Alla Għala Kien u Għadu Daqshekk Paċenzjuż?
ĦARES lejn il-wiċċ imbikkem taʼ tifel imġewwaħ. Ara surtu niexfa għuda u żaqqu minfuħa. Aħseb dwar il-ħtieġa ddisprata tiegħu għall-ikel, u osserva l-bieqja vojta li jġorr. Forsi ommu qed tħares minn par għajnejn fil-ħofra, wiċċha stess stampa kerha taʼ mingħajr tama. Imbagħad ipprova żomm lura n-niket tiegħek—iva, u żomm id-dmugħ milli jgelgel.
Din ix-xena hija rripetuta miljuni taʼ drabi fir-reġjun milqut mill-ġuħ taʼ madwar 2.3 taʼ miljun mil kwadru magħruf bħala s-Saħel. Jinfirex iktar minn 3,000 mil mal-Afrika lejn in-Nofs in-Nhar tad-Deżert Saħara, mis-Senegal fuq il-Kosta tal-Atlantiku sal-Etjopja fuq il-Baħar l-Aħmar. Naturalment, il-ġuħ ihedded partita nies f’artijiet oħra. Il-Għaqda Dinjija tas-Saħħa tirrapporta li 1.1 elf miljun persuna madwar l-art
huma morda serjament jew m’għandhomx x’jieklu biżżejjed.
Il-ġuħ, naturalment, huwa biss aspett wieħed tat-tbatija tal-bnedmin. Il-bniedem iniġġeż l-art, u lkoll kemm aħna niġu effettwati. Is-sistemi politiċi jinkuraġġixxu l-inġustizzji u l-gwerer li jġibu niket u mewt fuq ħafna. Alla għala jippermetti affarijiet bħal dawn? Hu jimportah minna?
Alla Verament Jimportah!
Il-Ħallieq tagħna verament jimportah minna. Hemm wisq provi taʼ dan u tal-abbiltà tiegħu li jagħmel affarijiet li jaħdmu flimkien għall-ġid tagħna u għall-armonija fil-ħolqien tiegħu kollu. Per eżempju, ħares lejn din l-istampa taʼ naħla li qiegħda fuq fjura fuq siġra tal-frott. In-naħla tiddependi fuq il-fjura għan-nektar li tinħtieġ biex tnutri ruħha. Mill-banda l-oħra, is-siġra tiddependi fuq il-pollen li l-ġisem tan-naħla jġorr minn siġra li tixbah lil din. B’dan il-mod, il-fjura tiġi mdakkra u l-frotta tiżżviluppa ruħha. Mhux is-siġar tal-frott kollha huma mdakkrin b’dan il-mod, imma Alla żgur li rranġa għal koperazzjoni mhux tas-soltu f’dan il-każ. U t-tjubija tiegħu tirriżulta fil-frott li aħna nistgħu nieħdu gost nieklu u nibbenefikaw minnu.
In-naħla nfisha hija parti minn qatgħa organizzata tajjeb taʼ iktar minn 30,000 naħla. Xi wħud igħassu d-doqqajs, waqt li oħrajn inaddfuh jew jivventilawh. Jerġaʼ oħrajn jaħżnu n-nektar u l-pollen, jitimgħu lill-frieħ, jew igħarrxu għal sorsi ġodda taʼ nektar. Alla nnifsu rranġahom hekk l-affarijiet sabiex aħna nibbenefikaw meta naħal bieżel bħal dan jipproduċi għasel ħelu u sustanzjuż li jgħaxxaq il-palat tagħna.
Il-miraklu tal-koperazzjoni bejn in-naħal u l-pjanti u fost l-insetti nfushom huwa waħda mill-ħafna provi li l-Ħallieq huwa kapaċi perfettament li jagħmel l-affarijiet ħajjin jikkoperaw maʼ xulxin. Għax fil-fatt, “Alla huwa Alla, mhux tad-diżordni, imma tal-paċi.” (1 Korintin 14:33) Għala, allura, ħalla lill-umanità teżisti b’nuqqas taʼ armonija bħal din, li rriżultat f’miżerja għal tant nies? Jekk Alla jimportah minna, għala dam daqshekk jistenna biex jikkorreġi din is-sitwazzjoni? Tabilħaqq, Alla għala ħa daqshekk paċenzja?
Il-Kelma t’Alla, il-Bibbja, twieġeb mistoqsijiet bħal dawn. Dan il-ktieb tal-għaġeb igħidilna li Alla Jehovah kien paċenzjuż għal raġuni tajba. X’inhi din ir-raġuni? U kemm se ddum iktar il-paċenzja t’Alla?