‘Jehovah L-għajnuna Tiegħi’
1 Meta Ġesù inkariga lill-ewwel dixxipli tiegħu, hu qalilhom: “Ara, jiena qiegħed nibgħatkom bħal nagħaġ qalb l-ilpup.” (Mt. 10:16) Ġagħalhom dan isiru beżgħanin u jżommu lura? Le. Huma adottaw l-attitudni li iktar tard ġiet espressa mill-appostlu Pawlu meta qal lil sħabu l-Kristjani: “Ngħidu b’qalbna qawwija: ‘Il-Mulej l-għajnuna tiegħi: jien ma nibżax: x’jistaʼ jagħmilli l-bniedem?’” (Lhud 13:6) Huma kienu jifirħu li setgħu jkunu denji li jiġu ddiżonorati minħabba isem Ġesù, u komplew mingħajr waqfien jgħallmu u jiddikjaraw l-aħbar tajba.—Atti 5:41, 42.
2 Illum, ix-xogħol taʼ l-ippridkar madwar id-dinja wasal fl-istadji finali tiegħu. Bħalma bassar Ġesù, aħna sirna oġġetti taʼ mibegħda għall-ġnus kollha. (Mt. 24:9) Ix-xogħol tagħna taʼ l-ippridkar ġie opponut u rridikolat, u f’xi partijiet taʼ l-art, saħansitra ġie pprojbit. Kieku tkun qed tonqosna l-fidi, konna nistgħu nħossuna beżgħanin. Madankollu, il-fatt li nafu li Jehovah huwa l-Għajnuna tagħna jirrifreskana u jsaħħaħna biex nipperseveraw.
3 Il-kuraġġ huwa l-kwalità taʼ li tkun b’saħħtek, qalbieni, taʼ ħila. Huwa l-oppost taʼ biżaʼ, mistħija, u ġjufija. Id-dixxipli taʼ Ġesù dejjem kellhom bżonn il-kuraġġ biex jissaportu. Huwa essenzjali jekk irridu nevitaw li nkunu skuraġġiti mill-attitudnijiet u l-azzjonijiet taʼ dinja li hi l-għadu taʼ Alla. Kemm ninkuraġġixxu rwieħna meta naħsbu fuq l-eżempju eċċellenti taʼ Ġesù, konkwistatur tad-dinja! (Ġwann 16:33) Ftakar ukoll fl-appostli, li meta kienu ffaċċjati minn provi ħorox, qalbenin iddikjaraw: “Jeħtieġ nobdu aktar lil Alla milli l-bnedmin.”—Atti 5:29.
4 M’Aħniex minn Dawk li Jerġgħu Lura: Irridu nistinkaw biex inżommu attitudni pożittiva lejn ix-xogħol tagħna. (Lhud 10:39) Dejjem żomm f’moħħok li aħna qed niġu mibgħutin minn Jehovah bħala espressjoni taʼ l-imħabba u l-ħniena tiegħu lejn l-umanità. Hu qatt ma jitlob lill-qaddejja tiegħu biex jagħmlu kwalunkwe ħaġa li ma sservix skop utli. Kulma niġu inkarigati nagħmlu fl-aħħar mill-aħħar se jiswa għall-ġid taʼ dawk li jħobbu lil Alla.—Rum. 8:28.
5 Ħarsa ottimista se tgħinna nkomplu nfittxu l-uħud bħal nagħaġ fit-territorju tagħna. Nistgħu nqisu l-apatija li juru n-nies bħala espressjoni tal-frustrazzjoni u n-nuqqas taʼ tama tagħhom. Ħalli l-imħabba tagħna tqanqalna nkunu simpatetiċi u paċenzjużi. Kull meta nħallu l-letteratura jew inkella nindunaw b’xi xrara taʼ interess, il-mira tagħna għandha tkun li nagħmlu żjara lura mill-ewwel u nistimulaw iktar interess. M’għandna qatt niddubitaw l-abbiltà tagħna li nibdew studju tal-Bibbja jew li nikkonduċuh b’mod effettiv. Minflok, għandna l-ħin kollu nfittxu l-għajnuna u d-direzzjoni taʼ Jehovah bit-talb, fiduċjużi li hu se jgħinna.
6 Aħna b’mod sod nemmnu li Jehovah se jiżgura li x-xogħol se jitlesta. (Qabbel Filippin 1:6.) Il-fiduċja sħiħa tagħna fih bħala l-Għajnuna tagħna ssaħħaħna, sabiex “ma negħjew qatt nagħmlu l-ġid.”—Gal. 6:9.