Kun Selettiv meta Tagħżel id-​Divertiment

X’effett għandu d-​divertiment fuq it-​tfal? Alvin Poussaint, għalliem u tabib li ħadem mat-​tfal għal madwar 30 sena, hu konvint li films li jkun fihom sess u vjolenza jgħallmu liż-​żgħar li mġiba bħal din hija normali. Hu jipponta wkoll lejn periklu ieħor: “Rajt tfal li jirritornaw lura d-​dar wara li jkunu raw xi film taʼ din il-​kwalità jsiru mbeżżgħin​—jew estremament aggressivi. Rajt oħrajn li jerġgħu lura għal li jiddendlu maʼ djul ommhom jew li joqogħdu jerdgħu subgħajhom jew li jagħmlu taħthom fis-​sodda.” Skond dan it-​tabib, xi esperti ddokumentaw ġrajjiet oħrajn li jistgħu jikkaġunaw din l-​imġiba​—l-​abbuż fiżiku jew sesswali jew li jgħixu f’xi żona tal-​gwerra, biex insemmu biss xi ftit. “Ħadd minna ma se jpoġġi minn jeddu lil xi tifel jew tifla f’dawk is-​sitwazzjonijiet,” hu jispjega, “madankollu, ħadd ma jieħu l-​passi meħtiġin biex ma jħallihomx jaraw films dwar affarijiet li jwerwruna kieku kellna nkunu nafu li qed jarawhom fil-​ħajja reali.”

Il-Kristjani għandhom kull raġun ikunu selettivi u ċerti li d-​divertiment li jagħżlu ma jiksirx il-​prinċipji tal-​Bibbja. Per eżempju, Salm 11:5 jgħid: “Jgħarbel il-​Mulej il-​ġust u l-​ħażin; hu jobgħod ’il min iħobb id-​dnewwa [“vjolenza,” KŻ].” U l-​appostlu Kristjan Pawlu kiteb: “Mewwtu ġo fikom dak kollu li hu taʼ l-​art: żína, faħx, ġibdiet, xewqat ħżiena, u r-​re[għb]a . . . Iżda issa intom ukoll ħallu kollox: korla, passjoni, ħażen, dagħa, u l-​kliem mhux xieraq warrbuh minn fommkom.”​—Kolossin 3:​5, 8.

Għalhekk, il-​ġenituri għandhom joqogħdu b’sebaʼ għajnejn biex id-​divertiment li jagħżlu għal uliedhom​—u għalihom stess—​ma jippromwovix “l-​għemejjel tal-​ġisem.” (Galatin 5:​19-21) Għandhom ikunu selettivi, billi jikkunsidraw kemm il-​kwalità kif ukoll il-​kwantità tad-​divertiment tagħhom.​—Efesin 5:​15-17.