u t-​triq issir tkexkix.” (Koħèlet 12:5) Hemm il-​biżaʼ minn mard serju. Rapporti dwar viruses taʼ influwenza qattiela, mard tal-​kanċer, u mard li jittieħed jistaʼ jqabbadna l-​biżaʼ li taqbadna xi marda ġdida u stramba li tistaʼ timmankana jew toqtol lilna u lill-​familja tagħna. Tabilħaqq, meta naraw nies vivaċi li jbigħu s-​saħħa jimirdu u jsiru fraġli, ikun diffiċli li ma ninkwetawx dwar il-​fatt li l-​istess ħaġa tistaʼ tiġri lilna jew lill-​maħbubin tagħna. U kemm iqabbdek dwejjaq li tħares f’għajnejn individwu marid u tara li m’għandu ebda tama!

Ladarba aħna effettwati mill-​ħafna aspetti tal-​biżaʼ, għandna aħna raġuni valida biex inkunu ottimisti dwar il-​futur? Hemm xi ħaġa li tistaʼ tgħinna nżommu ħarsa pożittiva? L-​artiklu li jmiss se jwieġeb dawn il-​mistoqsijiet.

[Sors tal-Istampa f’paġna 3]

© Jeroen Oerlemans/Panos Pictures