X’Tiftakar?

Qrajt bir-​reqqa l-​ħarġiet reċenti taʼ It-​Torri tal-​Għassa? Ara jekk tistax twieġeb il-​mistoqsijiet li ġejjin:

Salamun f’liema sens jistaʼ jkun t’eżempju taʼ twissija għalina?

Alla bierek u uża lis-​Sultan Salamun. Iżda matul ir-​renju tiegħu, Salamun ma baqax jobdi l-​pariri t’Alla. Minbarra li żżewweġ lil bint il-​Fargħun li kienet pagana, iżżewweġ ukoll ħafna nisa oħrajn, u ppermetta li bil-​mod il-​mod in-​nisa pagani jwassluh biex jaqdi allat foloz. Jeħtieġ li aħna nevitaw li bil-​mod il-​mod niżviluppaw attitudnijiet jew tendenzi ħżiena. (Dt. 7:1-​4; 17:17; 1 Slat. 11:4-​8)​—12/15, paġni 10-​12.

Il-​missirijiet kif jistgħu jibqgħu qrib uliedhom subien?

Inkludi lil ibnek fl-​attivitajiet tiegħek taʼ kuljum. Warrab il-​ħin biex tilgħab miegħu. Regolarment, aqralu xi storja qabel imur jorqod, u isimgħu jesprimi l-​ferħ u t-​tħassib tiegħu tal-​ġurnata. Hu u jikber kompli agħmel attivitajiet pjaċevoli miegħu. Esprimi l-​approvazzjoni u l-​affezzjoni għax dawn se jgħinu lil ibnek ikollu iżjed fiduċja fih innifsu.—1/1, paġni 24-​26.

Kif nafu jekk l-​art hix se tispiċċa fl-​2012?

Xi wħud jaħsbu li d-​dinja se tispiċċa fl-​2012 minħabba t-​tmiem tal-​perijodu fil-​kalendarju tal-​qedem tal-​Maja. Imma dan mhuwiex possibbli għax Ġeħova ħalaq l-​art biex tkun abitata. Il-​Bibbja tgħid li l-​art se tibqaʼ għal dejjem. (Ekk. 1:4; Is. 45:18)—1/1, paġna 10.

X’jindika li mill-​ewwel seklu ’l quddiem dejjem kien hemm xi wħud mill-​Kristjani midlukin ġenwini fuq l-​art?

Fil-​parabbola taʼ Ġesù dwar “il-​qamħ” u “s-​sikrana,” iż-​“żerriegħa t-​tajba” kienet tfisser “ulied is-​saltna.” (Mt. 13:24-​30, 38) Is-​sikrana kellha tikber flimkien mal-​qamħ sa żmien il-​ħsad. Għalhekk, minkejja li ma nistgħux ngħidu min kienu dawk li jirrappreżentaw il-​qamħ, żgur li dejjem kien hawn xi wħud minnhom fuq l-​art sa żmienna.​—1/15, paġna 7.

Liema tliet passi importanti se jgħinuna niksbu l-​iktar benefiċċju mill-​istudju personali tagħna tal-​Bibbja?

(1) Kun ċert li l-​ewwel titlob lil Ġeħova jagħtik l-​attitudni mentali xierqa u l-​ispirtu qaddis tiegħu. (2) Kultant ieqaf biex timmedita fuq dak li tkun qed taqra. (3) Agħmel sforz u fil-​ħajja taʼ kuljum applika dak li titgħallem.—1/15, paġna 15.

Kif nistgħu negħlbu t-​tendenza negattiva tal-​għira?

Xi passi li jistgħu jkunu t’għajnuna huma: Stinka biex tkattar l-​imħabba u l-​affezzjoni lejn l-​aħwa, agħmilha maʼ nies li jħobbu lil Alla, fittex li tagħmel it-​tajjeb, u ‘ifraħ maʼ min jifraħ.’ (Rum. 12:15)​—2/15, paġni 16-​17.

Meta tagħti parir, liema prinċipji għandek iżżomm f’moħħok?

Ifhem is-​sitwazzjoni sew. Evita li twieġeb bla ma taħsibha. Applika l-​Kelma t’Alla bl-​umiltà. Jekk inhu possibbli, uża l-​librerija teokratika. Evita li tieħu deċiżjonijiet għal oħrajn.​—3/15, paġni 7-​9.

Ġesù ħeġġeġ lis-​semmiegħa tiegħu biex jimxu t-​tieni kilometru. (Mt. 5:41) X’ried ifisser b’dan?

Il-​poplu taʼ Iżrael f’dak iż-​żmien kien taħt ir-​Rumani, li setgħu jisforzaw raġel biex jaħdem għalihom. Meta Ġesù ħeġġeġ lis-​semmiegħa tiegħu biex jimxu t-​tieni kilometru, hu kien qed jgħidilhom biex mingħajr stmerrija jwettqu s-​servizzi li l-​awtoritajiet jitolbu minnhom bi dritt.​—4/1, paġna 9.