Erbaʼ Mistoqsijiet Dwar it-​Tmiem Imweġbin

ĠESÙ KRISTU bassar li fi żmien fil-​futur kellu “jiġi t-​tmiem.” Meta ddeskriva dan iż-​żmien, hu qal: “Imbagħad ikun hemm tribulazzjoni kbira li qatt ma kien hawn bħalha mill-​bidu tad-​dinja s’issa, le, lanqas jerġaʼ jkun hawn.”—Mattew 24:14, 21.

L-​istqarrijiet taʼ Ġesù dwar it-​tmiem, flimkien maʼ siltiet Bibliċi oħrajn dwar dan is-​suġġett, iqajmu għadd taʼ mistoqsijiet importanti. Għala ma tiftaħx il-​Bibbja tiegħek u taqra x’tgħid bħala tweġiba għal dawn il-​mistoqsijiet?

1 X’Se Jintemm?

Il-​Bibbja ma tgħallimx li l-​art letterali se tinqered. Is-​salmista kiteb: “[Alla sejjes] l-​art fuq il-​postijiet stabbiliti tagħha; din qatt u qatt ma se titħarrek.” (Salm 104:5) Il-​Bibbja lanqas ma tgħallem li l-​ħajja kollha se tinqered billi d-​dinja tinħaraq għalkollox. (Isaija 45:18) Ġesù nnifsu indika li xi nies se jsalvaw fit-​tmiem. (Mattew 24:21, 22) Imma, allura, il-​Bibbja x’tgħid li se jintemm?

Il-​ħakma umana li qed tfalli se tintemm. Alla ispira lill-​profeta Danjel biex jikteb: “L-​Alla tas-​sema jwaqqaf saltna li qatt ma tinqered. U din is-​saltna ma tgħaddix għal għand poplu ieħor. Hi se tfarrak u ttemm dawn is-​saltniet kollha, u hi tibqaʼ wieqfa għal dejjem.”—Danjel 2:44.

Il-​gwerer u t-​tinġis se jintemmu. Meta jiddeskrivi x’se jagħmel Alla, Salm 46:9 jgħid: “Qed iwaqqaf il-​gwerer sa tarf l-​art. Il-​qaws jaqsmu fi tnejn u l-​lanza jkissirha biċċiet; il-​karrijiet jaħraqhom fin-​nar.” Il-​Bibbja tgħallem ukoll li Alla se ‘jeqred lil dawk li qed jeqirdu l-​art.’—Rivelazzjoni 11:18.

Il-​kriminalità u l-​inġustizzja se jintemmu. Il-​Kelma t’Alla twiegħed: “Huma r-​retti li se jgħammru fuq l-​art, u dawk bla ħtija se jibqgħu fiha. Rigward in-​nies mill-​agħar, dawn se jitqaċċtu mill-​art; u t-​tradituri jinqalgħu minnha.”—Proverbji 2:21, 22.

2 Meta Se Jiġi t-​Tmiem?

Alla Ġeħova għandu “żmien stabbilit” biex itemm il-​ħażen u biex il-​gvern tas-​Saltna tiegħu jibda jaħkem. (Marku 13:33) Imma l-​Bibbja tindika b’mod ċar li ma nistgħux nikkalkulaw id-​data speċifika tat-​tmiem. Ġesù qal: “Dak il-​jum u s-​siegħa ma jafhom ħadd, la l-​anġli tas-​smewwiet u lanqas l-​Iben, ħlief il-​Missier.” (Mattew 24:36) Madankollu, Ġesù u d-​dixxipli tiegħu bassru kif kellhom ikunu l-​kundizzjonijiet fuq l-​art eżatt qabel ma Alla jġib it-​tmiem. It-​tmiem ikun wasal meta l-​ġrajjiet li ġejjin kollha kemm huma jkunu qed iseħħu fl-​istess waqt madwar id-​dinja kollha.

It-​taqlib politiku, ambjentali, u soċjali qed iseħħ fuq skala li qatt ma kien hawn bħalha. Biex iwieġeb il-​mistoqsija tad-​dixxipli dwar it-​tmiem, Ġesù qal: “Ġens iqum kontra ġens u saltna kontra saltna, ikun hemm terremoti f’post wara l-​ieħor, ikun hemm nuqqas taʼ ikel. Dan hu l-​bidu taʼ l-​uġigħ, bħall-​uġigħ tal-​ħlas.” (Marku 13:8) L-​appostlu Pawlu kiteb: “Fl-​aħħar jiem ikun hawn żminijiet kritiċi li diffiċli biex issib tarfhom. Għax in-​nies ikunu jħobbu lilhom infushom, iħobbu l-​flus, minfuħin bihom infushom, suppervi, midgħija, diżubbidjenti lejn il-​ġenituri, ingrati, żleali, mingħajr imħabba naturali, ma jkunux iridu jiftiehmu, kalunnjaturi, mingħajr rażna, feroċi, mingħajr imħabba għat-​tajjeb, tradituri, rashom iebsa, imkabbrin, iħobbu l-​pjaċiri minflok ma jħobbu lil Alla.”—2 Timotju 3:1-​5.

Qed isseħħ kampanja taʼ ppritkar madwar id-​dinja b’ħafna lingwi. Ġesù qal: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mattew 24:14.

3 X’Se Jseħħ Wara t-​Tmiem?

Il-​Bibbja ma tgħallimx li n-​nies tajbin kollha se jittieħdu mill-​art biex jgħixu għal dejjem fis-​sema. Minflok, Ġesù għallem li l-​iskop oriġinali t’Alla għall-​bnedmin se jitwettaq. Ġesù qal: “Henjin il-​ġwejdin, għax għad jirtu l-​art.” (Mattew 5:5; 6:9, 10) Għal dawk li jilħqu jmutu qabel ma jiġi t-​tmiem, il-​Bibbja fiha l-​wegħda taʼ rxoxt fil-​futur. (Ġob 14:14, 15; Ġwanni 5:28, 29) X’se jseħħ wara t-​tmiem?

Ġesù se jaħkem mis-​sema bħala Sultan tas-​Saltna t’Alla. Il-​profeta Danjel kiteb: “Bqajt inħares fil-​viżjonijiet tal-​lejl, u, ara, mas-​sħab tas-​smewwiet kien ġej xi ħadd bħal bin il-​bniedem [Ġesù rxoxtat]; u dan ngħata l-​permess li jidħol quddiem ix-​Xiħ fil-​Jiem [Alla Ġeħova], u ressquh qrib dan il-​Wieħed. U lilu [lil Ġesù] ngħataw ħakma, dinjità, u saltna, sabiex il-​popli, il-​ġnus, u l-​lingwi jaqdu kollha lilu. Il-​ħakma tiegħu hi ħakma li tibqaʼ għal dejjem u li ma tgħaddix, u saltnatu, waħda li ma tinqeridx.”—Danjel 7:13, 14; Luqa 1:31, 32; Ġwanni 3:13-​16.

Is-​sudditi tas-​Saltna t’Alla se jgawdu saħħa perfetta, sigurtà dejjiema, u ħajja eterna. Il-​profeta Iżaija kiteb: “Se jibnu djar u jgħammru fihom; u jħawlu għelieqi bid-​dwieli u jieklu frotthom. Ma jibnux u jgħammar ħaddieħor; ma jħawlux u jiekol ħaddieħor.” (Isaija 65:21-​23) L-​appostlu Ġwanni kiteb dwar dan iż-​żmien: “Ara! It-​tinda t’Alla hi mal-​bnedmin, u hu jgħammar magħhom, u huma jkunu l-​popli tiegħu. U Alla stess ikun magħhom. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.”—Rivelazzjoni 21:3, 4.

4 X’Għandek Tagħmel Biex Issalva fit-​Tmiem?

L-​appostlu Pietru għaraf li xi wħud minn dawk li kienu se jgħixu fiż-​żmien tat-​tmiem kienu se jirridikolaw il-​ħsieb li Alla xi darba se jintervieni fl-​affarijiet tal-​bnedmin u jtemm il-​ħażen minn fuq l-​art. (2 Pietru 3:3, 4) Xorta waħda, Pietru jħeġġeġ lil dawk li jgħixu fi żmienna biex jaġixxu skont dan li ġej.

Tgħallem mill-​passat. Pietru kiteb li Alla “ma żammx lura milli jikkastiga dinja tal-​qedem, imma lil Noè, predikatur tal-​ġustizzja, żammu qawwi u sħiħ maʼ sebgħa oħrajn meta ġab dilluvju fuq dinja taʼ nies bla devozzjoni lejn Alla.” (2 Pietru 2:5) Dwar dawk li jirridikolaw, Pietru qal: “Skond ix-​xewqa tagħhom, huma jagħlqu għajnejhom għal dan il-​fatt, li kien hemm smewwiet mill-​qedem u art solida żżomm f’wiċċ l-​ilma u f’nofs l-​ilma bil-​kelma t’Alla; u permezz taʼ dawn, id-​dinja taʼ dak iż-​żmien inqerdet meta ġiet mgħarrqa bl-​ilma. Imma bl-​istess kelma, is-​smewwiet u l-​arta t’issa huma merfugħin għan-​nar u qed jinżammu għal jum il-​ġudizzju u l-​qerda taʼ nies bla devozzjoni lejn Alla.”—2 Pietru 3:5-​7.

Għix skont il-​livelli morali t’Alla. Dawk li jixtiequ jsalvaw fit-​tmiem se jagħmlu “atti taʼ kondotta qaddisa u għemejjel taʼ devozzjoni lejn Alla,” kif kiteb Pietru. (2 Pietru 3:11) Innota li Pietru jenfasizza l-​“atti taʼ kondotta qaddisa” u l-​“għemejjel taʼ devozzjoni lejn Alla.” Għalhekk, hemm iktar involut milli sempliċement ngħidu li nemmnu jew li nagħmlu sforz fl-​aħħar minuta biex ikollna relazzjoni m’Alla.

Liema atti u għemejjel speċifiċi huma aċċettabbli għal Alla? Għala ma tqabbilx dak li taf maʼ dak li tgħallem il-​Bibbja dwar dan is-​suġġett? Ix-​Xhieda taʼ Ġeħova se jieħdu gost jgħinuk. Staqsihom juruk mill-​Bibbja tiegħek il-​bażi għat-​tweġibiet tagħhom. Jekk tagħmel dan tistaʼ tassew tiġi megħjun tiffaċċja l-​futur bil-​kuraġġ u l-​fiduċja, minkejja l-​affarijiet taʼ madwarna li jikkaġunaw il-​biżaʼ.

[Nota taʼ taħt]

[Kumment f’paġna 7]

L-​art mhijiex se tintemm, imma dawk li qed jeqirduha iva