Jistgħu Jaraw li Aħna Differenti
1 Is-sena l-oħra, iktar minn 300,000 uħud ġodda ngħaqdu magħna billi tgħammdu. Dawn in-nies, x’raw fix-Xhieda taʼ Jehovah li jġagħalhom ikunu jridu jsiru parti mill-organizzazzjoni t’Alla? Għala nispikkaw bħala differenti mir-reliġjonijiet l-oħrajn kollha? Dawn huma xi tweġibiet ovvji:
—Aħna nimxu eżatt mal-Bibbja minflok m’opinjonijiet persunali: Inqimu lil Alla Jehovah bl-“ispirtu u l-verità,” preċiż bħalma qalilna nagħmlu Ġesù Kristu. Dan kien ifisser li niċħdu l-falzitajiet reliġjużi u nġibu ruħna fi qbil mal-Kelma miktuba t’Alla.—Ġw. 4:23, 24; 2 Tim. 3:15-17.
—Aħna mmorru għand in-nies minflok ma nistennewhom jiġu għandna: Aċċettajna l-inkarigu li tana Kristu biex nippridkaw u ngħallmu, u nimitaw l-eżempju tiegħu billi nfittxu lil dawk taʼ qalb onesta. Infittxuhom fi djarhom, fit-triq, jew kulfejn jistgħu jinstabu.—Mt. 9:35; 10:11; 28:19, 20; Atti 10:42.
—Aħna nipprovdu istruzzjoni tal-Bibbja għal kulħadd mingħajr ħlas: Nużaw ir-riżorsi u l-enerġija tagħna bla ħlas, billi niddedikaw iktar minn biljun siegħa kull sena għas-servizz t’Alla. Mingħajr parzjalità, nistudjaw il-Bibbja maʼ kull xorta taʼ nies.—Mt. 10:8; Atti 10:34, 35; Apk. 22:17.
—Aħna mħarrġin tajjeb biex ngħinu lin-nies spiritwalment: Permezz taʼ l-istudju persunali tagħna tal-Bibbja u taʼ l-istruzzjoni pprovduta fil-laqgħat tal-kongregazzjoni, fl-assembleat, u fil-konvenzjonijiet, aħna nirċievu edukazzjoni teokratika imprezzabbli u kontinwa, li tagħtina l-abbiltà li ndawlu lil ħaddieħor spiritwalment.—Is. 54:13; 2 Tim. 2:15; 1 Pt. 3:15.
—Aħna nieħdu l-verità bis-serjetà, billi napplikawha fil-ħajja tagħna taʼ kuljum: Minħabba l-imħabba tagħna għal Alla, aħna nagħmlu tibdil, billi nġibu ħajjitna fi qbil mar-rieda tiegħu. Il-personalità l-ġdida tagħna bħal taʼ Kristu tiġbed lil oħrajn lejn il-verità.—Kol. 3:9, 10; Ġak. 1:22, 25; 1 Ġw. 5:3.
—Aħna nistinkaw biex ngħixu u naħdmu m’oħrajn fil-paċi: L-ikkultivar taʼ kwalitajiet bħal t’Alla jgħinna ngħassu l-azzjonijiet u d-diskors tagħna. Aħna ‘nfittxu s-sliem u nqisu li niksbuh’ man-nies kollha.—1 Pt. 3:10, 11; Efes. 4:1-3.
2 L-eżempji t’għajxien Kristjan li jaraw in-nies fl-organizzazzjoni taʼ Jehovah jqanqlu lil bosta biex jaċċettaw il-verità. Jalla l-eżempju persunali tagħna jkollu l-istess effett fuq dawk li jafuna u josservawna.