Uża bil-​Għaqal il-​Letteratura Tagħna Bbażata fuq il-​Bibbja

1, 2. Ħafna nies kif iħossuhom dwar il-​letteratura tagħna, u dan x’mistoqsija jqajjem?

¹ “Ilni naqra l-​pubblikazzjonijiet tagħkom mill-​1965 ’l hawn. Meta nkun qed naqra nirreferi għall-​Bibbja, u dak kollu li hemm fil-​letteratura tagħkom jikkorrispondi mal-​Bibbja. Minn dejjem xtaqt inkun naf il-​verità dwar Alla u Ġesù, u nistaʼ ngħid onestament li qed insib tweġibiet veri permezz tal-​pubblikazzjonijiet tagħkom u l-​Bibbja.” Hekk kiteb wieħed raġel lill-​kwartieri ġenerali tax-​Xhieda taʼ Ġeħova. Fl-​istess ittra, hu staqsa għal studju tal-​Bibbja.

² Bħal dan ir-​raġel grat, miljuni taʼ persuni madwar id-​dinja japprezzaw l-​għajnuniet għall-​istudji tal-​Bibbja li jipprovdi “l-​ilsir leali u għaqli.” (Mt. 24:45) Kull sena tiġi pubblikata ħafna u ħafna letteratura biex tgħin lin-​nies taʼ qalb onesta “jaslu għall-​għarfien eżatt dwar il-​verità.” (1 Tim. 2:4) Kif nistgħu nużaw bil-​għaqal il-​letteratura tagħna bbażata fuq il-​Bibbja?

3. Kif nistgħu nevitaw li naħlu l-​letteratura?

³ Evita l-​Ħela: Tul perijodu taʼ żmien, nistgħu nakkumulaw iktar letteratura milli jirnexxilna nużaw. X’nistgħu nagħmlu biex nevitaw li naħlu l-​pubblikazzjonijiet prezzjużi tagħna? Hemm bżonn tad-​dixxerniment meta mmorru nġibu l-​letteratura biex nużawha fil-​ministeru. Minflok ma nġibu ħafna kopji tal-​pubblikazzjoni li se noffru, forsi nġibu kopja jew tnejn biss, u mbagħad nġibu iktar meta nkunu qassamniehom. B’hekk, m’aħniex se nakkumulaw ħażna kbira taʼ letteratura fid-​djar tagħna. B’mod simili, jekk għandna numru kbir taʼ rivisti li ma qassamniex, ikun xieraq li nnaqqsu n-​numru li nieħdu.

4. X’jistaʼ jsir jekk kongregazzjoni jkollha ħażna kbira taʼ ċerti pubblikazzjonijiet?

⁴ Ħażna Kbira taʼ Pubblikazzjonijiet: Jekk il-​kongregazzjoni għandha ħażna kbira taʼ ċerti pubblikazzjonijiet, il-​koordinatur tal-​letteratura forsi jkun jixtieq jiċċekkja maʼ kongregazzjonijiet oħra fil-​viċin biex jaraw jekk jistgħux jużaw il-​letteratura żejda. Il-​pubblikaturi jistgħu joffru pubblikazzjonijiet li ilhom ftit li ħarġu lill-​membri tal-​familja li m’humiex taʼ l-​istess twemmin, studenti tal-​Bibbja, u oħrajn. Dawk li huma ġodda fil-​kongregazzjoni forsi jkunu jixtiequ dawn il-​kotba għal-​librerija teokratika persunali tagħhom.

5. Kif nistgħu nuru li napprezzaw il-​letteratura tagħna?

⁵ Aħna rridu li l-​letteratura tagħna tilħaq l-​iskop tagħha, jiġifieri, li tgħin lil uħud sinċieri jitgħallmu iktar dwar l-​iskopijiet meraviljużi taʼ Ġeħova. Bħalma Ġesù ma ħeliex l-​ikel wara li mirakolożament temaʼ lill-​folol, il-​mira tagħna għandha tkun li nużaw bl-​aħjar mod il-​letteratura prezzjuża tagħna bbażata fuq il-​Bibbja. (Ġw. 6:​11-13) Il-​messaġġ fil-​pubblikazzjonijiet tagħna, li jsalva l-​ħajjiet, ma jistax jilħaq il-​qalb taʼ dawk miġbudin lejn it-​tajjeb jekk il-​pubblikazzjonijiet jibqgħu fuq l-​ixkafef jew fil-​basktijiet tagħna. Għalhekk, irridu nkunu raġunevoli meta nġibu l-​letteratura biex nużawha fil-​ministeru u għandna nużawha bil-​għaqal għall-​benefiċċju t’oħrajn.​—Flp. 4:5.