Fatturi Essenzjali għall-​Hena fil-​Familja

Kif Tirnexxi fl-​Ewwel Sena taż-​Żwieġ

Hu jgħid: “Bqajt sorpriż kemm jien u marti aħna differenti! Pereżempju, jien inħobb inbakkar, imma hi tħobb tmur torqod tard filgħaxija. U xi ngħidu għall-​bidliet fil-​burdati tagħha? Iħawduni għalkollox! U ħaġ’oħra—hi tibda tikkritika żżejjed meta nsajjar, speċjalment minħabba l-​mod kif nixxotta jdejja bis-​sarvetta tal-​platti.”

Hi tgħid: “Żewġi raġel taʼ ftit kliem. Imma jien imdorrija bħall-​familja tiegħi. Huma jħobbu jitkellmu ħafna, l-​iktar fil-​ħin tal-​ikel. U meta żewġi jsajjar, hu juża l-​istess sarvetta biex jixxotta l-​platti u anki biex jixxotta jdejh! Dan idejjaqni ħafna! Għala l-​irġiel huma daqshekk diffiċli biex tifhimhom? In-​nies kif jirnexxu fiż-​żwieġ tagħhom?”

JEKK int miżżewweġ frisk, iffaċċjajt sfidi bħal dawn? Jidher li f’daqqa waħda l-​persuna li żżewwiġt sar għandha nuqqasijiet u dgħufijiet li ma kinux jeżistu meta kontu tinnamraw? Kif tistaʼ tnaqqas l-​effett li “t-​taħbit tal-​ħajja” jkollu fuq il-​miżżewġin?—1 Korintin 7:28, Għaqda Biblika Maltija.

L-​ewwel, tistenniex li ladarba tajt il-​wegħdiet taż-​żwieġ int u marteka se ssiru f’daqqa waħda esperti fil-​ħajja miżżewġa. Int stajt rawwimt abbiltajiet soċjali taʼ valur qabel iż-​żwieġ u dawn setgħu tjiebu waqt in-​namur. Madankollu, biż-​żwieġ dawn l-​abbiltajiet se juru xi jsarrfu b’modi ġodda u x’aktarx li int se jkollok bżonn titgħallem oħrajn ġodda. Se tagħmel żbalji? Dażgur! Tistaʼ int titgħallem l-​abbiltajiet li għandek bżonn? Assolutament!

L-​aħjar mod kif ittejjeb kwalunkwe abbiltà hu billi tieħu parir mingħand xi espert fis-​suġġett u mbagħad tapplika l-​parir li jagħti. L-​aħjar espert taż-​żwieġ hu Alla Ġeħova. Wara kollox, hu l-​Wieħed li ħalaqna bix-​xewqa li niżżewġu. (Ġenesi 2:22-​24) Innota kif il-​Kelma tiegħu, il-​Bibbja, tistaʼ tgħinek tegħleb l-​isfidi u trawwem l-​abbiltajiet li għandek bżonn biex mill-​ewwel sena ż-​żwieġ tiegħek jirnexxi iktar.

L-​1 ABBILTÀ. TGĦALLMU ĦUDU L-​OPINJONI TAʼ XULXIN

X’inhuma l-​isfidi? Keiji,b raġel miżżewweġ li jgħix fil-​Ġappun, kultant kien jinsa li d-​deċiżjonijiet tiegħu kienu jeffettwaw lil martu. Hu jgħid: “Kont naċċetta l-​istedin mingħajr ma l-​ewwel niddiskuti maʼ marti. Wara kont insib li ma kienx ikun komdu għaliha li żżomm dawn l-​appuntamenti.” Allen, raġel miżżewweġ mill-​Awstralja jgħid: “Kont inħoss li tkun dgħufija min-​naħa tiegħi bħala raġel biex noqgħod nistaqsi lil marti dwar deċiżjonijiet li riedu jittieħdu.” Hu ffaċċja sfida minħabba t-​trobbija. L-​istess ġara lil Dianne, li toqgħod il-​Britannja. Hi tgħid: “Kont imdorrija nitkellem mal-​familja tiegħi għal parir. Għalhekk, l-​ewwel kont nistaqsi lilhom u mhux lil żewġi meta niġi għal xi deċiżjoni.”

X’inhi s-​soluzzjoni? Ftakar li Alla Ġeħova jqis koppja miżżewġa bħala li huma “ġisem wieħed.” (Mattew 19:3-​6) Mill-​ħarsa tiegħu, l-​ebda relazzjoni oħra bejn il-​bnedmin ma hi iktar importanti minn dik li teżisti bejn raġel u martu! Sabiex din l-​għaqda tibqaʼ b’saħħitha, komunikazzjoni tajba hi meħtieġa għall-​aħħar.

Raġel u martu jistgħu jitgħallmu ħafna billi jeżaminaw il-​mod kif Alla Ġeħova kkomunika maʼ Abraham. Pereżempju, jekk jogħġbok aqra d-​diskussjoni mniżżla f’Ġenesi 18:17-​33. Innota li Alla onora lil Abraham bi tliet modi. (1) Ġeħova spjega l-​intenzjoni tiegħu. (2) Hu semaʼ filwaqt li Abraham spjega l-​ħarsa tiegħu. (3) Sakemm setaʼ, Ġeħova adatta dak li kien se jagħmel biex jikkuntenta lil Abraham. Kif tistaʼ ssegwi l-​istess eżempju meta tiġi biex tieħu xi deċiżjoni flimkien maʼ martek?

IPPROVA DAN: Meta tiddiskuti affarijiet li se jolqtu lill-​persuna li żżewwiġt, (1) spjega kif int tixtieq li tittrattaw is-​sitwazzjoni, iżda ppreżenta l-​ħsibijiet tiegħek bħala suġġerimenti u mhux bħala deċiżjonijiet finali jew theddid; (2) staqsiha għall-​opinjoni tagħha u agħraf id-​dritt tagħha għal ħarsa differenti; u (3) ‘ħa jkun jaf kulħadd kemm int raġunevoli’ billi tadotta l-​preferenzi tagħha kull meta jkun possibbli.—Filippin 4:5.

IT-​2 ABBILTÀ. TGĦALLEM UŻA T-​TATTIKA

X’inhi l-​isfida? Forsi għandek id-​drawwa li tesprimi l-​opinjoni tiegħek b’mod sod, saħansitra bla tattika, minħabba t-​trobbija fil-​familja jew l-​isfond kulturali tiegħek. Pereżempju, Liam, li jgħix fl-​Ewropa, jgħid: “In-​nies taʼ pajjiżi spiss jitkellmu bla ma jaħsbuha. Il-​mod bla tattika taʼ kif kont nesprimi ruħi spiss kien iweġġaʼ lil marti. Kelli nitgħallem inkun iktar ġentili.”

X’inhi s-​soluzzjoni? Tassumix li martek trid min ikellimha bl-​istess mod li mdorri bih int. (Filippin 2:3, 4) Il-​parir li l-​appostlu Pawlu ta lil missjunarju hu taʼ għajnuna wkoll għal dawk li għadhom kif iżżewġu. Hu kiteb: “Ilsir tal-​Mulej m’għandux għalfejn jiġġieled, imma għandu jkun ġentili.” Fil-​Grieg oriġinali, il-​kelma tradotta “ġentili” tistaʼ tiġi tradotta wkoll bħala bit-​“tattika.” (2 Timotju 2:24; nota taʼ taħt) It-​tattika hija l-​abbiltà biex wieħed jagħraf kemm tkun delikata sitwazzjoni u biex jittratta l-​kwistjoni b’ġentilezza, mingħajr ma jweġġaʼ lil ħadd.

IPPROVA DAN: Meta martek tirritak, immaġina li minflok qed tkellem lilha, int qed titkellem maʼ ħabib veru jew mal-​imgħallem tiegħek. Kieku xorta tuża l-​istess ton taʼ leħen jew għażla taʼ kliem? Imbagħad aħseb f’raġunijiet għala martek jixirqilha li tkellimha b’iżjed rispett u tattika saħansitra iktar minn ħabibek jew l-​imgħallem tiegħek.—Kolossin 4:6.

IT-​3 ABBILTÀ. TGĦALLEM ADATTA GĦALL-​IRWOL IL-​ĠDID TIEGĦEK

X’inhi l-​isfida? Għall-​ewwel, raġel miżżewweġ jistaʼ juża l-​irwol tiegħu bħala kap tal-​familja b’guffaġni, jew mara miżżewġa tistaʼ ma tkunx imdorrija tagħmel suġġerimenti bit-​tattika. Pereżempju, Antonio, raġel miżżewweġ fl-​Italja, jgħid: “Missieri kważi qatt ma kien jieħu l-​opinjoni taʼ ommi dwar deċiżjonijiet tal-​familja. Allura, għall-​ewwel, kont nikkmanda lil familti qisni kont xi re.” Debbie, mara miżżewġa fil-​Kanada, tgħid: “Lir-​raġel għedtlu li kellu jkun iktar ordinat. Iżda l-​fatt li qgħadt ngħidlu x’għandu jagħmel serva biss biex iżjed iwebbes rasu.”

X’inhi s-​soluzzjoni għal raġel miżżewweġ? Xi rġiel miżżewġin iħawdu dak li l-​Bibbja tgħid dwar is-​sottomissjoni tal-​mara maʼ dak li tgħid dwar l-​ubbidjenza taʼ tifel lejn il-​ġenitur tiegħu. (Kolossin 3:20; 1 Pietru 3:1) Madankollu, il-​Bibbja tgħid li r-​raġel miżżewweġ għandu “jingħaqad maʼ martu, u t-​tnejn ikunu ġisem wieħed”; ma tgħidx l-​istess dwar ġenitur u ibnu. (Mattew 19:5) Ġeħova jiddeskrivi l-​mara miżżewġa bħala s-​sieħba li taqbel maʼ żewġha, jew li timla n-​nuqqas tiegħu. (Ġenesi 2:18) Qatt ma jirreferi għar-​relazzjoni bejn iben u ġenitur b’dan il-​mod. X’taħseb—jekk raġel jittratta lil martu bħal ibnu, ikun qed jonora l-​arranġament taż-​żwieġ?

Fil-​fatt, il-​Kelma taʼ Alla tħeġġek tittratta lil martek bl-​istess mod li Ġesù jittratta lill-​kongregazzjoni Kristjana. Int tistaʼ tagħmilha eħfef għal martek biex tqisek bħala l-​kap tagħha jekk (1) ma tistenniex minnha li tesprimi s-​sottomissjoni lejk mill-​ewwel u b’mod perfett u (2) tħobbha bħalma tħobb lil ġismek stess, anki meta jqumu d-​diffikultajiet.—Efesin 5:25-​29.

X’inhi s-​soluzzjoni għal mara miżżewġa? Agħraf li żewġek issa huwa l-​kap maħtur tiegħek minn Alla. (1 Korintin 11:3) Jekk tonora lil żewġek, tonora lil Alla. Jekk ma taċċettax l-​irwol tiegħu taʼ kap, int ma turix biss dak li tħoss dwar żewġek imma wkoll dwar Alla u l-​ħtiġijiet tiegħu.—Kolossin 3:18.

Meta tiddiskuti kwistjonijiet taʼ sfida, tgħallem attakka l-​problema—mhux il-​karattru taʼ żewġek. Pereżempju, is-​Sultana Ester riedet li żewġha, is-​Sultan Aħasweru, jirranġa inġustizzja. Minflok ma attakkatu personalment, hi esprimiet ruħha bit-​tattika. Żewġha aċċetta s-​suġġeriment tagħha u fl-​aħħar għamel il-​ħaġa t-​tajba. (Ester 7:1-​4; 8:3-​8) Ir-​raġel tiegħek x’aktarx li se jħobbok b’mod iktar profond jekk (1) tagħtih iż-​żmien biex jitgħallem iwettaq l-​irwol ġdid tiegħu bħala kap taʼ familja u (2) tittrattah b’rispett, anki meta jiżbalja.—Efesin 5:33.

IPPROVA DAN: Minflok ma tieħu nota taʼ kif taħseb li l-​persuna li żżewwiġt għandha bżonn tinbidel, żomm lista tal-​affarijiet li int għandek bżonn tbiddel. Irġiel miżżewġin: Meta tonqsu lin-​nisa tagħkom bil-​mod kif twettqu jew ma twettqux l-​irwol tagħkom taʼ kap, staqsuhom kif tistgħu titjiebu, u mbagħad iktbu s-​suġġeriment. Nisa miżżewġin: Meta l-​irġiel tagħkom iħossu li mhux qed jintwerew rispett, staqsuhom kif tistgħu tmorru għall-​aħjar u iktbu s-​suġġeriment.

Kun Raġunevoli f’Dak li Tistenna fiż-​Żwieġ

Iż-​żmien li tieħu biex titgħallem kif iżżomm relazzjoni bilanċjata u feliċi fiż-​żwieġ jistaʼ jitqabbel maʼ li titgħallem issuq rota. Tistenna li taqaʼ xi ftit sakemm issir kunfidenti bħala ċiklista. Bl-​istess mod, għandek tistenna li se tagħmel xi ftit żbalji imbarazzanti sakemm tikseb l-​esperjenza fiż-​żwieġ.

Żomm sens taʼ umoriżmu. Ħu bis-​serjetà dak li jinkwieta dwaru s-​sieħeb jew is-​sieħba tiegħek, imma tgħallem idħaq bl-​iżbalji banali tiegħek stess. Aħtfu opportunitajiet biex tferrħu lil xulxin matul l-​ewwel sena taż-​żwieġ tagħkom. (Dewteronomju 24:5) Fuq kollox, ħallu l-​Kelma taʼ Alla tiggwida r-​relazzjoni tagħkom. Jekk tagħmlu dan, iż-​żwieġ tagħkom se jissaħħaħ sena wara l-​oħra.

[Noti taʼ taħt]

STAQSI LILEK INNIFSEK . . .

▪ Għamilt jien lill-​persuna li żżewwiġt l-​iktar waħda li nafda fiha, jew nippreferi nieħu l-​opinjoni tal-​oħrajn?

▪ F’dawn l-​aħħar 24 siegħa, x’għamilt speċifikament li juri li nħobbha u nirrispettaha?

[Kaxxa/Stampi f’paġna 11, 12]

Il-​Bibbja Salvat iż-​Żwieġ Tagħna

Għall-​ewwel li żżewġu, Toru u Akiko kienu jinħabbu. Iżda tmien xhur biss wara, din il-​koppja Ġappuniża ddeċidiet li tiddivorzja. Huma jirrakkontaw x’ġara.

Toru: “Skoprejt li jien u marti ma konniex naqblu daqs kemm ħsibt. Pereżempju, meta konna naraw it-​televixin, jien kont inħobb nara l-​isports, imma hi kienet tħobb id-​drammi. Lili kien jogħġobni l-​ħruġ, imma hi kienet tippreferi toqgħod ġewwa.”

Akiko: “Toru kien jagħmel kulma kienet tgħidlu l-​familja tiegħu, imma ma kienx jitlob l-​opinjoni tiegħi. Staqsejtu, ‘Min hu l-​iktar importanti għalik, jien jew ommok?’ Ukoll, bqajt mistagħġba kif Toru kien jgħawweġ il-​verità. Għedtlu li gidba twassal għal oħra u jekk ma jiqafx, iż-​żwieġ tagħna ma kellux idum.”

Toru: “Kont inħossni frustrat u staqsejt lil kollega taʼ fuqi għal parir dwar kif kelli nittratta maʼ marti. Qalli, ‘Sempliċement għidilha tagħlaqlu. Jekk tgerger, xejjirhielha.’ Darba minnhom tajtha daqqa taʼ ħarta u qlibt il-​mejda. Iġġilidna bl-​ikrah u telqet. Kelli nġibha lura minn lukanda f’Tokjo. Fl-​aħħar iddeċidejna li niddivorzjaw. Hekk kif tlaqt għall-​uffiċċju dik l-​għodwa, marti bdiet tippakkja ħwejjiġha.”

Akiko: “X’ħin kont ħierġa lejn il-​bieb taʼ barra bil-​bagalji f’idejja, il-​qanpiena tad-​dar daqqet. Kien hemm mara fil-​bieb. Kienet waħda mix-​Xhieda taʼ Ġeħova. Għedtilha tidħol ġewwa.”

Toru: “Meta wasalt l-​uffiċċju bdejt nerġaʼ naħsibha dwar id-​divorzju, allura għaġġilt lura d-​dar. Meta wasalt, sibt lil Akiko titkellem maʼ din il-​mara. Il-​mara qaltli: ‘Għandkom bżonn xi ħaġa li t-​tnejn li intom tistgħu tagħmlu flimkien. Tixtiequ tistudjaw il-​Bibbja?’ ‘Iva,’ għedtilha, ‘nagħmel minn kollox, basta nsalva ż-​żwieġ tagħna!’”

Akiko: “Il-​mara għamlet arranġamenti biex nistudjaw il-​Bibbja. Il-​folja nqalbet meta qrajna d-​deskrizzjoni li tagħti l-​Bibbja għall-​arranġament taż-​żwieġ. Tgħid: ‘Huwa għalhekk li raġel iħalli lil missieru u lil ommu u jrid jingħaqad maʼ martu u huma jsiru ġisem wieħed.’”—Ġenesi 2:24.

Toru: “Mill-​ewwel fhimt il-​punt fl-​iskrittura. Għedt lill-​ġenituri tiegħi, ‘Minn issa ’l quddiem se niddiskuti l-​affarijiet maʼ marti qabel ma nieħu xi deċiżjoni.’ Ukoll, waqaft nixrob iżżejjed. U meta tgħallimt li Alla jobgħod il-​gideb, ipprovajt ngħid biss il-​verità.”

Akiko: “Jien ukoll inbdilt. Pereżempju, kont nisfida lil Toru. Imma meta rajt kemm kien qed japplika l-​prinċipji tal-​Bibbja bdejt nappoġġah iktar. (Efesin 5:22-​24) Issa ilna iktar minn 28 sena miżżewġin u ferħanin. Stajna negħlbu l-​problemi tagħna billi sirna nafu lil xulxin aħjar u billi applikajna l-​pariri għaqlin misjubin fil-​Bibbja.”