“Agħmel il-​Ħila u Qawwi Qalbek!”

“Agħmlu l-​qalb: jiena rbaħt id-​dinja!”—Ġwann 16:33.

1. Minħabba dak li kien hemm lest għall-​Iżraelin f’Kangħan, liema inkuraġġiment ngħataw?

META l-​Iżraelin kienu waslu biex jgħaddu mix-​Xmara Ġordan għal ġo l-​Art Imwiegħda, Mosè qalilhom: “Agħmlu l-​ħila u qawwu qalbkom; tibżgħux u titregħdux quddiemhom; għax hu, il-​Mulej, Alla tiegħek, se jimxi miegħek.” Imbagħad Mosè sejjaħ lil Ġożwè, li kellu jmexxi lil Iżraelin għal ġo Kangħan, u reġaʼ tah il-​parir b’mod persunali biex ikun kuraġġuż. (Dewteronomju 31:​6, 7) Iktar tard, Jehovah stess ħeġġeġ lil Ġożwè billi qallu: “Agħmel il-​ħila u qawwi qalbek . . . Biss agħmel il-​ħila u qawwi qalbek.” (Ġożwè 1:​6, 7, 9) Dan il-​kliem kien f’waqtu. L-​Iżraelin kien se jkollhom bżonn il-​kuraġġ biex jiffaċċjaw l-​għedewwa qawwija li kienu se jsibu fuq in-​naħa l-​oħra tal-​Ġordan.

2. F’liema sitwazzjoni ninsabu llum, u x’għandna bżonn?

² Illum, il-​Kristjani veri dalwaqt se jgħaddu għal ġod-​dinja l-​ġdida mwiegħda u, bħal Ġożwè, iridu jkunu kuraġġużi. (2 Pietru 3:13; Apokalissi 7:14) Madankollu, is-​sitwazzjoni tagħna hija differenti minn dik taʼ Ġożwè. Ġożwè ġġieled bix-​xwabel u l-​lanez. Aħna niġġieldu gwerra spiritwali u qatt ma nużaw armi letterali. (Isaija 2:​2-4; Efesin 6:​11-17) Iktar minn hekk, Ġożwè kellu jiġġieled ħafna gwerer qalila saħansitra wara li daħal fl-​Art Imwiegħda. Iżda aħna nġarrbu battalji qalila issa—qabel ngħaddu għal ġod-​dinja l-​ġdida. Ejja neżaminaw xi sitwazzjonijiet li fihom irridu nuru kuraġġ.

Għala Rridu Niġġieldu?

3. X’turina l-​Bibbja dwar l-​għadu ewlieni tagħna?

³ L-​appostlu Ġwanni kiteb: “Nafu li aħna ġejjin minn Alla u li d-​dinja kollha qiegħda taħt idejn il-​Ħażin.” (1 Ġwann 5:19) Dan il-​kliem jagħti raġuni bażika għala l-​Kristjani jridu jiġġieldu biex iżommu sħaħ fil-​fidi. Meta Kristjan iżomm l-​integrità tiegħu, sa ċertu punt, ikun qed iġiegħel lil Satana x-​Xitan jitlef. Għalhekk, Satana jaġixxi bħal “iljun jgħajjat” li qed jipprova jbeżżaʼ u jiblaʼ lill-​Kristjani leali. (1 Pietru 5:8) Fil-​fatt, hu qed jagħmel gwerra kontra l-​Kristjani midlukin u sħabhom. (Apokalissi 12:17) F’din il-​gwerra, hu juża lill-​bnedmin biex jaqdu l-​iskopijiet tiegħu sew jekk jafu u sew jekk ma jafux. Irridu l-​kuraġġ biex inkunu nistgħu nieqfu sodi kontra Satana u l-​aġenti kollha tiegħu.

4. Liema twissija ta Ġesù, imma liema kwalità wrew il-​Kristjani veri?

⁴ Peress li Ġesù kien jaf li Satana u l-​aġenti tiegħu kienu se jopponu kemm jifilħu l-​aħbar tajba, hu wissa lis-​segwaċi tiegħu: “Jagħtukom f’idejn min iħabbatkom u joqtolkom; u l-​ġnus kollha jsiru jobogħdukom minħabba f’ismi.” (Mattew 24:9) Dan il-​kliem seħħ fl-​ewwel seklu, u għadu jseħħ illum. Tabilħaqq, il-​persekuzzjoni li ssaportew xi wħud mix-​Xhieda taʼ Jehovah taʼ żmienna hija ħarxa daqs kull persekuzzjoni li qatt seħħet qabel. Xorta waħda, il-​Kristjani veri juru li huma kuraġġużi meta jiffaċċjaw pressjoni bħal din. Huma jafu li “min jibżaʼ mill-​bniedem jaqaʼ fi xkiel,” u huma ma jridux jinqabdu fi xkiel, jew f’nassa.—Proverbji 29:25.

5, 6. (a) F’liema sitwazzjonijiet jeħtieġ li nkunu kuraġġużi? (b) Il-​Kristjani leali kif jirreaġixxu meta l-​kuraġġ tagħhom jiġi testjat?

⁵ Hemm sfidi oħra minbarra l-​persekuzzjoni li meta niffaċċjawhom irridu l-​kuraġġ. Xi wħud isibuha diffiċli biex ikellmu lil min ma jafuhx dwar l-​aħbar tajba. Il-​kuraġġ taʼ xi tfal taʼ l-​iskola jiġi testjat meta jġagħluhom jgħidu bl-​amment xi ġurament taʼ fedeltà lejn il-​pajjiż jew lejn il-​bandiera. Peress li wegħda bħal din hi prattikament espressjoni reliġjuża, it-​tfal Kristjani ddeċidew bil-​qlubija li jaġixxu b’tali mod li jogħġob ’l Alla, u l-​imġiba mill-​aħjar tagħhom tferrħilna qalbna.

⁶ Aħna wkoll niġu bżonn il-​kuraġġ meta dawk li jopponuna jinfluwenzaw il-​mezzi tax-​xandir biex ixerrdu rapporti ħżiena dwar il-​qaddejja t’Alla jew meta jipprovaw jillimitaw il-​qima vera billi jippjanaw il-​“qerq taħt il-​libsa tal-​liġi.” (Salm 94:20) Per eżempju, kif għandna nħossuna meta l-​gazzetta, ir-​radju, jew it-​televixin jirrapporta informazzjoni qarrieqa jew gideb sfaċċat dwar ix-​Xhieda taʼ Jehovah? Għandna ninħasdu? Le. Dawn l-​affarijiet nistennewhom. (Salm 109:2) U ma niskantawx meta xi wħud jemmnu l-​qerq u l-​gideb li jiġi pubblikat, peress li “min moħħu dgħajjef jemmen kollox.” (Qwiel 14:​15, Saydon) Madankollu, il-​Kristjani leali jirrifjutaw li jaqbdu u jemmnu kull stqarrija li ssir dwar ħuthom, u żgur li ma jħallux ir-​rapporti foloz itellfulhom il-​laqgħat Kristjani, jew iġagħluhom jieħdu inqas sehem fil-​ministeru, jew jiddgħajfu fil-​fidi. Mhux talli hekk, talli ‘jqisu ruħhom bħala ministri taʼ Alla, fil-​ġieħ u fl-​għajb, kemm jekk jgħidu l-​ħażin u kemm jekk jgħidu t-​tajjeb fuqhom; iżommuhom bħala nies qarrieqa [skond dawk li jopponuhom], lilhom li [fir-realtà] jgħidu s-​sewwa.’—2 Korintin 6:​4, 8.

7. B’liema mistoqsijiet nistgħu neżaminaw lilna nfusna?

⁷ Meta Pawlu kien qed jikteb lil Timotju, hu qallu: “Alla ma taniex spirtu taʼ biżaʼ, imma Spirtu taʼ qawwa . . . Mela tistħi xejn minħabba fix-​xhieda għal Sidna.” (2 Timotju 1:​7, 8; Mark 8:38) Wara li naqraw dan il-​kliem, nistgħu nistaqsu lilna nfusna: ‘Nistħi jien minħabba t-​twemmin tiegħi, jew jien kuraġġuż? Fejn naħdem (jew fejn immur skola), ngħidilhom lil dawk taʼ madwari li jien Xhud taʼ Jehovah, jew nipprova naħbilhom x’jien? Nistħi għax jien differenti mill-​oħrajn, jew jien kburi li nispikka minħabba r-​relazzjoni tiegħi maʼ Jehovah?’ Jekk hemm xi ħadd li jħossu jibżaʼ jippriedka l-​aħbar tajba jew jieħu waqfa għat-​twemmin differenti li għandu, jalla jiftakar fil-​parir li Jehovah ta lil Ġożwè: “Agħmel il-​ħila u qawwi qalbek.” Qatt tinsa li m’hijiex l-​opinjoni taʼ sħabek tax-​xogħol jew taʼ l-​iskola li tgħodd iżda l-​ħarsa taʼ Jehovah u Ġesù Kristu.—Galatin 1:10.

Kif Niżviluppaw il-​Kuraġġ

8, 9. (a) F’okkażjoni waħda, il-​kuraġġ tal-​Kristjani tal-​bidu kif ġie testjat? (b) Pietru u Ġwanni kif irreaġixxew meta ġew mhedda, u huma u ħuthom x’esperjenzaw?

⁸ Kif nistgħu niżviluppaw it-​tip taʼ kuraġġ li se jgħinna nżommu l-​integrità tagħna matul dawn iż-​żminijiet diffiċli? Fi qbil maʼ dan, il-​Kristjani tal-​bidu kif żviluppaw il-​kuraġġ? Ikkunsidra x’ġara meta l-​qassisin ewlenin u l-​irġiel ixjeħ f’Ġerusalemm qalu lil Pietru u lil Ġwanni biex jieqfu jippridkaw f’isem Ġesù. Id-​dixxipli m’aċċettawx u ġew mhedda u mbagħad inħelsu. Eżatt wara, huma ngħaqdu maʼ ħuthom u talbu lkoll flimkien billi qalu: “Mulej, ħares lejn it-​tehdid tagħhom, u agħmel li l-​qaddejja tiegħek ixandru kelmtek bil-​kuraġġ kollu.” (Atti 4:​13-29) Bi tweġiba għat-​talba tagħhom, Jehovah saħħaħhom bl-​ispirtu qaddis, u bħalma ddikjaraw iktar tard il-​mexxejja Lhud, huma ‘mlew ’il Ġerusalemm’ bit-​tagħlim tagħhom.—Atti 5:28.

⁹ Ejja neżaminaw x’ġara f’din l-​okkażjoni. Meta d-​dixxipli kienu mhedda mill-​mexxejja Lhud, ma kinux bi ħsiebhom iċedu taħt pressjoni. Minflok, id-​dixxipli talbu għall-​kuraġġ biex jibqgħu jippridkaw. Imbagħad, huma aġixxew fi qbil mat-​talba tagħhom, u Jehovah saħħaħhom bl-​ispirtu tiegħu. L-​esperjenza tagħhom turi li dak li kiteb Pawlu f’kuntest differenti xi ftit tas-​snin wara, japplika għall-​Kristjani meta jkunu qed jiġu persegwitati. Pawlu qal: “Għal kollox niflaħ bis-​saħħa taʼ dak li jqawwini.”—Filippin 4:13.

10. L-​esperjenza taʼ Ġeremija kif tgħin lil min hu magħmul mistħi?

¹⁰ Imma, ejja ngħidu li individwu hu magħmul mistħi. Jistaʼ xorta waħda jaqdi lil Jehovah bil-​qlubija meta jiffaċċja l-​oppożizzjoni? Dażgur li jistaʼ! Ftakar kif irreaġixxa Ġeremija meta Jehovah ħatru bħala profeta. Iż-​żagħżugħ qal: “Għadni żgħir.” B’mod ċar, hu ma ħassux kwalifikat. Xorta waħda, Jehovah ħeġġu b’dan il-​kliem: “Tgħidx, ‘Għadni żgħir.’ Int tmur kull fejn nibagħtek, u tgħid kull ma nordnalek. La tibżax minnhom, għax jien miegħek biex neħilsek.” (Ġeremija 1:​6-10) Ġeremija kellu fiduċja f’Jehovah, u minħabba f’hekk, bis-​saħħa taʼ Jehovah hu ma baqax iżomm lura u sar xhud kuraġġuż ferm f’Iżrael.

11. Illum, x’jgħin lill-​Kristjani biex ikunu bħal Ġeremija?

¹¹ Illum, il-​Kristjani midlukin għandhom inkarigu simili għal dak taʼ Ġeremija, u bl-​appoġġ tal-​“kotra kbira” taʼ “nagħaġ oħra,” ikomplu jipproklamaw l-​iskopijiet taʼ Jehovah, anki meta jiffaċċjaw l-​apatija, jiġu ridikolati, u persegwitati. (Apokalissi 7:9; Ġwann 10:16) Huma jqawwu qalbhom bil-​kliem li Jehovah qal lil Ġeremija: “La tibżax.” Huma qatt ma jinsew li ġew inkarigati minn Alla u li qed jippridkaw il-​messaġġ tiegħu.—2 Korintin 2:17.

Eżempji taʼ Kuraġġ taʼ Min Jimitahom

12. Liema eżempju eċċellenti taʼ kuraġġ ipprovda Ġesù, u kif inkuraġġixxa lis-​segwaċi tiegħu?

¹² Nistgħu niġu megħjunin fl-​isforzi tagħna biex niżviluppaw il-​kuraġġ jekk nimmeditaw fuq l-​eżempji taʼ oħrajn li, bħal Ġeremija, aġixxew bil-​kuraġġ. (Salm 77:12) Per eżempju, hekk kif neżaminaw il-​ministeru taʼ Ġesù, aħna nibqgħu impressjonati minħabba l-​kuraġġ li wera meta ġie ttantat minn Satana u meta ffaċċja l-​oppożizzjoni determinata tal-​mexxejja Lhud. (Luqa 4:​1-​13; 20:​19-​47) Bis-​saħħa taʼ Jehovah, Ġesù kien verament sod, u ftit qabel ma miet, hu qal lid-​dixxipli tiegħu: “Fid-​dinja tbatu jkollkom. Iżda agħmlu l-​qalb: jiena rbaħt id-​dinja!” (Ġwann 16:33; 17:16) Jekk id-​dixxipli taʼ Ġesù kienu se jsegwu l-​eżempju tiegħu, huma wkoll kienu se jirbħu. (1 Ġwann 2:6; Apokalissi 2:​7, 11, 17, 26) Iżda kellhom ‘jagħmlu l-​qalb.’

13. Pawlu kif ħeġġiġhom lill-​aħwa taʼ Filippi?

¹³ Xi ftit tas-​snin wara l-​mewt taʼ Ġesù, Pawlu u Sila ntefgħu l-​ħabs ġo Filippi. Iktar tard, Pawlu inkuraġġixxa lill-​aħwa fil-​kongregazzjoni taʼ Filippi biex jibqgħu ‘qawwija fi spirtu wieħed, u jissieltu b’ruħ waħda għall-​fidi taʼ l-​Evanġelju, bla xejn ma jibżgħu minn dawk li jeħduha magħhom.’ Biex isaħħaħhom ħalli jagħmlu dan, Pawlu qalilhom: “Dan [il-fatt li l-​Kristjani jiġu persegwitati] ikun għalihom prova tat-​telfien tagħhom [taʼ dawk li jippersegwitawhom], imma għalikom prova tas-​salvazzjoni; u dan kollu ġej minn Alla, għaliex lilkom ngħatat il-​grazzja li sservu lil Kristu, mhux biss temmnu fih, imma saħansitra tbatu għalih.”—Filippin 1:​27-29.

14. X’kien ir-​riżultat f’Ruma minħabba l-​qlubija taʼ Pawlu?

¹⁴ Meta Pawlu kiteb lill-​kongregazzjoni taʼ Filippi, hu reġaʼ kien il-​ħabs, din id-​darba f’Ruma. Xorta waħda, hu kompla jippriedka lil oħrajn bil-​qlubija. B’liema riżultat? Hu kiteb: “Kull min jinsab fil-​Pretorju u l-​oħrajn kollha lkoll saru jafu li jiena marbut fil-​ħabs għal Kristu, u l-​biċċa l-​kbira taʼ l-​aħwa għamlu l-​qalb fil-​Mulej minħabba fil-​ktajjen tiegħi, u bdew ixandru l-​kelma bil-​kuraġġ u bla biżaʼ taʼ xejn.”—Filippin 1:​13, 14.

15. Fejn nistgħu nsibu eżempji mill-​aqwa taʼ fidi li se jsaħħu d-​determinazzjoni tagħna biex inkunu kuraġġużi?

¹⁵ L-​eżempju taʼ Pawlu jinkuraġġina. Niġu inkuraġġiti wkoll mill-​eżempji li jagħtuna l-​Kristjani taʼ żmienna li ssaportew il-​persekuzzjoni f’pajjiżi taħt it-​tmexxija dittatorjali jew tal-​kleru. Ir-​rakkonti taʼ ħafna minn dawn ġew rapportati fir-​rivisti It-​Torri taʼ l-​Għassa u Stenbaħ! u fil-​Yearbooks of Jehovah’s Witnesses. Hekk kif tkun qed taqra dawn ir-​rakkonti, ftakar li l-​individwi li tkun qed tiġi rakkontata l-​istorja tagħhom kienu nies ordinarji bħalna; iżda meta kienu f’ċirkustanzi verament diffiċli, Jehovah tahom il-​qawwa iktar min-​normal u ssaportew. Nistgħu nkunu ċerti li se jagħmel l-​istess magħna jekk iċ-​ċirkustanzi jkunu jeħtieġu dan.

Il-​Waqfa Kuraġġuża Tagħna Togħġob lil Jehovah u Tonorah

16, 17. Illum, kif nistgħu niżviluppaw attitudni kuraġġuża?

¹⁶ Jekk individwu jieqaf sod għall-​verità u s-​sewwa, dan ikun kuraġġuż. Jekk jagħmel dan minkejja li jħossu qed jibżaʼ minn ġewwa, ikun saħansitra iktar kuraġġuż. Tassew, kwalunkwe Kristjan jistaʼ jkun kuraġġuż jekk verament irid jagħmel ir-​rieda taʼ Jehovah, jekk hu determinat li jibqaʼ leali, jekk dejjem jistrieħ fuq Alla, u jekk dejjem jiftakar li Jehovah qablu saħħaħ lil bosta individwi bħalu. Iktar minn hekk, meta nirrealizzaw li l-​waqfa kuraġġuża tagħna togħġob lil Jehovah u tonorah, insiru jerġaʼ iktar determinati li ma niddgħajfux. Aħna lesti nissaportu r-​ridikolar jew affarijiet saħansitra agħar għaliex inħobbuh mill-​fond taʼ qalbna.—1 Ġwann 2:5; 4:18.

¹⁷ Qatt tinsa li meta nkunu qed inbatu minħabba l-​fidi tagħna, ma jfissirx li għamilna xi ħaġa ħażina. (1 Pietru 3:17) Qed inbatu għaliex qed nappoġġaw is-​sovranità taʼ Jehovah, għax nagħmlu t-​tajjeb, u għax m’aħna ebda parti mid-​dinja. Dwar dan, l-​appostlu Pietru qal: “Jekk tagħmlu t-​tajjeb u ssofru t-​tbatija bis-​sabar, din tkun grazzja quddiem Alla.” Pietru qal ukoll: “Dawk li jbatu skond ir-​rieda taʼ Alla, għandhom iħallu ruħhom f’idejn il-​Ħallieq tagħhom, li hu taʼ kelmtu, u jibqgħu jagħmlu t-​tajjeb.” (1 Pietru 2:20; 4:19) Iva, il-​fidi li nuru togħġob lil Alla tagħna kollu mħabba, Jehovah, u ġġiblu unur. Kemm għandna raġuni qawwija għalxiex inkunu kuraġġużi!

Meta Nidhru Quddiem l-​Awtoritajiet

18, 19. Meta nieħdu waqfa kuraġġuża quddiem xi mħallef, fir-​realtà liema messaġġ inkunu qed inwasslu?

¹⁸ Meta Ġesù qal lis-​segwaċi tiegħu li kienu se jiġu persegwitati, hu qal ukoll: “[Il-bnedmin] għad jerħukom f’idejn il-​qrati, jagħtukom is-​swat fis-​sinagogi tagħhom, itellgħukom quddiem gvernaturi u slaten minħabba fija, biex tagħtu xhieda quddiemhom u quddiem il-​pagani.” (Mattew 10:​17, 18) Trid tkun kuraġġuż biex tidher quddiem xi mħallef jew xi mexxej minħabba akkużi foloz. Xorta waħda, meta bil-​qlubija nużaw dawn l-​okkażjonijiet biex nagħtu xiehda lil dawn l-​individwi, inkunu qed nibdlu sitwazzjoni diffiċli f’opportunità biex inwettqu xi ħaġa importanti. Fil-​fatt, lil dawk li jkunu qed jiġġudikawna nkunu qed inwasslulhom il-​kliem taʼ Jehovah imniżżel fit-​tieni Salm: “Issa, slaten, ifhmu sewwa; twiddbu, intom li taħkmu l-​art. Aqdu lill-​Mulej bil-​biżaʼ.” (Salm 2:​10, 11) Ġeneralment, meta x-​Xhieda taʼ Jehovah ġew akkużati b’mod falz fil-​qrati, l-​imħallfin appoġġaw il-​libertà tal-​qima, u dan napprezzawh. Madankollu, xi mħallfin ħallew li jiġu influwenzati minn dawk li jopponuna. Lil uħud bħal dawn, l-​Iskrittura tgħidilhom: “Twiddbu.”

¹⁹ L-​imħallfin għandhom iżommu f’moħħhom li l-​ogħla liġi hija dik t’Alla Jehovah. Iridu jiftakru li l-​bnedmin kollha, anki l-​imħallfin stess, iridu jagħtu kont lil Alla Jehovah u lil Ġesù Kristu. (Rumani 14:10) U aħna, kemm jekk issir ġustizzja magħna minn imħallef uman u kemm jekk le, għandna kull raġuni għalxiex inkunu kuraġġużi għax Jehovah jappoġġana. Il-​Bibbja tgħid: “Hienja dawk kollha li jistkennu fih!”—Salm 2:12.

20. Għala nistgħu nkunu henjin jekk ikollna nissaportu l-​persekuzzjoni jew il-​malafama?

²⁰ Fil-​Priedka taʼ fuq il-​Muntanja, Ġesù qal: “Henjin intom, meta jgħajjrukom u jippersegwitawkom u jaqilgħu kull xorta taʼ ħażen u gideb kontra tagħkom minħabba fija. Ifirħu u thennew, għax ħlaskom kbir fis-​smewwiet. Hekk kienu jippersegwitawhom lill-​profeti li kienu qabilkom.” (Mattew 5:​11, 12) Dażgur, il-​persekuzzjoni fiha nfisha m’hijiex pjaċevoli, iżda meta aħna nieqfu sodi minkejja l-​persekuzzjoni, inkluż ir-​rapporti li jimmalafamaw fil-​mezzi tax-​xandir, ikollna għalxiex nifirħu. Meta nieqfu sodi nkunu qed nogħġbu lil Jehovah u taʼ dan se niġu premjati. Il-​waqfa kuraġġuża tagħna turi li għandna fidi ġenwina u tiżgurana li aħna approvati minn Alla. Tassew turi li aħna għandna fiduċja sħiħa f’Jehovah. Din il-​fiduċja hija vitali għal Kristjan, bħalma se juri l-​artiklu li jmiss.

X’Tgħallimt?

• Illum, f’liema sitwazzjonijiet irridu nuru l-​kuraġġ?

• Kif nistgħu niżviluppaw il-​kwalità tal-​kuraġġ?

• Min huma xi wħud li kienu eżempji mill-​aqwa taʼ kuraġġ?

• Għala nixtiequ naġixxu bil-​kuraġġ?

[Stampi f’paġna 9]

Simone Arnold (issa Liebster) fil-​Ġermanja, Widdas Madona fil-​Malawi, u Lydia u Oleksii Kurdas fl-​Ukraina wrew kuraġġ u ġġieldu kontra l-​wieħed ħażin

[Stampi f’paġna 10]

Aħna ma nistħux minħabba l-​aħbar tajba

[Stampa f’paġna 11]

Il-​kuraġġ taʼ Pawlu meta kien il-​ħabs għamel ħafna ġid għall-​aħbar tajba

[Stampa f’paġna 12]

Jekk bil-​kuraġġ kollu nispjegaw il-​pożizzjoni Skritturali tagħna lil xi mħallef, inkunu qed inwasslu messaġġ importanti