Kaxxa għall-​Mistoqsija

◼ Huma gruppi indipendenti taʼ Xhieda li jiltaqgħu flimkien biex jagħmlu riċerka jew dibattitu Skritturali approvati mill-​“ilsir leali u għaqli”?​—Mt. 24:​45, 47.

Le, ma japprovahomx. U madankollu, f’diversi partijiet tad-​dinja, ftit li jissieħbu maʼ l-​organizzazzjoni tagħna fformaw gruppi biex jagħmlu riċerka indipendenti dwar suġġetti konnessi mal-​Bibbja. Xi wħud ifformaw gruppi indipendenti biex jistudjaw l-​Ebrajk u l-​Grieg tal-​Bibbja ħalli janalizzaw ir-​reqqa tat-​Traduzzjoni tad-​Dinja l-​Ġdida. Oħrajn jeżaminaw suġġetti xjentifiċi konnessi mal-​Bibbja. Huma ħolqu Web sites u chat rooms bl-​iskop li jaqsmu m’oħrajn il-​ħarsa tagħhom u jiddiskutuha. Għamlu wkoll konferenzi u pproduċew pubblikazzjonijiet biex jippreżentaw dak li sabu u jżidu maʼ dak li jiġi provdut fil-​laqgħat Kristjani tagħna u fil-​letteratura tagħna.

Madwar id-​dinja, in-​nies taʼ Ġeħova qed jirċievu tagħlim u inkuraġġiment spiritwali abbundanti fil-​laqgħat tal-​kongregazzjoni, fl-​assembleat, u fil-​konvenzjonijiet, kif ukoll permezz tal-​pubblikazzjonijiet taʼ l-​organizzazzjoni taʼ Ġeħova. Taħt il-​gwida taʼ l-​ispirtu qaddis tiegħu u fuq il-​bażi tal-​Kelma tiegħu taʼ verità, Ġeħova jipprovdi dak li hemm bżonn biex in-​nies kollha t’Alla jistgħu jkunu “magħqudin kif jixraq b’fehma waħda u bi ħsieb wieħed” u jibqgħu ‘sodi fil-​fidi.’ (1 Kor. 1:10; Kol. 2:​6, 7) Żgur li aħna grati għall-​provvedimenti spiritwali taʼ Ġeħova f’dawn l-​aħħar jiem. Għal din ir-​raġuni, “l-​ilsir leali u għaqli” ma japprovax letteratura, laqgħat, jew Web sites li m’humiex pubblikati jew organizzati bl-​indokrar tiegħu.—Mt. 24:​45-47.

Individwi li jixtiequ jużaw l-​abbiltà tal-​ħsieb tagħhom biex jappoġġaw l-​aħbar tajba huma taʼ min ifaħħarhom. Madankollu, ebda attività persunali m’għandha tfixkel dak li qed iwettaq Ġesù Kristu llum permezz tal-​kongregazzjoni tiegħu fuq l-​art. Fl-​ewwel seklu, l-​appostlu Pawlu wissa kontra li wieħed jinvolvi ruħu f’suġġetti li jgħejjuk, u jiħdulek ħafna ħin, bħall-​“ġenealoġiji li ma jwasslu mkien u li jqajmu mistoqsijiet għal riċerka minflok ma jwasslu biex titqassam xi ħaġa mingħand Alla rigward il-​fidi.” (1 Tim. 1:​3-7) Il-​Kristjani kollha għandhom jistinkaw biex ‘jaħarbu l-​kwistjonijiet bla sens u l-​ġenealoġiji u l-​ġlied u t-​tilwim fuq il-​Liġi, għax dawn huma bla siwi u fiergħa.’—Titu 3:9.

Lil dawk li jixtiequ jagħmlu iktar studju u riċerka minn fuq il-​Bibbja, nagħtuhom il-​parir li jużaw l-​Insight on the Scriptures, l-​“All Scripture Is Inspired of God and Beneficial,” u l-​pubblikazzjonijiet l-​oħrajn tagħna, bħal dawk li jiddiskutu l-​profeziji li jinsabu fil-​kotba Bibliċi taʼ Danjel, Isaija, u Rivelazzjoni. Dawn jipprovdu bosta materjal għall-​istudju tal-​Bibbja u l-​meditazzjoni, u bihom inkunu nistgħu ‘nimtlew bl-​għarfien eżatt dwar ir-​rieda [t’Alla] bl-​għerf kollu u b’fehma spiritwali sħiħa. B’hekk inkunu nistgħu nimxu kif jixraq lil Ġeħova bl-​għan li nogħġbuh għalkollox hekk kif inkomplu nagħtu l-​frott f’kull għemil tajjeb u noktru fl-​għarfien eżatt dwar Alla.’—Kol. 1:​9, 10.