Bidla Notevoli Għall-​aħjar

“Fl-​1990 id-​dinja kienet tinsab lesta biex tidħol f’wieħed mill-​iktar perijodi notevoli taʼ bidla fl-​istorja umana. Sistema qadima kienet qegħda ċċedi postha lil waħda ġdida.”—The Times Atlas of the 20th Century.

KMIENI fis-​seklu 20, “id-​dinja daħlet f’era taʼ taqlib u vjolenza mhux tas-​soltu,” jgħid l-​atlas kwotat hawn fuq. Dan is-​seklu kellu jara iktar gwerer minn kwalunkwe seklu ieħor, b’iktar minn 100 miljun ruħ mejta.

F’din l-​era, il-​gwerer qatlu iktar nies pajżani minn qatt qabel. Fl-​Ewwel Gwerra Dinjija, 15 fil-​mija tal-​mejtin kienu nies pajżani. Imma fit-​Tieni Gwerra Dinjija, f’xi pajjiżi n-​nies pajżani li mietu qabżu l-​għadd taʼ nies militari li mietu. Mill-​miljuni li nqatlu fil-​gwerer minn dakinhar ’l hawn, il-​biċċa l-​kbira minnhom kienu pajżani. Din il-​vjolenza kollha wettqet il-​profezija tal-​Bibbja rigward ir-​rikkieb fuq ‘żiemel taʼ lewn aħmar nar,’ li “ngħatatlu s-​setgħa li jeqred il-​paċi minn fuq wiċċ l-​art.”—Apokalissi 6:​3, 4; Mattew 24:​3-7.

Bidla fil-​Valuri

Is-​seklu 20 wettaq il-​profezija li tinsab fit-​2 Timotju 3:​1-5, li tgħid: “L-​aħħar tad-​dinja [“l-​aħħar jiem,” NW] jkun żmien iebes. Il-​bnedmin jingħataw għall-​imħabba tagħhom infushom u tal-​flus; faħħarin, suppervi, dgħajja, ma jisimgħux mill-​ġenituri; bla gratitudni, bla tjieba; bla qalb, bla ħniena, lablaba, bla rażan; kiefra, bla mħabba għat-​tajjeb; tradituri, bla ħsieb, minfuħa bihom infushom; iħobbu aktar il-​pjaċir milli ’l Alla; nies li jiċħdu l-​qawwa tat-​tjieba, minkejja li [“għandhom għamla taʼ devozzjoni lejn Alla,” NW].”

Sa ċertu punt, il-​bnedmin imperfetti minn dejjem kellhom dawn il-​karatteristiċi. Matul is-​seklu 20, attitudnijiet bħal dawn intensifikaw u nfirxu. Nies li jġibu ruħhom kif ġie deskritt hawn fuq kienu xi darba meqjusin bħala antisoċjali—jekk mhux nies ħżiena għalkollox. Issa anki n-​nies li “għandhom għamla taʼ devozzjoni lejn Alla” qegħdin iktar iqisu aġir bħal dan bħala xi ħaġa normali.

Xi darba, in-​nies reliġjużi lanqas biss kien jgħaddilhom minn moħħhom li koppji jgħixu flimkien mingħajr ma jiżżewġu. Li nisa mhux miżżewġin isiru ommijiet kienet meqjusa bħala xi ħaġa taʼ għajb, l-​istess bħalma kienu meqjusa r-​relazzjonijiet omosesswali. Għall-​biċċa l-​kbira tan-​nies, l-​aborti lanqas biss kienu jissemmew, u l-​istess kien id-​divorzju. Id-​diżonestà fin-​negozju kienet ħaġa taʼ tmaqdir. Imma llum, bħalma jinnota sors minnhom, “kollox jgħaddi.” Għala? Raġuni waħda hi li “dan jissodisfa l-​interessi egoistiċi taʼ dawk li ma jridux lil ħaddieħor jgħidilhom x’ma jistgħux jagħmlu.”

L-abbandun taʼ livelli etiċi għolja f’dan is-​seklu wassal biex il-​prijoritajiet jinbidlu. The Times Atlas of the 20th Century jispjega: “Fl-​1900 in-​nazzjonijiet u l-​individwi kienu għadhom jikkalkulaw il-​valur tagħhom b’termini mhux monetarji. . . . Sa l-​aħħar tas-​seklu, in-​nazzjonijiet kienu jikkalkulaw is-​suċċess tagħhom b’termini kważi kollha ekonomiċi. . . . Bidliet simili seħħew fil-​mod li bih in-​nies kienu jqisu l-​ġid materjali.” Illum, il-​logħob taʼ l-​ażżard li hu mifrux maʼ kullimkien jippromwovi l-​imħabba għall-​flus, filwaqt li r-​radju, it-​televixin, il-​films, u l-​vidjos jinkuraġġixxu x-​xewqat materjali. Anki l-​programmi taʼ kompetizzjonijiet u l-​konkorsi tar-​reklami jagħtu l-​messaġġ li l-​flus huma, jekk mhux kollox, għall-​inqas kważi kollox.

Flimkien imma Mifrudin

Fil-​bidu tas-​seklu 20, il-​biċċa l-​kbira tan-​nies kienu jgħixu fi nħawi rurali. Jintqal li fil-​bidu tas-​seklu 21, iktar minn nofs il-​popolazzjoni se tkun tgħix fil-​bliet. Il-​ktieb 5000 Days to Save the Planet jgħid: “Id-​dmir li jiġi provdut livell adegwat t’għajxien għan-​nies li llum jgħixu fil-​bliet, biex ma nsemmux lil dawk taʼ ġenerazzjonijiet futuri, qed joħloq problemi li jidhru impossibbli li jintgħelbu.” Ir-​rivista tal-​Ġnus Magħquda World Health osservat: “Il-​proporzjon taʼ nies fid-​dinja li jgħixu fil-​bliet qiegħed jikber. . . . Mijiet taʼ miljuni . . . bħalissa qegħdin jgħixu f’kundizzjonijiet li huma taʼ ħsara għal saħħithom u li qegħdin saħansitra jipperikolawlhom ħajjithom.”

X’paradoss hu li filwaqt li n-​nies qegħdin jinġabru eqreb lejn xulxin fil-​bliet, dawn qegħdin ukoll jinqatgħu għalihom waħedhom! It-​televixin, it-​telefons, u l-​Internet, flimkien max-​xiri permezz tal-​kompjuters, għalkemm huma utli, jeliminaw min-​nofs ir-​relazzjonijiet wiċċ imbwiċċ. Il-​gazzetta Ġermaniża Berliner Zeitung għaldaqstant tikkonkludi: “Is-​seklu 20 m’huwiex biss is-​seklu taʼ popolazzjoni eċċessiva. Huwa wkoll is-​seklu tas-​solitudni.”

Dan iwassal għal traġedji bħal dik li ġrat f’Hamburg, il-​Ġermanja, fejn il-​ġisem taʼ raġel instab fl-​appartament tiegħu ħames snin wara li miet! “Ħadd ma ħass in-​nuqqas tiegħu, la l-​qraba, la l-​ġirien, u lanqas l-​awtoritajiet,” qalet ir-​rivista Der Spiegel, u kompliet iżżid: “Għal ħafna ċittadini dan jissimbolizza l-​limitu li jwaħħax li laħqu l-​anonimità taʼ kuljum u n-​nuqqas taʼ kuntatt soċjali fil-​belt il-​kbira.”

Il-ħtija taʼ dawn il-​kundizzjonijiet mill-​agħar m’hijiex biss tax-​xjenza u t-​teknoloġija. L-​iktar li jaħtu huma n-​nies. Dan is-​seklu pproduċa iktar nies minn qatt qabel li “jingħataw għall-​imħabba tagħhom infushom u tal-​flus; . . . bla gratitudni, . . . bla qalb, bla ħniena, . . . bla mħabba għat-​tajjeb; . . . iħobbu aktar il-​pjaċir milli ’l Alla.”—2 Timotju 3:​1-5.

L-​1914, Sena Distinta

Skond Winston Churchill, “il-​bidu tas-​seklu għoxrin kien jidher mimli prospetti u kalma.” Ħafna ħasbu li dan kien se jġib era taʼ paċi u prosperità li qatt qabel ma kien hawn bħalhom. Madankollu, fl-​1905 l-​Watch Tower taʼ l-​1 taʼ Settembru wissa: “Dalwaqt iqumu iktar gwerer,” u qal ukoll li “katakliżmu kbir” kellu jibda fl-​1914.

Fil-fatt, kmieni sa mill-​1879, dik il-​pubblikazzjoni ppontat lejn l-​1914 bħala data sinjifikanti. Fis-​snin taʼ wara għarrfet li l-​profeziji Bibliċi fil-​ktieb taʼ Danjel kienu jippontaw lejn dik id-​data bħala ż-​żmien meta s-​Saltna t’Alla ġiet stabbilita fis-​sema. (Mattew 6:10) Filwaqt li l-​1914 ma kienx iż-​żmien meta s-​Saltna kellha tieħu l-​kontroll komplet fuq l-​affarijiet taʼ l-​art, dan kien iż-​żmien biex tibda t-​tmexxija tagħha.

Il-profezija Biblika bassret: “Fi żmien dawn is-​slaten [li jeżistu fi żmienna], Alla tas-​sema jqajjem saltna [fis-sema] li ma tinqered qatt.” (Danjel 2:44) Dik is-​Saltna, bi Kristu bħala Sultan, bdiet tiġbor hawn fuq l-​art nies li kellhom il-​biżaʼ t’Alla u li kellhom ix-​xewqa li jkunu s-​sudditi tagħha.—Isaija 2:​2-4; Mattew 24:14; Apokalissi 7:​9-15.

Fi qbil maʼ dak li ġara fis-​sema, l-​1914 rat il-​bidu taʼ “l-​aħħar jiem,” il-​bidu taʼ perijodu taʼ żmien li kellu jispiċċa bil-​qerda tas-​sistema t’affarijiet li hawn bħalissa. Ġesù bassar li l-​bidu taʼ dan il-​perijodu kellu jkun immarkat bi gwerer dinjin, nuqqas taʼ ikel, epidemiji taʼ mard, terremoti qerrieda, u żjieda fil-​ksur tal-​liġi, kif ukoll birda fl-​imħabba tan-​nies lejn Alla u lejn għajrhom. Dawn l-​affarijiet kollha, hu qal, kellhom jimmarkaw il-​“bidu taʼ tbatija kbira.”—Mattew 24:​3-12.

Dalwaqt Dinja Kompletament Ġdida

Issa għaddew 85 sena minn dawn “l-​aħħar jiem,” u qegħdin noqorbu bil-​ħeffa lejn it-​tmiem taʼ din is-​sistema preżenti t’affarijiet li ma ġabet ebda sodisfazzjon. Dalwaqt is-​Saltna t’Alla, taħt Kristu, se “tfarrak u ttemm is-​saltniet l-​oħra kollha [li jeżistu issa], waqt li hi tibqaʼ wieqfa għal dejjem.”—Danjel 2:44; 2 Pietru 3:​10-13.

Iva, Alla se jneħħi l-​ħażen minn fuq wiċċ l-​art u se jdaħħal lil nies taʼ qalb retta f’dinja kompletament ġdida. “It-​tajbin jgħammru fl-​art, u n-​nies sewwa joqogħdu fiha; imma l-​ħżiena mill-​art jitqaċċtu, u l-​qarrieqa jinqalgħu minnha.”—Proverbji 2:​21, 22.

X’messaġġ taʼ ferħ—ċertament wieħed li jixraqlu jixxandar maʼ kullimkien! Is-​Saltna t’Alla dalwaqt se ssolvi l-​problemi li s-​seklu 20 kompla żied: il-​gwerer, il-​faqar, il-​mard, l-​inġustizzja, il-​mibegħda, l-​intolleranza, il-​qagħad, il-​kriminalità, in-​nuqqas taʼ ferħ, u l-​mewt.—Ara Salm 37:​10, 11; 46:​9, 10 [46:​8, 9, NW]; 72:​12-​14, 16; Isaija 2:4; 11:​3-5; 25:​6, 8; 33:24; 65:​21-23; Ġwann 5:​28, 29; Apokalissi 21:​3, 4.

Jappella għalik il-​prospett li tgħix għal dejjem f’dinja taʼ tjieba mimlija hena li ma jistax jitfisser bil-​kliem? Staqsi lix-​Xhieda taʼ Jehovah għal iktar tagħrif. Dawn jistgħu juruk minn fuq il-​kopja tal-​Bibbja tiegħek stess li s-​snin kritiċi taʼ bidla li mmarkaw is-​seklu 20 dalwaqt se jispiċċaw u li int imbagħad tkun tistaʼ tgawdi barkiet bla tmiem!

[Stampa f’paġna 10]

Dalwaqt dinja kompletament ġdida