Inwettqu L-​Wegħda Tagħna Jum Wara L-​Ieħor

¹ Is-​salmista David ġie mqanqal biex jiddikjara lil Jehovah: “Jien se nagħmel melodija lil ismek għal dejjem, biex inkun nistaʼ nwettaq il-​wegħdi tiegħi jum wara jum.” (Salm 61:8) David kien jaf li meta wieħed jagħmel wegħda, jagħmel hekk minn jeddu. Madankollu, irrikonoxxa wkoll li jekk għamel wegħda, kellu d-​dmir li jwettaqha. Minkejja dan, hu faħħar lil Jehovah għall-​opportunità li jwettaq il-​wegħdi tiegħu jum wara l-​ieħor.

² Meta għamilna d-​dedikazzjoni tagħna lil Jehovah, aħna wegħedna minn jeddna li nagħmlu r-​rieda tiegħu. Ċħadna lilna nfusna u għamilnieha l-​mira primarja tagħna fil-​ħajja li naqdu lil Jehovah. (Luqa 9:​23) B’hekk, aħna wkoll irridu nwettqu l-​wegħda tagħna jum wara l-​ieħor. (Ekkl. 5:​4-6) Id-​dikjarazzjoni pubblika tagħna li għamilna meta tgħammidna bl-​ilma għandha tiġi riflessa mill-​bixra tal-​ħajja tagħna kollha kemm hi, peress li nafu li “bil-​fomm wieħed jagħmel dikjarazzjoni pubblika għas-​salvazzjoni.” (Rum. 10:10) Dan jinkludi li nippridkaw l-​aħbar tajba. (Ebr. 13:15) Iċ-​ċirkostanzi persunali jvarjaw ħafna, imma lkoll kemm aħna nistgħu nżommu quddiem għajnejna jum wara l-​ieħor l-​importanza taʼ li naqsmu l-​aħbar tajba m’oħrajn.

³ Noħolqu Opportunitajiet Biex Nippridkaw Kuljum: Li wieħed jaqsam l-​aħbar tajba maʼ xi ħadd ieħor hija esperjenza mimlija ferħ. Sabiex nagħmlu dan kuljum, jeħtieġ li noħolqu opportunitajiet biex nippridkaw meta ċ-​ċirkostanzi tagħna jippermettu. Kienu ħafna l-​esperjenzi sbieħ li gawdew dawk li ħadu l-​inizjattiva biex jagħtu xiehda informali lil individwi fuq ix-​xogħol jew fl-​iskola u lil ġirien jew oħrajn li jiltaqgħu magħhom kuljum. Saħansitra li niktbu l-​ittri jew li nużaw it-​telefon jistgħu jkunu mezz biex nagħtu xiehda lil oħrajn. Li nieħdu vantaġġ minn dawn il-​mezzi kollha, flimkien maʼ li nwarrbu ħin regolarment għal għoti taʼ xiehda minn dar għal dar u li nagħmlu żjajjar lura, jistgħu jwasslu għall-​ferħ speċjali li jiġi meta nikkonduċu studju tal-​Bibbja fid-​dar. Iva, kuljum jistaʼ jirnexxilna noħolqu opportunitajiet biex nippridkaw.

⁴ Waħda oħt bdiet taqra Examining the Scriptures Daily waqt il-​ħin tal-​mistrieħ tagħha fuq ix-​xogħol. Hi stiednet lil waħda li kienet taħdem magħha biex taqra t-​test tal-​ġurnata magħha, u dan malajr wassal għal studju tal-​Bibbja mal-​mara. Kienu jistudjaw nofs siegħa kuljum, ħamest ijiem fil-​ġimgħa. Xi ħadd ieħor li kien jaħdem magħhom osserva l-​istudju taʼ kuljum tagħhom. Eventwalment hu identifika lilu nnifsu bħala ħu inattiv. Imqanqal miż-​żelu taʼ l-​oħt, dan għamel kuntatt m’anzjan sabiex jerġaʼ jsir attiv. Din l-​oħt messet b’mod pożittiv lil żewġ ħajjiet oħrajn billi baqgħet twettaq il-​wegħda tagħha jum wara l-​ieħor.

⁵ Se jkollna l-​ferħ u s-​sodisfazzjon jekk aħna, imqanqlin minn qalb imfawra b’apprezzament għall-​affarijiet tajbin kollha li Jehovah għamel għalina, inwettqu l-​wegħda tagħna taʼ dedikazzjoni bl-​aħjar mod li nistgħu kuljum. Bħas-​salmista, nistgħu niddikjaraw: “Jien infaħħrek, O Jehovah Alla tiegħi, b’qalbi kollha, u se nigglorifika lil ismek għal żmien indefinit.”​—Salm 86:12.