Kif inhu ffinanzjat ix-​xogħol tagħna?

Kull sena, nipprintjaw u nqassmu mijiet taʼ miljuni taʼ Bibbji u letteratura oħra. Nibnu u nieħdu ħsieb l-​uffiċċji tal-​fergħat madwar id-​dinja. Għaxriet taʼ eluf taʼ kongregazzjonijiet jiltaqgħu f’postijiet għall-​qima modesti imma attraenti, imsejħin Swali tas-​Saltna. Min iħallas għal dan kollu?

Ix-​xogħol tagħna hu appoġġat għalkollox minn donazzjonijiet volontarji. (2 Korintin 9:7) Fl-​1879, it-​tieni ħarġa taʼ din ir-​rivista qalet: “Aħna nemmnu li ĠEĦOVA hu l-​wieħed li jappoġġa lil ‘Zion’s Watch Tower,’ [kif kienet tissejjaħ din ir-​rivista dak iż-​żmien] u ladarba dan il-​fatt huwa minnu din [l-​organizzazzjoni] qatt m’hi se tittallab jew titlob lin-​nies għall-​appoġġ.” Qatt ma tħarrikna minn dan ir-​raġunar.

Id-​donazzjonijiet jintbagħtu direttament lil wieħed mill-​uffiċċji tal-​fergħa tagħna jew jitpoġġew f’kaxxa għall-​kontribuzzjonijiet li tinsab f’kull Sala tas-​Saltna. Imma qatt ma nitolbu dieċmi, nagħmlu ġbir, jew inżommu l-​flus għas-​servizzi jew pubblikazzjonijiet tagħna. Ma nitħallsux talli nippritkaw, biex ngħallmu fil-​kongregazzjoni, jew biex ngħinu fil-​bini taʼ postijiet għall-​qima. Wara kollox, Ġesù qal: “Irċivejtu b’xejn, agħtu b’xejn.” (Mattew 10:8) Il-​volontieri kollha fl-​uffiċċji tal-​fergħa u fil-​kwartieri ġenerali tagħna, inkluż dawk li jifformaw il-​Ġemgħa li Tiggverna tax-​Xhieda taʼ Ġeħova, huma membri taʼ ordni reliġjuż li ma jirċivux salarju.

Fondi mogħtijin jintużaw ukoll għall-​għajnuna meta jkun hemm xi diżastru. Kien il-​pjaċir tal-​Kristjani tal-​bidu li jgħinu lill-​vittmi tat-​traġedji. (Rumani 15:26) Bl-​istess mod, aħna ngħinu lil dawk milqutin minn xi diżastru billi nerġgħu nibnulhom id-​djar u l-​postijiet għall-​qima tagħhom u billi nipprovdu ikel, ħwejjeġ, u kura medika.