It-Traduzzjoni għall-Konvenzjoni Reġjonali tal-2020 ‘Ifraħ Dejjem’!

Għall-ewwel darba, f’Lulju u Awwissu 2020, ix-Xhieda taʼ Ġeħova madwar id-dinja se jaraw l-istess konvenzjoni reġjonali fl-istess żmien. Biex dan ikun possibbli, ir-rikordings tal-konvenzjoni kellhom bżonn jiġu tradotti b’iżjed minn 500 lingwa. Is-soltu, proġett bħal dan jieħu sena jew iktar biex jiġi ppjanat u jkun lest. Imma minħabba l-pandemija tal-coronavirus, l-aħwa kellhom inqas minn erbaʼ xhur biex jittraduċu l-Konvenzjoni Reġjonali tal-2020 ‘Ifraħ Dejjem’!

Is-Servizzi tat-Traduzzjoni u d-Dipartiment tax-Xiri għal Madwar id-Dinja li jinsabu fil-Kwartieri Ġenerali tax-Xhieda taʼ Ġeħova għenu f’dan il-proġett tant kbir. Is-Servizzi tat-Traduzzjoni nnotaw li ħafna mit-timijiet tat-traduzzjoni kellhom bżonn iktar apparat biex jagħmlu x-xogħol, speċjalment mikrofoni taʼ kwalità tajba. Id-Dipartiment tax-Xiri għal Madwar id-Dinja xtara 1,000 mikrofonu u qassamhom fi kważi 200 post.

Sabiex id-Dipartiment tax-Xiri għal Madwar id-Dinja jiffranka l-flus, xtara ħafna mikrofoni f’daqqa. Il-mikrofoni ntbagħtu post wieħed u minn hemm bagħtuhom lit-tradutturi madwar id-dinja. Peress li xtrajna ħafna mikrofoni, kull wieħed ġie jiswa madwar 147 ewro, inkluż il-posta. Dan kien ħafna irħas milli kieku kellna nixtruhom wieħed wieħed.

Id-Dipartiment tax-Xiri għal Madwar id-Dinja kellu jixtri u jibgħat il-mikrofoni matul April u Mejju 2020. F’dak iż-żmien, ħafna kumpaniji ma setgħux jaħdmu bħas-soltu minħabba l-pandemija. Minkejja dan, il-maġġoranza tal-uffiċċji tat-traduzzjoni, uffiċċji tal-fergħa, u postijiet oħra tat-traduzzjoni rċivew l-apparat li kellhom bżonn.

Jay Swinney, li jieħu ħsieb ix-Xiri għal Madwar id-Dinja, qal hekk: “Id-Dipartimenti f’Betel u kumpaniji differenti ħadmu sew flimkien matul dan il-proġett. Bl-ispirtu taʼ Ġeħova biss stajna nagħmlu dan tant malajr u stajna nużaw il-flus li rċivejna bl-aħjar mod biex ngħinu lil ħutna.”

Nicholas Ahladis, li jaħdem mas-Servizzi tat-Traduzzjoni, jgħid hekk: “It-tradutturi li kienu f’lockdown matul dan iż-żmien ġew inkuraġġiti ħafna meta rċivew dan l-apparat. Minkejja li kellhom jaħdmu b’mod separat, xorta setgħu jaħdmu sew flimkien biex jittraduċu u jirrikordjaw taħditiet, dramas, u għanjiet b’iżjed minn 500 lingwa.”

Dan il-proġett kien wieħed minn ħafna li tlesta għall-aħwa mad-dinja kollha biex setgħet issir il-Konvenzjoni Reġjonali tal-2020 ‘Ifraħ Dejjem’! Grazzi għad-donazzjonijiet li tajtu permezz taʼ donate.jw.org u b’modi oħra, kien possibbli li jinxtraw dawn l-affarijiet bżonjużi.