Naħla Meta Ma Tkunx Naħla?

In-​naħal dejjem ikollhom ħafna x’jagħmlu għax kuljum iżuru mijiet taʼ fjuri u jġorru n-​nektar lura lejn id-​doqqajs. Meta tasal ir-​rebbiegħa, in-​naħal irġiel ifittxu sieħba. Għal dan, huma jistrieħu fuq il-​vista u x-​xamm. Madankollu, l-​orkidea, ammiratriċi mhux tas-​soltu, tipprova tiġbed l-​attenzjoni tan-​naħla raġel li ma tantx jara fil-​bogħod.

Fl-Ewropa taʼ Isfel, hemm diversi orkidej salvaġġi li l-​fertilizzazzjoni tagħhom tiddependi milli jimitaw lin-​naħal nisa. Dawn l-​orkidej ikollhom bżonn jibagħtu “pakketti” taʼ trab tad-​dakkir lil orkidej sħabhom. In-​naħal huma t-​trasportaturi ideali. Imma ladarba l-​orkidej m’għandhom l-​ebda nektar li jtiegħem tajjeb biex jiġbdu lin-​naħal lejhom, l-​orkidej ikollhom bħallikieku jużaw il-​makakkerija. U t-​trikk hija li l-​fjura tant tixbah lin-​naħla mara u tinxtamm bħalha, li n-​naħla raġel jipprova jitgħammar magħha! Kull speċi taʼ dawn l-​orkidej għandha l-​apparenza qarrieqa u l-​aroma partikulari tagħha.

Sa ma n-​naħla raġel jirrealizza li jkun ħa żball, l-​orkidea tkun iddepożitat pakkett taʼ trab tad-​dakkir li jwaħħal maʼ ġismu. In-​naħla raġel imbagħad itir ’l hemm, u jerġaʼ jitqarraq minn orkidea oħra, li tirċievi dan it-​trab tad-​dakkir. Wara li jkun xabaʼ jiġi mqarraq b’dan il-​mod, in-​naħla raġel jirrealizza li dawn l-​orkidej mhux taʼ min jafdahom. Sa dak il-​ħin, x’aktarx li jkun laħaq dakkar xi ftit mill-​fjuri.

Dawn l-​orkidej, li m’għandhomx moħħ biex jaħsbu, kif kisbu r-​riħa u l-​apparenza eżatti biex iqarrqu bin-​naħal? Mekkaniżmi rimarkevoli bħal dawn jixhdu li hemm Disinjatur intelliġenti, li l-​ħolqien tiegħu qatt ma jonqos li jissorprendi u jaffaxxina.