X’Jgħidu n-Nies Dwar it-Talb?

Għal María, Raúl, Arne, u ħafna oħrajn, it-​talb hu rigal speċjali. Huma jħossu li permezz tat-​talb jistgħu jitkellmu m’Alla, jirringrazzjawh, u jfittxuh għall-​għajnuna. Huma ċerti li dak li tgħid il-​Bibbja dwar li nitolbu lil Alla hu veru: “Din hi l-​fiduċja li għandna fih, li, kulma nitolbuh skond ir-​rieda tiegħu, hu jismagħna.”—1 Ġwanni 5:14.

Min-​naħa l-​oħra, ħafna nies isibuha diffiċli biex jemmnu dak li tgħid il-​Bibbja dwar it-​talb. Steve jgħid kif kien iħossu dwar it-​talb: “Meta għalaqt 17, tlieta minn ħbiebi mietu f’żewġ aċċidenti differenti. Wieħed miet f’ħabta bil-​karozza u t-​tnejn l-​oħra għerqu fil-​baħar.” X’għamel Steve? “Tlabt lil Alla jagħtini tweġiba għal dak kollu li ġara, imma bqajt bla risposta. Allura saqsejt lili nnifsi, ‘Għalfejn nitlob?’” Ħafna jħossu li t-​talb tagħhom ma jiġix imwieġeb, allura ma jarawx għalfejn għandhom jibqgħu jitolbu.

Hemm min għandu raġunijiet oħra għala jaħseb li m’għandux għalfejn jitlob. Xi wħud jgħidu li peress li Alla jaf kollox, hu diġà jaf x’għandna bżonn u xi problemi għandna, għalhekk m’għandniex bżonn ngħidulu bihom.

Oħrajn jemmnu li Alla ma jridx jismaʼ t-​talb tagħhom minħabba l-​iżbalji li għamlu fil-​passat. Jenny tgħid: “L-​ikbar problema tiegħi hi li nħossni ma niswa għal xejn. Għamilt affarijiet li jiddispjaċini li għamilthom, u għalhekk ngħid lili nnifsi li ma ħaqqnix li Alla jismagħni.”

Kif tħossok int dwar it-​talb? Jekk qatt kellek ħsibijiet jew dubji simili dwar it-​talb, int tistaʼ tħossok aħjar bit-​tweġibiet sodisfaċenti li tagħti l-​Bibbja. Aħna nistgħu nafdaw x’tgħid il-​Bibbja dwar it-​talb.a Tistaʼ tgħinek issib tweġibiet għal mistoqsijiet bħal:

• Alla vera jismaʼ t-​talb tagħna?

• Għala xi talb ma jiġix imwieġeb?

• Kif tistaʼ titlob b’mod li Alla jisimgħek?

• It-​talb kif jistaʼ jgħinek?