Żgħażagħ—Aqraw il-Kelma t’Alla!
1 Iż-żgħożija hija żmien taʼ sfidi u deċiżjonijiet tqal. Kuljum, ħafna minnkom iż-żgħażagħ Kristjani tiffaċċjaw pressjonijiet biex tmorru kontra l-livelli taʼ l-imġiba li togħġob ’l Alla. Qabel ma tibdew tieħdu d-deċiżjonijiet persunali dwar l-edukazzjoni, l-impjieg, u ż-żwieġ, l-ewwel għandkom tkunu diġà għamiltu miri spiritwali. B’dan il-mod biss se tkunu tistgħu tagħmlu deċiżjonijiet oħra li se jifformaw il-kumplament taʼ ħajjitkom b’mod tajjeb. Miri spiritwali ċari se jgħinukom taġixxu bl-għaqal u tirnexxu f’ħajjitkom. Jekk b’mod regulari taqraw il-Bibbja u timmeditaw dwar dak li taqraw, se titqanqlu biex tgħixu fi qbil mal-pariri ispirati tagħha, u meta tfittxu l-affarijiet li huma xierqa f’ħajjitkom se tirnexxu.—Ġoż. 1:8; Salm 1:2, 3.
2 Kif Se Tibbenefika? Id-dinja taʼ Satana hija invażata b’affarijiet li jħajruk tagħmel il-ħażen. (1 Ġw. 2:15, 16) Għandek mnejn taf b’xi wħud minn sħabek tal-klassi jew oħrajn taʼ l-età tiegħek li ġarrbu ħafna inkwiet minħabba li ċedew għall-pressjoni minn oħrajn taʼ mparhom. Jekk iżżomm mal-pariri tal-Bibbja se jkollok is-saħħa morali u spiritwali biex ma tinvolvix ruħek f’kondotta midinba. Iżjed minn hekk, il-pariri tal-Kelma t’Alla jistgħu jgħinuk tevita n-nases sottili taʼ Satana. (2 Kor. 2:11; Lhud 5:14) Jekk timxi fil-mogħdija t’Alla se tikseb ferħ veru—sodisfazzjon persunali b’dak li tagħmel f’ħajtek.—Salm 119:1, 9, 11.
3 Il-prinċipji tal-Kelma t’Alla li ma jinbidlu qatt huma aqwa minn kwalunkwe għerf tal-bniedem. (Salm 119:98-100) L-għarfien tal-prinċipji tal-Bibbja u l-meditazzjoni fuq l-iskopijiet rivelati taʼ Jehovah flimkien maʼ talb mill-qalb se jgħinuk tibni relazzjoni mill-qrib maʼ l-Awtur għaref tal-Bibbja, Alla Jehovah. Hu jwiegħed: “Ngħallmek u nurik it-triq li għandek tieħu; nwissik, u nżomm għajnejja fuqek.”—Salm 32:8.
4 Warrab il-Ħin biex Taqraha: Kristjana żagħżugħa għamlitha mira li taqra l-Bibbja kollha, u spiċċatha fi żmien sena. Kif ibbenefikat? Hi tiftakar: “Tgħallimt ħafna dwar Jehovah—affarijiet li ressquni eqreb lejh u li ġagħluni nħoss biżaʼ lejh li rrid nibqaʼ nħossu għall-bqija taʼ ħajti.” (Ġak. 4:8) Qrajtha int il-Bibbja kollha? Jekk le, għala ma tagħmilhiex mira li tipprova taqraha? Żgur li Jehovah se jbierek l-isforzi tiegħek, u int se taħsad premji kbar.