Kemm Hu Sew Li Nattendu Dejjem!
1 Għal snin sħaħ fl-Ewropa tal-Lvant, ħafna minn ħutna l-għeżież kienu pprojbiti milli jiltaqgħu pubblikament. Immaġina x’ferħ ħassew meta tneħħew il-projbizzjonijiet u setgħu jiltaqgħu flimkien fil-libertà!
2 Indokratur tas-circuit kiteb dwar żjara tiegħu lil waħda minn dawn il-kongregazzjonijiet: “It-Tlieta fil-għaxija, eżatt fil-bidu taż-żjara tiegħi, is-sistema li ssaħħan ma baqgħetx taħdem. Barra, it-temperatura baqgħet friża, u ġewwa, kienet biss madwar 5° C. L-aħwa qagħdu bil-qiegħda bil-kowtijiet, bix-xalel, bl-ingwanti, bil-kapep, u bil-bwiez tagħhom. Ħadd ma setaʼ jsegwi mill-Bibbja, ladarba kien impossibbli li tqalleb il-paġni. Bil-wieqfa fuq il-pletform liebes il-libsa, ħassejtni ffriżat u iebes ġebla, u kull darba li bdejt nitkellem, stajt nara nifsi. Imma li impressjonani kien li ma smajt lanqas kelma waħda taʼ tgergir. L-aħwa kollha qalu kemm kien pjaċevoli u sew li huma kienu attendew!” Dawk l-aħwa lanqas biss għaddielhom minn moħħhom li jitilfu dik il-laqgħa!
3 Hekk inħossuna aħna? Ngħożżu aħna l-opportunità li niltaqgħu għal-laqgħat tagħna taʼ kull ġimgħa bil-libertà? Jew nuru nuqqas t’apprezzament għal-laqgħat meta ċ-ċirkustanzi huma favorevoli? Li nattendu għal-laqgħat regolarment għandu mnejn ma jkunx faċli, u jistaʼ jkun hemm xi drabi meta jkollna raġuni leġittima għala ma nattendux. Iżda, qatt tinsa li hemm dawk fostna li minkejja l-età avanzata, problemi kbar taʼ saħħa, inkapaċità fiżika, skedi taʼ xogħol iebes, u responsabbiltajiet serji oħrajn jaraw l-importanza tal-laqgħat u kważi dejjem jattendu. X’eżempji mill-aħjar għalina biex nimitawhom!—Qabbel Luqa 2:37.
4 Ejjew nagħmluha d-drawwa tagħna li nappoġġjaw il-qima vera billi nattendu għal-laqgħat Kristjani tagħna kollha, minn grupp żgħir taʼ l-istudju tal-ktieb sa konvenzjoni kbira ħafna. Għala għandna niħduh daqshekk bis-serjetà li nattendu għal dawn il-laqgħat? Għaliex hija ordni divina li ninġabru flimkien. Imma hemm raġunijiet importanti oħrajn. Ilkoll kemm aħna għandna bżonn il-benefiċċji taʼ istruzzjoni divina u l-għajnuna taʼ l-ispirtu qaddis, li nirċevuhom fil-laqgħat. (Mt. 18:20) Ninbnew bi tpartit taʼ inkuraġġiment meta nissieħbu maʼ dawk b’fidi prezzjuża bħal tagħna.—Lhud 10:24, 25.
5 Fit-trasfigurazzjoni, Pietru qal, “Mgħallem, kemm hu sew li aħna hawn!” (Lq. 9:33) Għandna nħossuna l-istess dwar il-laqgħat Kristjani tagħna kollha. Tabilħaqq, kemm hu sew li nattendu dejjem!