Il-​Qaddejja Ministerjali Jagħtu Servizz Prezzjuż

¹ “Huma wrew li huma rġiel tassew iddedikati li l-​fidi tagħhom intweriet b’servizz żeluż tas-​Saltna u bl-​għajnuna li jagħtu lil oħrajn biex jissodaw fil-​fidi.” Hekk jgħid il-​ktieb Organized to Accomplish Our Ministry, f’paġna 57, dwar il-​qaddejja ministerjali. Tabilħaqq, l-​eżempju spiritwali li jingħata mill-​qaddejja ministerjali huwa taʼ min jimitah. Il-​fatt li naħdmu flimkien magħhom u maʼ l-​anzjani jgħin għat-​‘tkabbir tal-​ġisem u fil-​bini tiegħu fl-​imħabba.’​—Efes. 4:16.

² Il-​qaddejja ministerjali jwettqu xogħol vitali fil-​kongregazzjoni. Aħsbu ftit dwar is-​servizzi prezzjużi tagħhom! Huma jieħdu ħsieb il-​kontijiet, il-​letteratura, ir-​rivisti, l-​abbonamenti, u t-​territorji; jaġixxu bħala attendants, jieħdu ħsieb l-​apparat tas-​sawnd, u jgħinu fil-​manutenzjoni tas-​Sala tas-​Saltna. Huma jipparteċipaw fl-​Iskola tal-​Ministeru Teokratiku u fil-​Laqgħa tas-​Servizz. Xi wħud minnhom għandhom mnejn ukoll jagħtu taħditiet pubbliċi jew jikkonduċu xi wħud mil-​laqgħat tal-​kongregazzjoni. Bħal membri tal-​ġisem fiżiku, il-​qaddejja ministerjali jwettqu servizzi li għandna bżonnhom.​—1 Kor. 12:​12-26.

³ Meta oħrajn jaraw il-​qaddejja ministerjali jikkooperaw f’armonija maʼ l-​anzjani bħala parti minn ġisem servili wieħed b’rispett u fehma reċiproċi, dan jinkuraġġihom biex jagħmlu l-​istess. (Kol. 2:19) Billi fedelment iwettqu r-​responsabbiltajiet tagħhom ġimgħa wara l-​oħra u billi juru interess persunali f’oħrajn, dawn jikkontribwixxu għal kongregazzjoni progressiva spiritwalment.

⁴ X’nistgħu nagħmlu biex nuru l-​apprezzament tagħna lejn il-​qaddejja ministerjali li jaħdmu iebes? Għandna bżonn inkunu familjari mad-​dmirijiet assenjati lilhom u nkunu lesti li nikkooperaw meta tinħtieġ l-​assistenza tagħna. Bil-​kliem u bil-​fatti, nistgħu ngħarrfuhom li xogħolhom napprezzawh. (Prov. 15:23) Dawk li jaħdmu iebes minħabba fina jistħoqqilhom rikonoxximent sinċier.​—1 Tess. 5:​12, 13.

⁵ Il-​Kelma t’Alla tistabbilixxi l-​irwol u l-​kwalifiki tal-​qaddejja ministerjali. (1 Tim. 3:​8-10, 12, 13) Is-​servizz sagru u prezzjuż tagħhom huwa indispensabbli biex il-​kongregazzjoni tiffunzjona. Dawn l-​irġiel jixirqilhom l-​inkuraġġiment kontinwu tagħna, minħabba li kollha ‘jħabirku dejjem fil-​ħidma tal-​Mulej.’​—1 Kor. 15:58.