Ittra min-​Nikaragwa

“Meta Tasal Ħdejn ix-​Xmara Coco, Ikser fuq il-​Lemin”

“SE JKOLLOK bżonn vettura li tingrana fuq erbaʼ roti, apparat biex joħorġok mit-​tajn, u tankijiet żejda tal-​fuel. Ħejji ruħek għal toroq b’ħafna tajn fond. Meta tasal ħdejn ix-​xmara Coco, ikser fuq il-​lemin.”

Ikolli nammetti li dan il-​kliem taʼ sieħbi li huwa missjunarju ma tantx tani kuraġġ. Minkejja dan, darba minnhom it-​Tlieta fil-​għodu, bdejt il-​vjaġġ tiegħi biex nattendi assemblea Kristjana f’Wamblán, belt żgħira fin-​naħa tat-​tramuntana tan-​Nikaragwa.

Bdejt nivvjaġġa mas-​sebħ, bit-​trakk tiegħi antik imma b’saħħtu tul it-​triq prinċipali Amerikana li tibda mill-​Alaska u twassal saċ-​Ċili. F’Jinotega, bdejt insuq fit-​triq imħarbta li n-​nies tal-​lokal isejħulha feo, jew kerha. Qabel tlaqt mill-​belt, innotajt żewġ ħwienet, wieħed jismu Miraklu t’Alla u l-​ieħor, L-​Irxoxt.

It-triq kienet mgħawġa u mserrpa, tinżel u togħla. Soqt bil-​mod ħafna fil-​widien u l-​kanali. Ir-​rotta tiegħi għaddietni minn ħdejn xmara twila mkenna f’wied li jinsab fl-​għoli fuq muntanja miksija bis-​sħab. Minn ġoċ-​ċpar, rajt siġar mimlijin orkidej.

F’liwja magħluqa ħafna, għal ftit ma bqajtx dieħel f’tal-linja li kienet għaddejja f’nofs it-​triq. Bdiet iddaħħan, u hi u għaddejja t-​tajers tagħha bdew itajru l-​ġebel. Hawn fin-​Nikaragwa tistaʼ tara l-​laqam tax-​xufier aggressiv miktub ċar fuq il-​ħġieġa taʼ quddiem taʼ tal-​linja: Konkwistatur, Skorpjun, Piton, jew Kaċċatur.

Sa nofsinhar kont għaddej mill-​Pjanura taʼ Pantasma. Hemmhekk, għaddejt minn ħdejn dar taʼ l-​injam fuq biċċa art. Ix-​xena kienet qisha stampa minn ġo ktieb antik: Kien hemm raġel xiħ bil-​qiegħda fuq bank, kelb rieqed taħt siġra, u żewġ gniedes marbutin b’madmad maʼ karettun bir-​roti taʼ l-​injam. F’belt żgħira waħda, rajt ċorma tfal ħerġin mill-​iskola. Bl-​uniformi blu skur tagħhom, huma mlew it-​triq prinċipali qishom mewġa mal-​bajja f’xatt il-​baħar.

Ix-xemx kienet tikwi hekk kif wasalt ħdejn Wiwilí u rajt ix-​xmara Coco għall-​ewwel darba. Fil-​belt, ix-​xmara kollha qawwa kienet tispikka bl-​ilmijiet tagħha dejjem igelglu. Ftakart fl-​istruzzjonijiet, ksirt fuq il-​lemin u bdejt it-​triq perikoluża taʼ 37 kilometru lejn Wamblán.

Waqt li kont qed insuq minn toroq mimlijin tajn u ġebel, it-​trakk beda jtajjar l-​ilma meta għaddejt minn xi tmienja jew disaʼ xmajjar żgħar. Hekk kif bdejt nipprova nevita l-​ħofor fit-​tajn niexef, jien bdejt inħalli sħab tat-​trab warajja. Iva, “jien kilt it-​trab,” kif jgħidu n-​nies tal-​lokal. Fl-​aħħar, it-​triq spiċċat, u hemm f’wied mudlam mimli siġar kien hemm Wamblán, id-​destinazzjoni tiegħi.

L-​għada, kulħadd donnu kien imqajjem fl-​4.30 a.m. Iktar kmieni ġejt imqajjem mis-​sriedaq li bdew jiddnu bla waqfien, u għalhekk qomt u mort nimxi fit-​triq prinċipali. L-​arja tal-​muntanja kienet mimlija bir-​riħa tat-​tortillas li kienu qed jinħmew fil-​fran tal-​ġebel.

Stajt tara xeni kuluriti tal-​ġenna taʼ l-​art impinġijin minn pittur lokali fuq ħitan ’l hawn u ’l hinn. Sinjali fuq il-​pulperías, jew il-​ħwienet tal-​lokal fil-​kantunieri, kienu jirreklamaw diversi xarbiet. Kien hemm kartelluni li kienu jfakkru lin-​nies dwar il-​wegħdi li għamlu l-​aħħar tliet gvernijiet. Kien hemm latrini magħmulin mil-​landa tleqq fuq biċċa art tal-​konkrit.

Jien tkellimt l-​ewwel, billi użajt it-​tislija “Adios” li fin-​Nikaragwa tgħidha meta tiltaqaʼ maʼ xi ħadd. In-​nies tbissmu u kellmuni b’qalb tajba. Aħna bdejna nitkellmu b’leħen ogħla mill-​ħoss tat-​traffiku—il-​ħsejjes tal-​passi taż-​żwiemel u l-​ħmir.

Sal-Ġimgħa fil-​għaxija, il-​familji waslu għall-​assemblea taʼ jumejn. Huma ġew bil-​mixi, biż-​żwiemel, u bit-​trakkijiet. Xi tfal żgħar imxew għal sitt sigħat b’sandli tal-​plastik f’saqajhom. Huma għaddew b’riskju minn ħdejn mini splussivi meta kellhom jaqsmu x-​xmajjar u bil-​kuraġġ imxew fl-​ilmijiet kalmi minkejja s-​sangisugi li kien fihom. Xi wħud minn komunitajiet imbegħdin ġabu magħhom ftit ikel biss—ross bit-​togħma tax-​xaħam tal-​majjal. Għal liema raġuni ġew dawn kollha?

Huma ġew biex isaħħu t-​tama tagħhom għal futur aħjar. Ġew biex jisimgħu lil min jispjegalhom il-​Bibbja. Huma ġew biex jogħġbu lil Alla.

Is-Sibt wasal. Taħt saqaf tal-​landa, l-​udjenza taʼ iktar minn 300 ruħ qagħdet bil-​qiegħda fuq banek taʼ l-​injam u siġġijiet tal-​plastik. L-​ommijiet temgħu lit-​trabi tagħhom. Il-​ħnieżer bdew iqażqżu u s-​sriedaq żgħar bdew jiddnu mir-​razzett fil-​qrib.

It-temperatura telgħet m’ogħla s-​sema, u s-​sħana malajr saret kważi insapportabbli. Però, dawk fl-​udjenza taw widen b’attenzjoni kbira għall-​pariri u l-​gwida li ngħataw. Hekk kif il-​kelliema qraw mill-​Bibbja huma segwew fil-​Bibbji tagħhom, kantaw għanjiet ibbażati fuq temi mill-​Bibbja, u taw widen b’rispett għat-​talb li ġie offrut għan-​nom tagħhom.

Wara l-​programm, jien ngħaqadt maʼ xi oħrajn u lgħabt mat-​tfal. Imbagħad irrivedejna n-​noti li kienu ħadu ż-​żgħażagħ. Jien urejthom stampi taʼ stilel u galassji fuq il-​kompjuter tiegħi. It-​tfal bdew jitbissmu, u l-​ġenituri tagħhom ħadu pjaċir.

L-assemblea ntemmet malajr wisq u kulħadd kellu jmur id-​dar. Jien tlaqt l-​għada fil-​għodu, b’moħħi mimli memorji sbieħ u b’qalb mimlija mħabba għall-​ħbieb ġodda tiegħi. Jien determinat li nimitahom u nitgħallem kif inkun kuntent u kif nistrieħ fuq Alla.

[Stampi f’paġna 32]

Familji vvjaġġaw ħafna kilometri biex jattendu l-​assemblea f’Wamblán