Jifraħ Minħabba r-​“Rebħa mal-​Ħaruf”

F’ITTRA li kiteb fl-​1971, Carey W. Barber irrifletta fuq l-​ewwel 50 sena tiegħu taʼ servizz lil Alla l-​veru: “Is-​snin li qattajt fis-​servizz taʼ Ġeħova kienu tassew tajbin, iktar milli stajt nistenna. Is-​sħubija mal-​poplu tiegħu; il-​protezzjoni mill-​ħżiena fid-​dinja taʼ Satana; il-​prospett tar-​rebħa mal-​Ħaruf, Ġesù Kristu; u l-​evidenza taʼ l-​imħabba taʼ Ġeħova kollha flimkien iġibuli paċi ħelwa u sodisfazzjon ġewwieni li jgħassu l-​qalb u jagħtu tama ċerta taʼ trijonf finali.”

Sitt snin wara, Ħuna Barber, Kristjan midluk bl-​ispirtu, beda jaqdi bħala membru tal-​Ġemgħa li Tiggverna tax-​Xhieda taʼ Ġeħova. Fit-​30 sena li dam jaqdi f’dan il-​privileġġ hu baqaʼ jħares ’il quddiem lejn ir-​“rebħa mal-​Ħaruf.” Dan wettqu billi baqaʼ leali sa mewtu nhar il-​Ħadd, 8 t’April, 2007, fl-​età taʼ 101.—1 Korintin 15:57.

Carey Barber, li twieled fl-​Ingilterra fl-​1905, tgħammed f’Winnipeg, il-​Kanada, fl-​1921. Sentejn wara, hu u ħuh it-​tewmi, Norman, marru joqogħdu Brooklyn, New York, sabiex jgħinu fuq proġett ġdid. Dak iż-​żmien, il-​poplu taʼ Ġeħova kien se jibda jipproduċi l-​kotba tiegħu stess biex ikun jistaʼ jxerred l-​aħbar tajba tas-​Saltna “fl-​art abitata kollha.” (Mattew 24:14) Wieħed mill-​ewwel inkarigi taʼ Ħuna Barber kien li jħaddem stamperija żgħira. Fost l-​affarijiet li kienu jiġu stampati kien hemm dokumenti għal każijiet legali li kienu jitressqu quddiem il-​Qorti Suprema taʼ l-​Istati Uniti. Maż-​żmien, Ħuna Barber beda jaħdem fid-​Dipartiment tas-​Servizz, li kien jiffoka fuq il-​kwistjonijiet tal-​kongregazzjonijiet u x-​xogħol taʼ l-​ippridkar madwar il-​pajjiż.

Minħabba li kellu din l-​esperjenza, Ħuna Barber kien kwalifikat sew għall-​inkarigu li ngħata fl-​1948 biex jaqdi bħala ministru li jivvjaġġa, filwaqt li kien iżur assembleat u kongregazzjonijiet madwar il-​punent kollu taʼ l-​Istati Uniti. Hu qal li kien jieħu pjaċir partikolarment meta kien ikun barra fl-​arja friska fl-​attività taʼ l-​ippridkar pubbliku. Dan l-​inkarigu ġab lil ħafna aħwa f’kuntatt maʼ Ħuna Barber. Il-​ħeffa tal-​moħħ u ż-​żelu tiegħu għall-​ministeru kienu utli ħafna meta iktar tard attenda s-​26 klassi taʼ l-​Iskola taʼ Gilgħad (Watchtower Bible School of Gilead). Matul il-​kors, hu ltaqaʼ maʼ studenta mill-​Kanada, Sydney Lee Brewer. Wara li ggradwaw huma żżewġu u qattgħu qamar il-​għasel fil-​vjaġġ qasir li kellhom biex jaqdu l-​kongregazzjonijiet fl-​inħawi taʼ Chicago, Illinois. Oħtna Barber tat prova li kienet sieħba imprezzabbli u sors t’appoġġ kostanti għal żewġha matul l-​għoxrin sena li qattgħu flimkien fil-​ministeru taʼ l-​ivvjaġġar.

Dawk li kellhom l-​opportunità jiltaqgħu maʼ Ħuna Barber u jsiru jafuh matul l-​għaxriet taʼ snin li qeda bħala indokratur tad-​distrett jew tas-​circuit jew matul it-​30 sena li qattaʼ jaħdem bħala membru li jivvjaġġa tal-​Ġemgħa li Tiggverna se jibqgħu jiftakru għal żmien twil it-​taħditiet u l-​kummenti vivaċi tiegħu. Għandna kull raġuni biex nifirħu minħabba li hu kellu “rebħa mal-​Ħaruf.”