Xi Ġġib l-Ewwel f’Ħajtek?
1 Kieku kif twieġeb din il-mistoqsija? M’għandniex xi ngħidu, ilkoll kemm aħna nixtiequ npoġġu l-ewwel l-interessi tas-Saltna. (Mt. 6:33) Imma nistgħu nistaqsu lilna nfusna, ‘L-għażliet tiegħi juru li qed nagħmel hekk?’ Il-Bibbja tħeġġiġna: “Ibqgħu agħtu prova taʼ x’intom.” (2 Kor. 13:5) Kif nistgħu nagħtu prova taʼ x’aħna meta nuru li qed inpoġġu s-Saltna fl-ewwel post?
2 Il-Ħin Tagħna: Nistgħu nibdew billi neżaminaw kif nagħżlu li nqattgħu l-ħin tagħna. (Efes. 5:15, 16) Kemm inqattgħu ħin kull ġimgħa f’attivitajiet soċjali, naraw it-televixin, nużaw l-Internet, jew f’xi delizzju? Jekk inniżżlu bil-miktub kemm inqattgħu ħin fuq dawn l-affarijiet u nqabbluh maʼ l-ammont taʼ ħin li nqattgħu f’attivitajiet spiritwali, għandna mnejn nissorprendu ruħna. Inqattgħu aħna ħin twil fuq ix-xogħol sabiex inkunu nistgħu naffordjaw affarijiet lussużi biex imbagħad imur minn taħt is-servizz sagru? Kemm-il darba nissagrifikaw il-laqgħat u l-ministeru sabiex immorru xi mkien fi tmiem il-ġimgħa bħala rikreazzjoni?
3 Agħmel Prijoritajiet: Ħafna minna m’għandniex biżżejjed ħin biex nagħmlu kulma nixtiequ. Allura biex inpoġġu l-interessi tas-Saltna l-ewwel, għandna bżonn neżaminaw il-prijoritajiet tagħna, u mbagħad nagħmlu ħin fl-iskeda għal “dak li hu iktar importanti.” (Flp. 1:10) Dan jinkludi l-ħin li nqattgħu biex nistudjaw il-Kelma t’Alla, nieħdu sehem fil-ministeru, nieħdu ħsieb il-familja tagħna, u nattendu l-laqgħat Kristjani. (Salm 1:1, 2; Rum. 10:13, 14; 1 Tim. 5:8; Ebr. 10:24, 25) Attivitajiet oħrajn, bħal eżerċizzju moderat u rikreazzjoni bnina, huma taʼ benefiċċju. (Mk. 6:31; 1 Tim. 4:8) Imma dawn l-affarijiet li huma inqas importanti m’għandhomx jieħdu post l-interessi tas-Saltna.
4 Ħu żagħżugħ fittex li jpoġġi l-interessi tas-Saltna l-ewwel billi daħal fil-ministeru full-time minflok ma fittex edukazzjoni iktar għolja li setgħet tippreparah għal karriera sekulari. Hu tgħallem lingwa oħra u mar jaqdi fejn kien hemm bżonn akbar. Hu qal: “Veru qed nieħu gost hawnhekk. Il-ministeru huwa tassew rifreskanti! Veru nixtieq li ż-żgħażagħ kollha jagħmlu xi ħaġa bħal din u jesperjenzaw dak li qed inħoss jien. M’hemm xejn aħjar milli naqdu lil Ġeħova b’dak kollu li għandna.” Iva, meta nġibu s-Saltna l-ewwel nesperjenzaw barkiet, imma iktar importanti minn hekk, dan jogħġob lil Missierna tas-sema, Ġeħova.—Ebr. 6:10.