Ħu Bħala Mudell lill-​Profeti—Ġoel

1. Kif nistgħu nimitaw l-​umiltà taʼ Ġoel hekk kif nippritkaw?

1 Min kien il-​profeta Ġoel? Kulma jgħidilna hu li kien “bin Petwel.” (Ġoel 1:1) Dan il-​profeta umli enfasizza l-​messaġġ taʼ Ġeħova u mhux l-​irwol tiegħu stess bħala messaġġier. Bl-​istess mod, fil-​ministeru tagħna, minflok ma nfittxu t-​tifħir jew l-​attenzjoni persunali, aħna nidderieġu l-​attenzjoni lejn Ġeħova u l-​Bibbja. (1 Kor. 9:16; 2 Kor. 3:5) Minbarra dan, il-​messaġġ li nxandru jsaħħaħna. Illum, liema aspetti tal-​profezija taʼ Ġoel jimlewna b’żelu u tama?

2. Il-​fatt li qegħdin tant qrib jum Ġeħova, x’għandu jqanqalna nagħmlu?

2 “Fil-​Qrib Jum Ġeħova.” (Ġoel 1:15): Għalkemm dan il-​kliem inkiteb eluf taʼ snin ilu, aħna qed ngħixu fi żmien it-​twettiq finali tiegħu. Il-​kundizzjonijiet tad-​dinja li dejjem sejrin għall-​agħar u t-​twaqqigħ għaċ-​ċajt li niffaċċjaw fit-​territorju tagħna juru b’mod ċar li waslu l-​aħħar jiem taʼ din is-​sistema mill-​agħar. (2 Tim. 3:1-​5; 2 Pt. 3:3, 4) Meta nimmeditaw fuq kemm qrobna lejn it-​tmiem, għandna kull raġun nagħtu l-​ministeru l-​prijorità f’ħajjitna.—2 Pt. 3:11, 12.

3. Il-​ministeru għala hu importanti b’mod speċjali hekk kif noqorbu lejn it-​tribulazzjoni l-​kbira?

3 “Ġeħova Jkun Kenn għall-​Poplu Tiegħu.” (Ġoel 3:16): It-​tregħid li jiġi deskritt f’dan il-​vers żgur li japplika biss għall-​esekuzzjoni tal-​ġudizzju taʼ Ġeħova matul it-​tribulazzjoni l-​kbira. Niksbu l-​faraġ mill-​fatt li nafu li Ġeħova se jeħles lill-​qaddejja leali tiegħu matul dan iż-​żmien. (Riv. 7:9, 14) Hekk kif nieħdu sehem fix-​xogħol tal-​ippritkar u nesperjenzaw kif Ġeħova jsostnina u jsaħħaħna, nibnu l-​fidi u s-​sabar li se jgħinuna matul it-​tribulazzjoni l-​kbira li ġejja.

4. Għala nistgħu nifirħu u nħarsu lejn il-​futur b’fiduċja?

4 Għalkemm il-​messaġġ taʼ Ġoel ġie deskritt bħala wieħed taʼ swied il-​qalb, dan joffri lill-​poplu t’Alla tama glorjuża taʼ ħelsien. (Ġoel 2:32) Għalhekk, ejja nħarsu lejn il-​futur b’fiduċja u nxandru b’żelu l-​aħbar tajba tas-​Saltna t’Alla hekk kif nagħtu kas il-​kliem taʼ Ġoel 2:23: “Ifirħu u thennew b’Ġeħova Alla tagħkom.”