Ittra Mingħand il-​Ġemgħa li Tiggverna

Għeżież Sħabna x-​Xhieda taʼ Ġeħova:

Huwa taʼ pjaċir kbir għalina li niktbulkom għeżież qaddejja leali taʼ Ġeħova, li issa tgħoddu iktar minn sebaʼ miljuni. Meta tiltaqgħu maʼ sieħeb fit-​twemmin minn parti oħra tad-​dinja, mill-​ewwel tħossu rabta speċjali taʼ affezzjoni għal dak li jkun. (Ġw. 13:34, 35) Bla ebda dubju, int u taqra l-​Yearbook taʼ din is-​sena, ir-​rakkonti interessanti tal-​fidi u l-​lealtà taʼ ħutek f’diversi pajjiżi se jerġgħu jġegħluk tħoss din ir-​rabta unika.

Rapporti minn madwar id-​dinja jindikaw li għadd kbir minnkom qed tieħdu l-​Qima tal-​Familja bis-​serjetà. Dawk minnkom li għandkom tfal żgħar żviluppajtu ħafna metodi interessanti biex tiġbdu u żżommu l-​attenzjoni taċ-​ċkejknin tagħkom. (Efes. 6:4) Iż-​żwiġijiet jissaħħu meta l-​koppji jistudjaw flimkien. (Efes. 5:28-​33) Tabilħaqq, individwi u familji qed jibbenefikaw minn dan l-​arranġament taʼ studju fil-​fond tal-​Kelma t’Alla.—Ġoż. 1:8, 9.

Nesprimu l-​empatija tagħna maʼ dawk kollha li ġarrbu telf b’konsegwenza tad-​diżastri naturali li seħħew dan l-​aħħar. Nieħdu din l-​opportunità biex nirringrazzjaw lil dawk il-​ħafna wħud li, bla telf taʼ żmien, ingħaqdu fl-​għoti t’għajnuna matul dawn iż-​żminijiet taʼ inkwiet. (Atti 11:28-​30; Gal. 6:9, 10) Iktar minn hekk, f’kull kongregazzjoni, hemm minnkom li jagħrfu x’inhuma l-​bżonnijiet materjali taʼ ħutna u, bla ma jdoqqu t-​trombi, jieħdu l-​inizjattiva biex jgħinuhom. Bħal Dorka tal-​qedem, intom tispikkaw fl-​‘għemejjel tajbin u tagħtu ħafna għotjiet taʼ ħniena.’ (Atti 9:36) Kunu ċerti li Ġeħova jinnota dan kollu u jpattilkom kif jixraq.—Mt. 6:3, 4.

F’xi pajjiżi, id-​drittijiet tagħkom qed jiġu mkażbrin minn dawk li jimmanipulaw il-​liġijiet sabiex ‘jippjanaw l-​inkwiet permezz taʼ digriet.’ (Salm 94:20-​22) Peress li tirrealizzaw li Ġesù bassar din il-​persekuzzjoni, intom qed tissaportu b’kuraġġ u qed idduru lejn Ġeħova bħala r-​refuġju tagħkom. (Ġw. 15:19, 20) Għeżież ħutna, kunu ċerti li nsemmukom regolarment fit-​talb tagħna hekk kif tkomplu “tiddefendu ruħkom quddiem kulmin ikun irid raġuni għat-​tama li għandkom.”—1 Pt. 3:13-​15.

Mill-​qalb, infaħħru lilkom kollha li qed tibqgħu nodfa moralment sena wara sena minkejja l-​fatt li Satana jippromwovi kondotta immorali b’mod insidjuż. Fi żmien meta l-​livelli morali tad-​dinja sejrin mill-​ħażin għall-​agħar, intom qed ‘tiksbu l-​qawwa fil-​Mulej u fis-​setgħa tas-​saħħa tiegħu.’ (Efes. 6:10) Intom ilbistu “l-​armatura sħiħa mingħand Alla,” u għalhekk qegħdin iżżommu sod kontra “t-​tnassis tax-​Xitan.” (Efes. 6:11, 12) Kunu afu li Ġeħova qed juża l-​eżempju tagħkom biex jagħti tweġiba ċara lil Satana, it-​tentatur!—Prov. 27:11.

Ilkoll fraħna meta sirna nafu li fl-​2011, attendew 19,374,737 ruħ għat-​Tifkira tal-​mewt tal-​Mulej tagħna. Dan in-​numru impressjonanti taʼ wħud li attendew huwa grazzi wkoll għar-​respons kbir tagħkom għas-​sejħa biex taqdu bħala pijunieri awżiljarji f’April li għadda. Miljuni t’abitanti fuq l-​art setgħu jisimgħu l-​għajta għalenija taʼ tifħir lil Ġeħova ġejja mix-​Xhieda leali tiegħu! (Rum. 10:18) Sew jekk kontu fost iż-​2,657,377 ruħ li qdew bħala pijunieri awżiljarji f’dak ix-​xahar u sew jekk stinkajtu biex b’xi mod iżżidu l-​attività tagħkom, ilkoll kemm intom ferraħtuna minħabba li qdejtu fix-​xogħol minn jeddkom u biż-​żelu.—Salm 110:3; Kol. 3:23.

Is-​sena l-​oħra, 263,131 individwu ssimbolizza d-​dedikazzjoni tiegħu lil Ġeħova. Irroddu ħajr lil Ġeħova taʼ dan, u ngħidu grazzi lilkom talli ngħaqadtu magħna biex noffru jerġaʼ lil ħaddieħor l-​istedina: “‘Ejja!ʼ U kulmin jismaʼ ħa jgħid: ‘Ejja!’ U kulmin hu bil-​għatx ħa jiġi; u kulmin jixtieq ħa jieħu l-​ilma tal-​ħajja b’xejn.” (Riv. 22:17) Speċjalment wara li kkunsidrajna xi aspetti tas-​Saltna stabbilita t’Alla fil-​konvenzjonijiet distrettwali tal-​2011, ngħidu b’iktar ħerqa minn qatt qabel, “Ħa tiġi Saltnatek!” Imqanqlin mill-​assiguranza taʼ Ġesù “Jien ġej malajr,” aħna b’qalb sħiħa ningħaqdu mal-​appostlu Ġwanni fit-​tweġiba tiegħu: “Amen! Ejja, Mulej Ġesù.”—Riv. 22:20.

Hekk kif tibqgħu għassa għal din il-​ġrajja eċċitanti, għeżież ħutna, ibqgħu ċerti li tassew inħobbu lil kull wieħed u waħda minnkom li qed tagħtu prova tal-​imħabba tagħkom għal Ġeħova “bl-​għemil u l-​verità.”—1 Ġw. 3:18.

Ħutkom,

Il-​Ġemgħa li Tiggverna tax-​Xhieda taʼ Ġeħova