Il-​Faqar—Is-​Sitwazzjoni Llum

VICENTEa spiss tarah għaddej jiġbed karettun mgħobbi b’ħafna affarijiet fit-​toroq taʼ São Paulo, il-​Brażil. Hu jiġbor biċċiet tal-​kartun, tal-​metall, u plastik. X’ħin jibda jidlam, iqiegħed biċċa kartuna taħt il-​karettun tiegħu u jimtedd fuqha biex jorqod. Donnu ma jinnotax l-​istorbju tal-​ħafna karozzi u tal-​linji li jkunu għaddejjin fit-​triq fejn iqattaʼ l-​lejl. Xi darba kellu impjieg, dar, u familja​—imma tilef kollox. Issa bilkemm jirnexxilu jmantni lilu nnifsu fit-​toroq.

Sfortunatament, miljuni taʼ persuni madwar id-​dinja, bħal Vicente, jgħixu f’faqar bla tama. F’pajjiżi li qed jiżviluppaw, ħafna jkollhom jgħixu fit-​toroq jew f’gabubi. It-​tallaba​—iz-​zopop, l-​għomja, u nisa li jkunu qed jitimgħu lit-​trabi tagħhom​—huma xi ħaġa komuni. Ħdejn it-​traffic lights, xi tfal jiġru bejn il-​karozzi weqfin, u jipprovaw ibigħu l-​ħelu bit-​tama li jiksbu ftit ċenteżmi.

Huwa diffiċli tispjega għala dan il-​faqar jeżisti. Ir-​rivista Ingliża The Economist stqarret: “Ir-​razza umana qatt ma kienet iktar għanja, jew iktar armata b’għarfien mediku, b’sengħa teknoloġika u b’intelliġenza li huma bżonnjużi biex jegħlbu l-​faqar.” Ħafna żgur ibbenefikaw mill-​għarfien li kisbu l-​bnedmin. It-​toroq tal-​bliet kbar f’għadd taʼ pajjiżi li qed jiżviluppaw huma mimlijin karozzi ġodda jlellxu. Ħwienet kbar huma mimlijin b’tagħmir popolari taʼ l-​aħħar, u hemm ħafna nies li jridu jixtruhom. Żewġ stabbilimenti tal-​ħwienet fil-​Brażil għamlu promozzjoni speċjali. Dawn baqgħu miftuħin tul il-​lejl mit-​23 sa l-​24 taʼ Diċembru, 2004. F’wieħed mill-​istabbilimenti krew żeffiena tas-​samba biex jipprovdu divertiment għal dawk li kienu qed jixtru. L-​avveniment attira kważi 500,000 xerrej!

Minkejja dan, għadd kbir taʼ persuni ma jibbenefikawx mill-​ġid li oħrajn igawdu. Id-​differenza kbira bejn l-​għonja u l-​foqra ġiegħlet lil ħafna jikkonkludu li hemm bżonn urġenti li jistinkaw biex jeliminaw il-​faqar. Ir-​rivista Brażiljana Veja stqarret: “Din is-​sena [2005] il-​ġlieda kontra l-​faqar għandha tkun is-​suġġett prinċipali fuq l-​aġenda globali.” Veja rrapportat ukoll dwar il-​proposta għal Marshall Plan ġdid li l-​iskop tiegħu hu li jgħin lill-​pajjiżi l-​iktar foqra, speċjalment l-​Afrika.b Madankollu, filwaqt li proposti bħal dawn jagħtu l-​impressjoni li qed ikun hemm progress, l-​istess rivista kompliet biex tgħid: “Hemm ukoll għadd kbir taʼ raġunijiet għala għandna niddubitaw li dawn il-​proposti għamlu l-​ġid. Jekk il-​maġġuranza tal-​pajjiżi jżommu lura milli jikkontribwixxu, huwa minħabba li l-​fondi rari jilħqu lil dawk li suppost għandhom jirċivuhom.” Sfortunatament, minħabba l-​korruzzjoni, u ħafna rqaqat żejda li għandhom x’jaqsmu mal-​burokrazija, parti kbira mill-​fondi li jipprovdu l-​gvernijiet, l-​aġenziji internazzjonali, u individwi oħra qatt ma jaslu għand in-​nies li tassew għandhom bżonnhom.

Ġesù kien jaf li l-​faqar kien se jkun problema kontinwa. Hu qal: “Il-​foqra dejjem magħkom.” (Mattew 26:11) Ifisser dan li dejjem se jkun hawn il-​faqar fid-​dinja? Tistaʼ ssir xi ħaġa biex is-​sitwazzjoni titjieb? Il-​Kristjani x’jistgħu jagħmlu biex jgħinu lill-​foqra?

[Noti taʼ taħt]