Mistoqsijiet mill-Qarrejja
Ladarba l-Lhud ngħataw il-kmand biex ma jkollhom “xejn bil-ħmira” waqt il-Qbiż, Ġesù għala uża l-inbid—prodott tal-fermentazzjoni—meta stabbilixxa t-Tifkira taʼ mewtu?—Eżodu 12:20; Luqa 22:7, 8, 14-20.
L-osservanza tal-Qbiż, li kienet tikkommemora l-Eżodu taʼ wlied Iżrael mill-Eġittu, ġiet stabbilita fis-sena 1513 Q.E.K. Meta ta l-istruzzjonijiet għall-osservanza tagħha, Ġeħova qal: “Tieklu xejn bil-ħmira, kulu l-ażżmu fl-għamajjar kollha tagħkom.” (Eżodu 12:11, 20) Din il-projbizzjoni divina applikat biss għat-tip taʼ ħobż li kellu jittiekel waqt il-Qbiż. Ma kienx hemm referenza għall-inbid.
Ir-raġuni prinċipali għar-restrizzjoni fuq il-ħmira kien li t-tluq taʼ l-Iżraelin mill-Eġittu kien wieħed taʼ malajr. Eżodu 12:34 jispjega: “Il-poplu ħa l-għaġna bla ħmira, u l-lniebi misrura fl-imnatar fuq spallejhom.” In-nuqqas taʼ ħmira waqt l-osservanzi tal-Qbiż li ġew wara kien se jservi bħala tfakkira għal ġenerazzjonijiet futuri dwar dan il-fatt importanti.
Maż-żmien, il-ħmira spiss bdiet titqies bħala simbolu tad-dnub jew tal-korruzzjoni. Per eżempju, b’referenza għal persuna immorali fil-kongregazzjoni Kristjana, l-appostlu Pawlu staqsa: “Ma tafux li ftit ħmira tħemmer l-għaġna kollha?” Imbagħad qal: “Neħħu l-ħmira l-qadima biex tkunu għaġna ġdida, ħelsin minn kulma jiffermenta. Għax Kristu, il-Qbiż tagħna, ġie sagrifikat. Għaldaqstant ħa nosservaw il-festa, mhux bi ħmira qadima, lanqas bi ħmira taʼ ħażen u aġir mill-agħar, imma b’ħobż bla ħmira taʼ sinċerità u verità.” (1 Korintin 5:6-8) Ħobż bla ħmira biss setaʼ jservi bħala simbolu tal-ġisem uman taʼ Ġesù li hu bla dnub.—Ebrej 7:26.
Iktar tard, il-Lhud bdew jużaw l-inbid ukoll fl-osservanza tal-Qbiż. X’aktarx li bdew jagħmlu dan wara li rritornaw mill-eżilju f’Babilonja. Il-Bibbja mkien ma toġġezzjona dwar din iż-żjieda, u għalhekk Ġesù setaʼ bix-xieraq juża l-inbid fl-ikla tal-Qbiż. M’għandniex xi ngħidu, il-fermentazzjoni naturali li seħħet fl-inbid fiż-żmien tal-qedem kienet differenti minn dik li seħħet b’konnessjoni mal-ħobż. Fil-każ taʼ l-għaġna, sabiex tiffermenta kellha bżonn il-ħmira. L-inbid magħmul mill-għeneb ma kellhom bżonn iżidulu xejn biex jiffermenta. L-ingredjenti tal-fermentazzjoni kienu diġà fl-għeneb. Il-meraq pur taʼ l-għeneb ma kienx disponibbli fil-Qbiż għaliex minn żmien il-ħsad fil-ħarifa sal-Qbiż fir-rebbiegħa kien se jilħaq jiffermenta.
Għalhekk, l-użu taʼ l-inbid minn Ġesù bħala emblema fit-Tifkira bl-ebda mod ma jmur kontra l-istruzzjonijiet għall-Qbiż rigward il-ħmira. Kwalunkwe nbid aħmar li m’huwiex miżjud biz-zokkor, bl-alkoħol, jew bil-ħwawar huwa xieraq biex jintuża bħala simbolu tad-“demm prezzjuż” taʼ Kristu.—1 Pietru 1:19.