Żviluppa lil Qalbek Biex Tibżaʼ minn Jehovah

“Mhux li kien jiżviluppaw lil din qalbhom biex jibżgħu minni u biex iżommu l-​kmandamenti kollha tiegħi dejjem.”—DEWTERONOMJU 5:​29, NW.

1. Kif nistgħu nkunu ċerti li fil-​futur in-​nies se jgawdu l-​libertà mill-​biżaʼ?

IL-​BIŻAʼ waħħax lill-​umanità għal sekli sħaħ. Il-​biżaʼ mill-​ġuħ, mill-​mard, mill-​kriminalità, jew mill-​gwerer iżomm lil miljuni taʼ nies f’ansjetà kontinwa. Għal din ir-​raġuni l-​introduzzjoni tad-​Dikjarazzjoni Universali tad-​Drittijiet tal-​Bniedem tesprimi x-​xewqa li jkun hawn dinja li fiha l-​bnedmin kollha jgawdu l-​libertà mill-​biżaʼ.a B’ferħ, Alla nnifsu jassigurana li se jkun hawn dinja bħal din—għalkemm mhux bis-​saħħa tal-​bniedem. Permezz tal-​profeta tiegħu Mikea, Jehovah iwegħedna li fid-​dinja l-​ġdida taʼ tjieba tiegħu, “ma jkunx hemm min iwerwirhom” lin-​nies tiegħu.—Mikea 4:4.

2. (a) L-Iskrittura kif tħeġġiġna biex nibżgħu minn Alla? (b) Liema mistoqsijiet jistgħu jqumu meta nikkunsidraw id-​dmir li għandna li nibżgħu minn Alla?

² Mill-​banda l-​oħra, il-​biżaʼ jistaʼ jkun ukoll forza pożittiva. Fl-​Iskrittura, il-​qaddejja t’Alla jiġu mħeġġin ripetutament biex jibżgħu minn Jehovah. Mosè qal lill-​Iżraelin biex ‘jibżgħu mill-​Mulej, Alla tagħhom, u lilu jservu.’ (Dewteronomju 6:13) Sekli wara, Salamun kiteb: “Ibżaʼ minn Alla, u ħares il-​kmandamenti tiegħu: għax dan hu d-​dmir taʼ kull bniedem.” (Ekkleżjażti 12:​13, Karm Żammit) Permezz tax-​xogħol tagħna taʼ għoti taʼ xiehda, li jitwettaq taħt is-​superviżjoni taʼ l-​anġli, aħna bl-​istess mod inħeġġu lin-​nies kollha biex ‘jibżgħu minn Alla u jagħtuh glorja.’ (Apokalissi 14:​6, 7) Barra milli jibżgħu minn Jehovah, il-​Kristjani jridu jħobbuh b’qalbhom kollha. (Mattew 22:​37, 38) Kif nistgħu nħobbu lil Alla u fl-​istess ħin nibżgħu minnu? Għala għandna bżonn nibżgħu minn Alla li jħobb? Liema benefiċċji nistgħu niksbu jekk nikkultivaw il-​biżaʼ minn Alla? Biex inwieġbu dawn il-​mistoqsijiet, l-​ewwel irridu nifhmu xi jfisser il-​biżaʼ minn Alla u kif dan it-​tip taʼ biżaʼ jifforma parti fundamentali mir-​relazzjoni li għandna maʼ Jehovah.

Stagħġib, Rispett Profond, u Biżaʼ

3. Xi jfisser il-​biżaʼ minn Alla?

³ Il-​biżaʼ minn Alla huwa sentiment li l-​Kristjani għandhom ikollhom lejn Dak li għamilhom. Definizzjoni waħda taʼ dan il-​biżaʼ hija “stagħġib u rispett profond lejn il-​Ħallieq u twerwir bnin li ma nogħġbuhx.” B’hekk, il-​biżaʼ minn Alla jinfluwenza żewġ aspetti importanti minn ħajjitna: l-​attitudni tagħna lejn Alla u l-​attitudni tagħna lejn kondotta li hu jobgħod. Ovvjament, iż-​żewġ aspetti huma kruċjali u jixirqilhom li jitqiesu bir-​reqqa. Bħalma jindika l-​Expository Dictionary of New Testament Words taʼ Vine, għall-​Kristjani dan il-​biżaʼ mqanqal minn rispett profond huwa ‘motiv li jikkontrolla l-​ħajja, fi kwistjonijiet kemm spiritwali kif ukoll morali.’

4. Kif nistgħu niżviluppaw sentimenti taʼ stagħġib u rispett profond lejn il-​Ħallieq tagħna?

⁴ Kif nistgħu niżviluppaw sentimenti taʼ stagħġib u rispett profond lejn il-​Ħallieq tagħna? Aħna nibqgħu mistagħġbin meta naraw xi xena sabiħa tal-​kampanja, xi kaskata impressjonanti, jew xi nżul ix-​xemx spettakolari, u nistagħġbu iktar meta nagħrfu, bl-​għajnejn tal-​fidi, li hemm l-​id t’Alla wara dawn ix-​xogħlijiet taʼ ħolqien. Barra minn hekk, bħas-​Sultan David, aħna nindunaw kemm m’aħna xejn meta nqabblu ruħna mal-​ħolqien meraviljuż taʼ Jehovah. “Nħares lejn is-​smewwiet, għemil subgħajk, il-​qamar u l-​kwiekeb li int qegħedt fihom! X’inhu l-​bniedem biex tiftakar fih?” (Salm 8:​4, 5 [8:​3, 4, NW]) Dan l-​istagħġib profond iwassal għal stima kbira li tqanqalna biex niżżu ħajr u nfaħħru lil Jehovah għal dak kollu li jagħmel għalina. David kiteb ukoll: “Infaħħrek; għax tal-​biżaʼ u taʼ l-​għaġeb jien magħmul: taʼ l-​għaġeb huma l-​għemejjel tiegħek; u dan ruħi tafu tajjeb.”—Salm 139:​14, KŻ.

5. Għala għandna nibżgħu minn Jehovah, u liema eżempju mill-​aħjar għandna f’dan ir-​rigward?

⁵ Sentimenti taʼ stagħġib u rispett profond inisslu biżaʼ bnin mimli stima lejn il-​qawwa t’Alla bħala l-​Ħallieq u lejn l-​awtorità tiegħu bħala l-​Ħakkiem bi dritt taʼ l-​univers. F’dehra li ra l-​appostlu Ġwanni, “dawk li kienu ħarġu rebbieħa fuq il-​Bhima u fuq xbihitha”—is-​segwaċi midlukin taʼ Kristu fil-​pożizzjoni tagħhom fis-​sema—jipproklamaw: “Kbar u taʼ l-​għaġeb l-​għemejjel tiegħek, Mulej, Alla li tistaʼ kollox; ġusti u veri t-​triqat tiegħek, Sultan tal-​ġnus. Min, Mulej, ma jibżax minnek u ma jsebbaħx lil ismek?” (Apokalissi 15:​2-4) Il-​biżaʼ minn Alla, li jitnissel minn rispett profond lejn il-​maestà tiegħu, iqanqal lil dawn il-​ħakkiema mseħbin maʼ Kristu fis-​Saltna tas-​sema biex jonoraw lil Alla bħala l-​awtorità suprema. Meta nikkunsidraw dak kollu li wettaq Jehovah u l-​mod ġust kif hu jmexxi l-​univers, ma jkollniex aħna raġuni suffiċjenti biex nibżgħu minnu?—Salm 2:11; Ġeremija 10:7.

6. Għala għandu jkollna twerwir bnin li ma nogħġbux lil Jehovah?

⁶ Madankollu, barra l-​istagħġib u r-​rispett profond, il-​biżaʼ minn Alla jrid jinkludi twerwir bnin li ma nogħġbuhx jew li nkunu diżubbidjenti lejh. Għala? Għaliex waqt li Jehovah hu “tqil biex jagħdab u kbir fit-​tjieba,” irridu niftakru li “ma jħalli xejn għaddej; jikkastiga l-​ħażen.” (Eżodu 34:​6, 7) Għalkemm mimli mħabba u ħniena, Jehovah ma jittollerax in-​nuqqas taʼ tjieba u l-​għemil ħażin li jsir apposta. (Salm 5:​5, 6 [5:​4, 5, NW]; Ħabakkuk 1:13) Dawk li apposta u bla ma jindmu jipprattikaw dak li huwa ħażin f’għajnejn Jehovah u jopponuh, ma jistgħux jagħmlu dan mingħajr ma jiġu kastigati. Bħalma qal l-​appostlu Pawlu, hija “ħaġa tal-​biżaʼ li taqaʼ f’idejn Alla l-​ħaj!” Li jkollna twerwir bnin li naqgħu f’din is-​sitwazzjoni huwa fl-​aħħar mill-​aħħar taʼ protezzjoni għalina.—Lhud 10:31.

‘Aqbdu Qabda Soda Miegħu’

7. X’raġunijiet għandna biex nafdaw fil-​qawwa li Jehovah għandu biex isalvana?

⁷ Il-​biżaʼ mqanqal minn rispett profond lejn Alla u l-​fatt li nkunu konxji sew tal-​qawwa maestuża tiegħu jwassluna biex ikollna fiduċja u fidi sħiħa f’Jehovah. Sewwa sew bħalma tifel żgħir iħossu protett meta jkun qrib missieru, aħna nħossuna sodi u fiduċjużi f’id Jehovah li tiggwidana. Innota kif irreaġixxew l-​Iżraelin wara li Jehovah ħariġhom mill-​Eġittu: “Ra Iżrael kull ma għamel il-​Mulej lill-​Eġizzjani bil-​qawwa taʼ driegħu. U beżaʼ l-​poplu mill-​Mulej, u emmen fil-​Mulej.” (Eżodu 14:31) L-​esperjenza t’Eliżew ukoll tixhed għall-​fatt li “l-​anġlu tal-​Mulej jgħasses madwar dawk li jibżgħu minnu, u jeħlishom.” (Salm 34:8 [34:​7, NW]; 2 Slaten 6:​15-17) L-​istorja tal-​poplu taʼ Jehovah fi żmienna u x’aktarx l-​esperjenza persunali tagħna stess jikkonfermaw li Alla fil-​fatt jeżerċita l-​qawwa tiegħu għan-​nom taʼ dawk li jaqduh. (2 Kronaki 16:9) B’hekk, aħna nibdew napprezzaw li “tama qawwija jkollu min għandu l-​biżaʼ tal-​Mulej.”—Proverbji 14:26.

8. (a) Il-biżaʼ minn Alla għala jqanqalna biex nimxu fi triqatu? (b) Spjega kif għandna ‘naqbdu qabda soda’ maʼ Jehovah.

⁸ Il-​biżaʼ bnin minn Alla mhux biss inissel fiduċja u fidi fih imma wkoll iqanqalna biex nimxu fi triqatu. Meta inawgura t-​tempju, Salamun talab lil Jehovah: “Hekk [l-Iżraelin] jibżgħu minnek u jimxu fi triqatek il-​jiem kollha taʼ ħajjithom fuq wiċċ l-​art li int tajt lil missirijietna.” (2 Kronaki 6:31) Iktar kmieni, Mosè ħeġġeġ lill-​Iżraelin: “Intom għandkom timxu wara l-​Mulej, u minnu tibżgħu, u l-​kmandamenti tiegħu tħarsu, u leħnu tisimgħu, u lilu taqdu, u miegħu tingħaqdu [“taqbdu qabda soda,” NW].” (Dewteronomju 13:5 [13:​4, NW]) Bħalma juru ċar dawn il-​versi, ix-​xewqa biex nimxu fit-​triqat taʼ Jehovah u biex ‘naqbdu qabda soda’ miegħu tiġi mill-​fiduċja u l-​fidi sħiħa f’Alla. Iva, il-​biżaʼ minn Alla jwassalna biex nobdu lil Jehovah, biex naqduh, u biex naqbdu qabda soda miegħu, sewwa sew bħalma tifel żgħir għandu mnejn jaqbad letteralment maʼ missieru li lilu jafda b’għajnejh magħluqa u għandu fiduċja sħiħa fih.—Salm 63:9 (63:​8, NW); Isaija 41:13.

Li Tħobb lil Alla Jfisser li Tibżaʼ Minnu

9. X’konnessjoni hemm bejn l-​imħabba għal Alla u l-​biżaʼ minn Alla?

⁹ Skond l-​Iskrittura, li tibżaʼ minn Alla bl-​ebda mod ma jfisser li ma tistax tħobbu. Għall-​kuntrarju, l-​Iżraelin ġew istruwiti biex ‘jibżgħu mill-​Mulej sabiex jimxu fi triqatu kollha u jħobbuh.’ (Dewteronomju 10:12) B’hekk, il-​biżaʼ minn Alla u l-​imħabba lejh huma marbutin flimkien. Il-​biżaʼ minn Alla jqanqalna biex nimxu fi triqatu, u dan imbagħad jagħti prova taʼ l-​imħabba li għandna għalih. (1 Ġwann 5:3) Dan huwa loġiku għaliex meta nħobbu lil xi ħadd, nagħmlu tajjeb jekk nibżgħu li nweġġgħuh. L-​Iżraelin weġġgħu lil Jehovah bil-​mod ribelluż kif aġixxew fid-​deżert. Żgur li aħna ma rridux li nagħmlu xi ħaġa li biha nnikktu lil Missierna tas-​sema. (Salm 78:​40, 41) Mill-​banda l-​oħra, ladarba “jitgħaxxaq il-​Mulej b’min għandu l-​biżaʼ tiegħu,” l-​ubbidjenza u l-​fedeltà tagħna jferrħulu qalbu. (Salm 147:11; Proverbji 27:11) L-​imħabba għal Alla tqanqalna biex nogħġbuh, u l-​biżaʼ minn Alla jżommna lura milli nweġġgħuh. Dawn huma kwalitajiet li jikkomplimentaw, mhux jikkontradixxu, lil xulxin.

10. Ġesù kif wera li sab l-​għaxqa tiegħu f’li jibżaʼ minn Jehovah?

¹⁰ Il-​ħajja taʼ Ġesù Kristu turina ċar kif nistgħu nħobbu lil Alla u nibżgħu minnu fl-​istess ħin. Il-​profeta Isaija kiteb hekk dwar Ġesù: “Fuqu jistrieħ l-​ispirtu tal-​Mulej, l-​ispirtu taʼ l-​għerf u d-​dehen, l-​ispirtu taʼ l-​għaqal u l-​qawwa, l-​ispirtu taʼ l-​għerf u l-​biżaʼ tal-​Mulej, u l-​għaxqa tiegħu fil-​biżaʼ tal-​Mulej.” (Isaija 11:​2, 3) Skond din il-​profezija, l-​ispirtu t’Alla qanqal lil Ġesù biex jibżaʼ minn Missieru tas-​sema. Barra minn hekk, ninnotaw li dan il-​biżaʼ mhux talli ma kienx taʼ xkiel, imma talli kien sors taʼ sodisfazzjon. Ġesù sab l-​għaxqa tiegħu f’li jagħmel ir-​rieda t’Alla u f’li jogħġob lilu, saħansitra fl-​iktar ċirkustanzi diffiċli. Meta kien wasal biex jinqatel fuq iz-​zokk tat-​tortura, hu qal lil Jehovah: “Mhux kif irrid jien, iżda kif trid int.” (Mattew 26:39) Minħabba dan, Jehovah ta widen b’mod favorevoli għat-​talb u s-​suppliki taʼ Ibnu, saħħu, u salvah mill-​mewt.—Lhud 5:7.

Nitgħallmu Nibżgħu minn Jehovah

11, 12. (a) Għala rridu nitgħallmu nibżgħu minn Alla? (b) Ġesù kif jgħallimna nibżgħu minn Jehovah?

¹¹ Kuntrarju għall-​istagħġib li nħossu awtomatikament meta naraw il-​qawwa u l-​maestà tan-​natura quddiemna, il-​biżaʼ minn Alla ma jiġix waħdu. Huwa għalhekk li Ġesù Kristu, David Akbar, jestendilna b’mod profetiku l-​istedina: “Ejjew uliedi, isimgħu lili: jiena l-​biżaʼ tal-​Mulej ngħallimkom.” (Salm 34:12 [34:​11, NW]) Kif nistgħu nitgħallmu mingħand Ġesù biex nibżgħu minn Jehovah?

¹² Ġesù jgħallimna nibżgħu minn Jehovah billi jgħinna nifhmu l-​personalità meraviljuża taʼ Missierna tas-​sema. (Ġwann 1:18) L-​eżempju taʼ Ġesù stess jirrivela kif jaħseb Alla u kif jittratta maʼ ħaddieħor, għax Ġesù jirrifletti perfettament il-​personalità taʼ Missieru. (Ġwann 14:​9, 10) Barra minn hekk, permezz tas-​sagrifiċċju taʼ Ġesù, nistgħu nersqu għand Jehovah meta nitolbuh jaħfrilna dnubietna. Din l-​espressjoni li tispikka tal-​ħniena t’Alla fiha nfisha hija raġuni qawwija biex nibżgħu minnu. Is-​salmista kiteb: “Għandek hemm il-​maħfra, biex hekk inqimuk fil-​biżaʼ tiegħek.”—Salm 130:4.

13. Liema passi nsibu fil-​ktieb tal-​Proverbji li jgħinuna nibżgħu minn Jehovah?

¹³ Fil-​ktieb tal-​Proverbji nsibu diversi passi li bis-​saħħa tagħhom inkunu nistgħu niżviluppaw il-​biżaʼ minn Alla. “Ibni, jekk int tilqaʼ kliemi, u taħżen ġo fik il-​kmandamenti tiegħi billi tagħti widen għall-​għerf, u tħalli lil moħħok jifhem sewwa; jekk issejjaħ l-​għerf, u tgħolli leħnek għall-​fehma t-​tajba; . . . mbagħad tifhem il-​biżaʼ tal-​Mulej, u ssib it-​tagħrif taʼ Alla.” (Proverbji 2:​1-5) Għalhekk, biex nibżgħu minn Alla, irridu nistudjaw il-​Kelma tiegħu, nistinkaw bil-​ħerqa biex nifhmu l-​istruzzjonijiet tagħha, u mbagħad noqogħdu attenti ferm għall-​pariri tagħha.

14. Kif nistgħu nsegwu l-​parir mogħti lis-​slaten taʼ Iżrael?

¹⁴ Kull sultan taʼ Iżrael tal-​qedem kien istruwit biex jagħmel kopja tal-​Liġi u ‘jaqraha l-​jiem kollha taʼ ħajtu, biex jitgħallem jibżaʼ mill-​Mulej, Alla tiegħu, u jħares il-​kliem kollu tal-​liġi.’ (Dewteronomju 17:​18, 19) Il-​qari u l-​istudju tal-​Bibbja huma daqstant vitali għalina jekk irridu nitgħallmu nibżgħu minn Jehovah. Hekk kif napplikaw il-​prinċipji tal-​Bibbja f’ħajjitna, niksbu l-​għerf u t-​tagħrif mingħand Alla bil-​mod il-​mod. Insiru ‘nifhmu l-​biżaʼ tal-​Mulej’ għax naraw ir-​riżultati tajbin li dan jipproduċi f’ħajjitna, u nibdew ngħożżu r-​relazzjoni li għandna m’Alla. Barra minn hekk, billi jiltaqgħu regolarment maʼ sħabhom fit-​twemmin, kemm iż-​żgħażagħ u kemm ix-​xjuħ jistgħu jisimgħu t-​tagħlim divin, jitgħallmu jibżgħu minn Alla, u jimxu fit-​triqat tiegħu.—Dewteronomju 31:12.

Hieni Kulmin Jibżaʼ minn Jehovah

15. Il-​biżaʼ minn Alla b’liema mod huwa relatat mal-​qima tagħna lejh?

¹⁵ Minn dak li għedna, nistgħu naraw li l-​biżaʼ minn Alla huwa attitudni bnina li lkoll kemm aħna għandna nikkultivaw, ladarba huwa parti fundamentali mill-​qima tagħna lejn Jehovah. Dan iwassalna biex nafdaw fih b’għajnejna magħluqa, biex nimxu fit-​triqat tiegħu, u biex naqbdu qabda soda miegħu. Bħalma setaʼ jingħad dwar Ġesù Kristu, il-​biżaʼ minn Alla jistaʼ jqanqal lilna wkoll biex inwettqu l-​wegħda tad-​dedikazzjoni tagħna issa u għall-​eternità kollha.

16. Jehovah għala jinkuraġġina biex nibżgħu minnu?

¹⁶ Il-​biżaʼ minn Alla mhux xi ħaġa tal-​waħx jew taʼ xkiel. “Hieni kull min jibżaʼ mill-​Mulej, kull min jimxi fit-​triqat tiegħu,” tassigurana l-​Bibbja. (Salm 128:1) Jehovah jinkuraġġina biex nibżgħu minnu għaliex jaf li din il-​ħaġa se tipproteġina. Aħna ninnotaw it-​tħassib b’imħabba tiegħu fil-​kliem li qal lil Mosè: “Mhux li kien jiżviluppaw lil din qalbhom biex jibżgħu minni u biex iżommu l-​kmandamenti kollha tiegħi dejjem, sabiex ikun jistaʼ jaħbtilhom tajjeb lilhom u lil uliedhom għal żmien indefinit!”—Dewteronomju 5:​29, NW.

17. (a) Liema benefiċċji niksbu jekk nibżgħu minn Alla? (b) Liema aspetti tal-​biżaʼ minn Alla se jiġu kunsidrati fl-​artiklu li jmiss?

¹⁷ Bl-​istess mod, jekk niżviluppaw lil qalbna biex tibżaʼ minn Alla, se jaħbtilna tajjeb. B’liema mod? L-​ewwelnett, din l-​attitudni se togħġob lil Alla u se tressaqna qrib tiegħu. David kien jaf mill-​esperjenza persunali li Alla “jaqtgħalhom xewqithom ’il dawk li jibżgħu minnu, jismaʼ l-​għajta tagħhom, u jsalvahom.” (Salm 145:19) It-​tieni, il-​biżaʼ minn Alla se jkun taʼ benefiċċju għalina għaliex se jeffettwa l-​attitudni tagħna lejn dak li hu ħażin. (Proverbji 3:7) L-​artiklu li jmiss se jeżamina kif dan il-​biżaʼ jħarisna mill-​perikli spiritwali, u se jirrivedi xi eżempji Skritturali taʼ individwi li beżgħu minn Alla u warrbu mill-​ħażen.

[Nota taʼ taħt]

Tistaʼ Twieġeb Dan li Ġej?

• Xi jfisser il-​biżaʼ minn Alla, u kif jeffettwana?

• X’konnessjoni hemm bejn li tibżaʼ minn Alla u li timxi miegħu?

• L-eżempju taʼ Ġesù kif juri li l-​biżaʼ minn Alla hu relatat maʼ l-​imħabba lejn Alla?

• B’liema modi nistgħu niżviluppaw lil qalbna biex tibżaʼ minn Jehovah?

[Stampa f’paġna 17]

Is-​slaten Iżraelin kienu kmandati jagħmlu kopja persunali tal-​Liġi u jaqrawha kuljum

[Stampa f’paġna 18]

Il-​biżaʼ minn Jehovah iwassalna biex nafdaw fih bħalma iben jafda lil missieru

[Sors tal-​Istampa f’paġna 15]

Kwiekeb: Ritratt minn Malin, © IAC/RGO 1991