Imita lill-​Għalliem il-​Kbir Meta Tuża l-​Ktieb Il-​Bibbja X’Tgħallem?

1. Kif kien jgħallem Ġesù?

¹ Ġesù, l-​Għalliem il-​Kbir, dejjem spjega l-​affarijiet b’mod sempliċi u ċar. Xi drabi, biex iġiegħel lis-​semmiegħa tiegħu jaħsbu, hu l-​ewwel kien jistaqsihom x’inhi l-​ħarsa tagħhom. (Mt. 17:​24-​27) Hu kien jidderieġi l-​attenzjoni lejn il-​Kelma t’Alla. (Mt. 26:31; Mk. 7:6) Kien joqgħod attent li ma jagħtihomx ħafna informazzjoni, billi kien jaf li kienu se jibqgħu jitgħallmu. (Ġw. 16:12) Ġesù kien interessat ukoll jekk id-​dixxipli tiegħu kinux qed jemmnu u jifhmu dak li kien qed jgħallimhom. (Mt. 13:51) Il-​ktieb Il-​Bibbja X’Tgħallem? huwa magħmul biex jgħinna ngħallmu b’mod simili.

2. B’liema modi nistgħu nużaw il-​mistoqsijiet tal-​bidu f’kull kapitlu?

² Il-​Mistoqsijiet tal-​Bidu: Meta tibda tistudja kapitlu, huwa tajjeb li tiġbed l-​attenzjoni lejn il-​mistoqsijiet tal-​bidu taħt it-​titlu. Qajjem mistoqsijiet retoriċi sabiex tqanqal l-​aptit taʼ l-​istudent. Jew tistaʼ tistiednu jikkummenta fil-​qosor fuq dawn il-​mistoqsijiet. M’għandekx għalfejn tiddiskuti l-​kummenti tiegħu fit-​tul jew tikkoreġi kull stqarrija ħażina li jagħmel. Tistaʼ sempliċement tirringrazzjah tal-​ħsibijiet tiegħu u tibda tikkunsidra l-​materjal. Il-​kummenti tiegħu fuq il-​mistoqsijiet tal-​bidu se jgħinuk issir taf jekk hemmx bżonn tagħti iktar attenzjoni lil xi parti tal-​lezzjoni.

3. Kif nistgħu nżommu l-​istudju sempliċi?

³ L-​Iskritturi: L-​istudju għandu jiċċentra fuq l-​iskritturi. (Ebr. 4:​12) Madankollu, m’għandekx għalfejn taqra kull vers ċitat. Enfasizza dawk il-​versi li juru x’inhi l-​bażi Skritturali għat-​twemmin tagħna. Għandu mnejn li skritturi li jipprovdu informazzjoni sekondarja ma jkollhomx għalfejn jinqraw. Il-​ktieb Il-​Bibbja X’Tgħallem? jippreżenta l-​verità b’mod dirett. Żomm l-​istudju sempliċi. Iffoka fuq il-​punti prinċipali, u evita t-​tendenza li titkellem ħafna dwar xi dettalji jew li tinkludi materjal żejjed bla bżonn fid-​diskussjoni.

4. X’jiddetermina jekk għandniex nieħdu l-​ħin matul l-​istudju sabiex nikkunsidraw l-​informazzjoni mill-​appendiċi?

⁴ L-​Appendiċi: L-​appendiċi tkopri 14-il suġġett li jkomplu jsaħħu t-​test prinċipali. Mhux bilfors għandek tiddiskuti dawn is-​suġġetti matul l-​istudju. Dwar ċerti suġġetti, tistaʼ tagħżel li tinkuraġġixxi lill-​istudent tiegħek biex jaqra l-​materjal supplimentarju waħdu, speċjalment jekk jifhem u jaċċetta l-​informazzjoni fit-​test prinċipali. Per eżempju, jekk l-​istudent diġà jemmen li Ġesù hu l-​Messija, jistaʼ ma jkunx hemm għalfejn tiddiskuti miegħu s-​suġġett “Ġesù Kristu​—Il-​Messija Mwiegħed” meta tiddiskuti kapitlu 4, “Min Hu Ġesù Kristu?” F’okkażjonijiet oħrajn, jistaʼ jkun taʼ benefiċċju li tieħu l-​ħin matul l-​istudju sabiex tiddiskuti l-​materjal taʼ l-​appendiċi jew xi parti minnu.

5. Jekk nagħżlu li nikkunsidraw l-​informazzjoni mill-​appendiċi, dan kif nistgħu nagħmluh?

⁵ Jekk tagħżel li tiddiskuti l-​materjal taʼ l-​appendiċi, tistaʼ tipprepara xi mistoqsijiet bil-​quddiem u tikkunsidra l-​paragrafi maʼ l-​istudent bl-​istess mod bħalma tagħmel fit-​test prinċipali. Jew skond il-​bżonnijiet taʼ l-​istudent, tistaʼ tagħżel li tieħu ftit minuti matul l-​istudju sabiex tirrivedi l-​informazzjoni miegħu. Dan se jgħinek tkun ċert li qed jifhem il-​materjal li jaqra meta jkun waħdu.

6. Kif tistaʼ tintuża l-​kaxxa tar-​reviżjoni fl-​aħħar taʼ kull kapitlu?

⁶ Il-​Kaxxa tar-​Reviżjoni: Il-​kaxxa fl-​aħħar taʼ kull kapitlu tipprovdi stqarrijiet li normalment iwieġbu l-​mistoqsijiet tal-​bidu. Tistaʼ tuża dawn listqarrijiet sabiex tirrivedi lpunti prinċipali tal-​kapitlu. Xi pubblikaturi sabu t’għajnuna li jaqraw kull stqarrija u forsi l-​iskritturi konnessi magħha maʼ l-​istudent. Imbagħad, jistaqsu lill-​istudent biex jispjega fil-​qosor kif l-​iskritturi juru li l-​istqarrija hija minnha. Dan jgħin lill-​għalliem ikun jaf jekk l-​istudent huwiex qed jifhem sew il-​punti prinċipali tal-​lezzjoni u kif dawn huma appoġġati mill-​Bibbja u jekk jaqbilx magħhom. Dan iħarreġ ukoll lill-​istudent kif juża l-​Bibbja biex jispjega l-​verità lil oħrajn.

7. Kif nistgħu nużaw il-​ktieb Il-​Bibbja X’Tgħallem? sabiex inwettqu l-​inkarigu tagħna?

⁷ L-​iktar mod effettiv kif inwettqu l-​inkarigu tagħna taʼ li ngħallmu lin-​nies u nagħmlu dixxipli hu li nimitaw il-​metodi li uża Ġesù biex jgħallem. (Mt. 28:​19, 20) Il-​ktieb Il-​Bibbja X’Tgħallem? jistaʼ jgħinna biex nagħmlu dan. Agħmel użu tajjeb minnu biex tgħallem il-​verità lil oħrajn b’mod ċar, sempliċi, u interessanti.