Il-faqar L-‘emerġenza Siektaʼ
“NISIMGĦU ħafna dwar emerġenzi allarmanti tas-sħana globali u s-saffi taʼ l-ożonu u l-kontaminazzjoni taʼ l-oċeani,” qal Dr. Mahbub Ul-Haq, konsulent tal-Ġnus Magħquda, imma żied: “Is-sħana globali u ħafna emerġenzi oħrajn li jagħmlu ħoss għad iridu joqtlu lil xi ħadd [fil-waqt] li l-emerġenzi siekta qegħdin jikkaġunaw ħafna mwiet kuljum fil-pajjiżi li qegħdin jiżviluppaw.” Dr. Ul-Haq ikkummenta dwar wieħed minn dawk l-emerġenzi siekta. “Il-faqar,” hu qal, “huwa tassew l-akbar qattiel.” Dan kif?
Għal ħafna mill-1.3 biljun ruħ madwar id-dinja li bil-kemm jgħaddu b’dollaru jew inqas kuljum, il-faqar tabilħaqq jinbidel f’diżastru qattiel. Sa 18-il miljun ruħ, tirrapporta r-rivista UN Chronicle, imutu kull sena minħabba “kawżi relatati mal-faqar.” Dan in-numru jwaħħxek! Immaġina t-titli li jagħmlu ħoss taʼ stejjer fil-gazzetti kieku, per eżempju, il-popolazzjoni kollha kemm hi taʼ l-Awstralja, taʼ madwar 18-il miljun, imutu f’sena! Madankollu, l-imwiet taʼ dawn il-miljuni taʼ wħud foqra, ikkummentat xandira fuq ir-Radju tal-ĠM, “ma tantx huma msemmijin.” Dan huwa, fil-fatt, ‘diżastru sieket.’
Biex jiksru s-silenzju, rappreżentanti minn 117-il pajjiż li attendew l-ewwel Summit Dinji għall-Iżvilupp Soċjali li qatt sar tkellmu dwar modi taʼ kif jittrattaw il-problema tal-faqar fid-dinja. “Mija u ħamsin sena ilu d-dinja introduċiet kruċjata kontra l-iskjavitù,” fakkar James Gustave Speth, l-amministratur tal-Programm għall-Iżvilupp tal-Ġnus Magħquda. “Illum irridu nintroduċu kruċjata dinjija kontra l-faqar tal-massa.” Għala dan it-tħassib? Il-faqar, hu wissa, qiegħed “ikattar id-disprament u l-instabilità u [qiegħed] jipperikola d-dinja tagħna.”
Madankollu, saħansitra fil-waqt li d-delegati kienu qegħdin jiddiskutu modi biex itemmu l-faqar, ‘arloġġ li jkejjel il-faqar,’ u li jżomm amment tan-numru taʼ trabi mwelldin kuljum għand familji fqar, wera li s-sitwazzjoni tal-faqar globali kienet qiegħda ssir agħar. L-arloġġ, li kien espost fil-post tal-konvenzjoni, indika li matul is-summit li dam ġimgħa żdiedu kważi 600,000 tarbija ġdida ġew miżjudin mal-klassi li dejjem qiegħda toktor tal-fqar. Fi tmiem l-aħħar ġurnata tas-summit, l-arloġġ intefa; imma fir-realtà, bħalma nnota Speth, “l-arloġġ ikompli jtektek.” Il-mistoqsija issa hija, Se jagħtu kas taʼ din il-problema?