L-​Aħbar Tajba li Jixtiquk Tismaʼ

META Ġesù kien fuq l-​art, id-​dixxipli tiegħu marru għandu u staqsewh: “X’se jkun is-​sinjal tal-​miġja tiegħek u taʼ tmiem id-​dinja?” Hu weġibhom li kellu jkun hemm gwerer li jinvolvu lil ħafna ġnus, ġuħ kbir, mard li jittieħed, terremoti, żjieda fil-​ksur tal-​liġi, għalliema reliġjużi foloz li jqarrqu b’ħafna nies, mibegħda u persekuzzjoni mmirati lejn is-​segwaċi veri tiegħu, u nuqqas taʼ mħabba għat-​tajjeb fost ħafna nies. Hekk kif kellhom jibdew iseħħu dawn l-​affarijiet, dan kellu jindika li Kristu kien preżenti b’mod inviżibbli u li s-​Saltna tas-​sema kienet qorbot. Din kellha tkun aħbar—aħbar tajba! Għalhekk Ġesù żied dan il-​kliem bħala parti mis-​sinjal: “Dan l-​Evanġelju [“aħbar tajba,” NW] tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.”—Mattew 24:3-14.

Meta toqgħod taħseb, il-​ġrajjiet li qed iseħħu bħalissa fid-​dinja m’humiex sbieħ, imma t-​tifsira tagħhom hija tajba, jiġifieri, il-​preżenza taʼ Kristu. Il-​kundizzjonijiet imsemmijin hawn fuq bdew isiru evidenti f’dik is-​sena tant imxandra, l-​1914! Din immarkat it-​tmiem taʼ Żmien il-​Ġentili u l-​bidu tal-​perijodu taʼ bidla mill-​ħakma umana għar-​Renju t’Elf Sena (Millennjali) taʼ Kristu.

Li kellu jkun hemm perijodu taʼ bidla huwa indikat f’Salm 110, versi 1 u 2, u f’​Apokalissi 12:7-12. Hemmhekk juri li Kristu kellu jpoġġi fuq il-​lemin t’Alla fis-​sema sakemm jasal iż-​żmien li jsir Sultan. Imbagħad, wara li ssir gwerra fis-​sema, Satana kellu jitkeċċa għal fuq l-​art, u jġib gwaj fuqha, u Kristu kellu jibda jmexxi f’nofs l-​għedewwa tiegħu. It-​tneħħija totali tal-​ħażen se sseħħ permezz taʼ “diqa kbira [“tribulazzjoni kbira,” NW],” li tilħaq il-​quċċata tagħha fil-​gwerra taʼ Ħarmagedon u tkun segwita mir-​Renju t’Elf Sena taʼ Kristu li se jkun mimli paċi.—Mattew 24:21, 33, 34; Apokalissi 16:14-16.

“Dan għandek tkun taf,” tgħid il-​Bibbja, “li l-​aħħar tad-​dinja jkun żmien iebes. Il-​bnedmin jingħataw għall-​imħabba tagħhom infushom u tal-​flus; faħħarin, suppervi, dgħajja, ma jisimgħux mill-​ġenituri; bla gratitudni, bla tjieba; bla qalb, bla ħniena, lablaba, bla rażan; kiefra, bla mħabba għat-​tajjeb; tradituri, bla ħsieb, minfuħa bihom infushom; iħobbu aktar il-​pjaċir milli ’l Alla; nies li jiċħdu l-​qawwa tat-​tjieba, minkejja li minn barra jagħmluha taʼ tajbin. Nies bħal dawn aħrabhom.”—2 Timotju 3:1-5.

Xi wħud jistgħu jsostnu li dawn l-​affarijiet ġieli ġraw fl-​istorja tad-​dinja, imma l-​fatt hu li dawn qatt qabel ma seħħew sa dan il-​punt. Bħalma jgħidu l-​istudjużi taʼ l-​istorja u l-​kummentaturi, qatt ma kien hawn perijodu ieħor fuq l-​art bħal dak li rajna mill-​1914 ’il quddiem. (Ara paġna 7.) Il-​gwajijiet u l-​problemi ġraw fuq skala bil-​wisq akbar minn qatt qabel. Iktar minn hekk, hemm fatturi oħra li għandhom jitqiesu rigward is-​sinjal taʼ Kristu dwar l-​aħħar jiem: L-​ammont kbir taʼ xandir li sar mad-​dinja kollha dwar il-​preżenza taʼ Kristu u s-​Saltna tiegħu qatt ma kien hawn bħalu qabel fl-​istorja. Il-​persekuzzjoni minħabba l-​ippridkar qatt ma laħqet il-​ħruxija li biha ġew persegwitati x-​Xhieda taʼ Jehovah. Mijiet kbar minnhom inqatlu fil-​kampijiet tal-​konċentrament tan-​Nazi. Sa llum il-​ġurnata x-​Xhieda taʼ Jehovah għadhom projbiti f’ċerti postijiet, u f’postijiet oħra qed jiġu arrestati, mitfugħin il-​ħabs, torturati, u maqtula. Dan kollu huwa parti mis-​sinjal li ta Ġesù.

Bħalma tbassar f’​Apokalissi 11:18, “il-​ġnus imtlew bil-​korla” kontra x-​Xhieda leali taʼ Jehovah, u dan jindika li Jehovah se jesprimi l-​“korla” tiegħu kontra dawn il-​ġnus. Dan l-​istess vers mill-​Iskrittura jgħid li Alla se ‘jeqred lil dawk li qegħdin jeqirdu d-​dinja.’ Qatt qabel fl-​istorja kollha tal-​bniedem ma kien hawn żmien meta l-​art sabitha diffiċli biex issostni l-​ħajja taʼ fuqha. Madankollu, l-​affarijiet inbidlu issa! Ħafna xjenzati wissew li jekk il-​bnedmin se jkomplu jniġġsu l-​art, din mhix se tibqaʼ tajba biex ngħixu fuqha. Imma Jehovah “sawwarha biex jgħammru fiha,” u hu se jwarrab min-​nofs lil dawk li qed iniġġsuha qabel ma jirnexxilhom jeqirduha għalkollox.—Isaija 45:18.

Barkiet fuq l-​Art taħt is-​Saltna

Ħafna nies li jemmnu fil-​Bibbja jaħsbu li dawk kollha li se jsalvaw sejrin fis-​sema. Għalhekk għandhom mnejn jarawha stramba l-​idea li n-​nies jgħixu fuq l-​art bħala sudditi tas-​Saltna t’Alla. Il-​Bibbja turi li għadd limitat biss taʼ bnedmin sejjer fis-​sema u li dawk li se jgħixu għal dejjem fuq l-​art se jagħmlu parti minn kotra kbira bla għadd. (Salm 37:11, 29; Apokalissi 7:9; 14:1-5) Fil-​ktieb Bibliku taʼ Danjel insibu profezija li turi li s-​Saltna t’Alla f’idejn Kristu se timla l-​art u tmexxiha.

Hemmhekk, is-​Saltna taʼ Kristu hija rappreżentata minn ġebla li tinqataʼ minn muntanja li tirrappreżenta s-​sovranità taʼ Jehovah. Din il-​ġebla tolqot u teqred statwa li tirrappreżenta lill-​ġnus qawwija taʼ l-​art, u “l-​ġebla li laqtet l-​istatwa saret muntanja kbira li mliet l-​art kollha.” Il-​profezija tkompli: “Fi żmien dawn is-​slaten, Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.”—Danjel 2:34, 35, 44.

Ix-Xhieda taʼ Jehovah dwar dan jixtiequ jgħidulek—dwar din is-​Saltna u dwar it-​tama li toffri l-​Bibbja li għad ngħixu għal dejjem fuq art imnaddfa u msebbħa. Miljuni taʼ nies li issa huma ħajjin u ħafna, ħafna miljuni oħra li jinsabu fl-​oqbra se jkollhom l-​opportunità li jgħixu fuqha għal dejjem. Imbagħad, taħt ir-​Renju t’Elf Sena taʼ Kristu Ġesù, se jitwettaq l-​iskop oriġinali li kellu Jehovah meta ħalaq l-​art u poġġa fiha lill-​ewwel koppja umana. Il-​bnedmin m’huma qatt se jiddejqu jgħixu f’din il-​Ġenna taʼ l-​art. Sewwa sew bħalma Adam ngħata x’jagħmel fil-​ġnien taʼ Għeden, hekk ukoll il-​bnedmin se jkollhom proġetti eċċitanti u taʼ sfida huma u jieħdu ħsieb l-​art, il-​pjanti, u l-​annimali taʼ ġo fiha. Huma se “jgawdu għal żmien twil xogħol idejhom.”—Isaija 65:22, KŻ; Ġenesi 2:15.

Hemm ħafna versi fl-​Iskrittura li juru l-​kundizzjonijiet li se jeżistu meta se titwettaq it-​talba li Ġesù għallimna nitolbu: “Tiġi saltnatek, ikun li trid int, kif fis-​sema, hekkda fl-​art.” (Mattew 6:10) Madankollu, għalissa se nikkwotaw din: “Smajt leħen qawwi ġej mit-​tron jgħid: ‘Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.’ Mbagħad dak li hu bilqiegħda fuq it-​tron qal: ‘Ara, se nġedded kollox.’ Qalli: ‘Ikteb, għax dawn il-​kelmiet huma minnhom u taʼ min joqgħod fuqhom.’”—Apokalissi 21:3-5.

[Kumment f’paġna 15]

“Żmien iebes,”

IMMA “mbagħad jiġi t-​tmiem”

[Stampa f’paġna 18]

L-​Olanda

[Stampa f’paġna 18]

In-​Niġerja