Il-​Ħarsa tal-​Bibbja

Iż-​Żodjaku Għandu Jinfluwenzalek Ħajtek?

“M’AĦNIEX NEQSIN MINN ŻGĦAŻAGĦ U ADULTI LI JFITTXU FL-​ISTILEL GĦAL SINJALI DWAR ID-​DESTIN TAGĦHOM.”—PAPA ĠWANNI PAWLU II.

SKOND stħarriġ li sar, persuna Amerikana minn kull erbgħa tuża l-​astroloġija meta tieħu xi deċiżjonijiet. M’humiex biss in-​nies li jgħixu f’din il-​parti tad-​dinja li jikkonsultaw is-​sinjali taʼ l-​astroloġija. Tistaʼ tgħid li mad-​dinja kollha, iż-​żodjaku jiġi konsultat għal pariri fuq kwistjonijiet finanzjarji, pjanijiet għal vjaġġi, bidliet fil-​karriera, dati tat-​tieġ, u strateġiji militari. Jintqal li permezz tas-​sinjal żodjakali, in-​nies jistgħu jidentifikaw is-​sieħeb jew sieħba prospettivi tagħhom u saħansitra jsiru jafu liema persuni ma jkunux jaqblu għal magħhom. L-​astroloġija rnexxielha ssaħħar miljuni taʼ nies għal warajha minn kull rokna tad-​dinja. Imma minfejn oriġina ż-​żodjaku?

Fatti Storiċi

Sa mill-​eqdem ċivilizzazzjonijiet magħrufa, instabu traċċi taʼ forom differenti taż-​żodjaku. Anki l-​Bibbja ssemmi l-​“kostellazzjonijiet tal-​kwiekeb.” (2 Slaten 23:5) L-​evidenza turi li fiż-​żminijiet tal-​qedem iż-​żodjaku kien jiġi konsultat mill-​Ħindu, kif ukoll miċ-​Ċiniżi, mill-​Eġizzjani, mill-​Griegi u minn nies oħra. Madankollu, l-​iktar referenzi bikrin għas-​sinjali taż-​żodjaku nstabu f’Babilonja tal-​qedem.

Il-Babiloniżi żviluppaw l-​astroloġija biex jipprovaw jiksbu tagħrif dwar il-​futur. Huma nnotaw iċ-​ċaqliq li kien isir fis-​sema u fasslu mapep u tabelli elaborati. Minn dawn kienu jiġu mbassra kwistjonijiet tan-​nies u ġrajjiet li kellhom x’jaqsmu maʼ l-​art. F’ħafna każi, lanqas deċiżjonijiet politiċi jew militari ma kienu jittieħdu qabel ma kienu jissejħu l-​astroloġi biex jagħtu l-​parir tagħhom. Għaldaqstant ġiet ifformata klassi taʼ qassisin li sostnew li kellhom għerf speċjali u qawwiet soprannaturali, u dawn saru influwenti ħafna fuq in-​nies. Fil-​fatt, kull tempju importanti f’Babilonja kien mgħammar b’osservatorju ċelestjali.

Fi żmienna, is-​sinjali taż-​żodjaku għadhom jilagħbu parti importanti fil-​ħajja taʼ ħafna nies. Għalkemm hemm xi wħud li jsostnu li ma jemmnux fl-​oroskopju, dawn xi kultant xorta jħobbu jaqraw l-​istilel sempliċement għall-​kurżità jew biex jgħaddu ż-​żmien. Huwa minnu li xi astroloġi bassru ċerti affarijiet li mbagħad ġraw veru. Imma jfisser dan li huwa taʼ benefiċċju li wieħed jikkonsulta l-​istilel? Meta toqgħod taħseb, il-​qaddejja t’Alla fl-​antik kif kienu jqisuh l-​interess fl-​astroloġija?

Perikli Moħbija

Kuntrarju għall-​Babiloniżi, il-​Lhud leali ma kinux jipprattikawha l-​astroloġija—u bir-​raġun. Alla kien wissiehom ċar u tond: “Ma għandu jkun hemm ħadd f’nofsok . . . min jeħber, min jitkixxef il-​ġejjieni, min jagħmel il-​magħmul u s-​sħarijiet, min isejjaħ l-​erwieħ, min jobsor u jistħarreġ il-​mejtin. Għax mistkerrah quddiem il-​Mulej kull min jagħmel dawn il-​ħwejjeġ.”a—Dewteronomju 18:10-12.

Il-​qaddejja t’Alla ħadu waqfa soda kontra l-​astroloġija. Per eżempju, is-​Sultan leali Ġosija “neħħa . . . lil dawk li kienu jaħarqu l-​inċens lil Bagħal, lix-​xemx, lill-​qamar u lill-​kostellazzjonijiet tal-​kwiekeb.” Dak li għamel Ġosija ntqal li kien “sewwa f’għajnejn il-​Mulej,” u Alla bierku taʼ dan. (2 Slaten 22:2; 23:5) Imma jistaʼ jkun hemm min jistaqsi, ‘M’huwiex minnu li xi affarijiet li jbassru l-​astroloġi jseħħu verament?’

Taʼ interess, fl-​Iskrittura Griega Kristjana naqraw dwar tfajla li “kienet iġġib ħafna flus lis-​sidien tagħha bit-​teħbir li kienet tagħmel.” Mid-​dehra, xi affarijiet milli kienet bassret din it-​tfajla kienu seħħew, ladarba s-​sidien tagħha kienu għamlu l-​qligħ mill-​qawwiet li kellha. Imma din it-​tfajla kif kien qed jirnexxilha tbassar ġrajjiet futuri? Il-​Bibbja tgħid li hi kienet taħt l-​influwenza taʼ “spirtu biex taqra x-​xorti.”—Atti 16:16.

Il-Bibbja turi li “d-​dinja kollha qiegħda taħt idejn il-​Ħażin,” Satana x-​Xitan. (1  Ġwann 5:19) Satana u d-​demonji tiegħu rnexxielhom isaħħru miljuni taʼ nies għal warajhom billi jdawru xi ġrajjiet kif jaqblilhom sabiex iseħħ ċertu tbassir.

Il-pura verità hija li l-​astroloġija hija waħda mit-​“tnassis tax-​Xitan,” li hu juża biex jikkontrolla u jinfluwenza lin-​nies ħalli jwettqu l-​iskop tiegħu. B’hekk, mhux taʼ b’xejn li l-​Bibbja tħeġġeġ lill-​Kristjani biex ‘jieqfu’ lit-​tattiċi makakki taʼ Satana, inkluż l-​astroloġija. (Efesin 6:11) Imma jfisser b’daqshekk li m’għandna l-​ebda gwida rigward il-​futur?

Il-​Bibbja—Gwida taʼ Min Jafdaha

Miljuni taʼ nies sabu li l-​gwida li tagħti l-​Bibbja jistgħu jafdawha meta jiġu biex jieħdu xi deċiżjonijiet. Bħalma poġġieha s-​salmista David, “ix-​xhieda tal-​Mulej hi sewwa [“taʼ min jafdaha,” NW], u tgħallem lil min ma jafx.” (Salm 19:8 [19:7, NW]; 119:105) Dan ma jfissirx li l-​Bibbja tgħidlek eżatt kelma b’kelma x’għandek tagħmel f’kull sitwazzjoni li tistaʼ tiltaqaʼ magħha. Imma fil-​Kelma t’Alla nsibu prinċipji li jistgħu jgħinuna nħarrġu s-​sens biex nagħżlu. B’hekk inkunu nistgħu nagħżlu bejn it-​tajjeb u l-​ħażin u nkunu kapaċi nieħdu deċiżjonijiet għaqlin.—Lhud 5:14.

Għaldaqstant, il-​Kristjani ġenwini għandhom raġun li ma jikkonsultawx l-​oroskopju, anki sempliċement għall-​kurżità jew biex jgħaddu ż-​żmien. Minflok, huma jużaw l-​għaqal billi jagħtu kas it-​twissijiet li hemm fil-​Kelma t’Alla kontra kull influwenza demonika, inkluż modi sottili. Jekk tħalli l-​Bibbja tinfluwenzalek ħajtek minflok iż-​żodjaku, int tistaʼ tgawdi l-​barka t’Alla għall-​eternità.—Salm 37:29, 38.

[Nota taʼ taħt]

[Stampa f’paġna 26]

Iż-​żodjaku tal-​lvant

[Stampa f’paġna 26]

Iż-​żodjaku tal-​punent