Il-​Misteru taʼ l-​Għasafar tal-​Bejt fil-​Britannja

MINN KITTIEB TAʼ STENBAĦ! FIL-​BRITANNJA

L-​GĦASFUR tal-​bejt, li jinsab kullimkien u li għandu tpespisa u tisfira li semagħha kulħadd, għal żmien twil kien għasfur komuni ħafna fil-​Britannja. Imma issa qiegħed jisparixxi—taʼ spiss f’daqqa—mill-​bliet, u ħadd ma jaf x’inhi r-​raġuni. Il-​gazzetta Independent taʼ Londra offriet premju taʼ 5,000 lira sterlina [Lm3,300] lil min jirnexxilu jippubblika stqarrija xjentifika li tipprovdi soluzzjoni għal dan il-​misteru. Is-​Soċjetà Rjali għall-​Protezzjoni taʼ l-​Għasafar u l-​Għaqda Britannika taʼ l-​Ornitoloġija se jiddeċiedu min se jkun ir-​rebbieħ. Huwa mistenni li l-​proġett se jieħu minn taʼ l-​inqas sentejn biex jitlesta.

L-istudju wera li f’xi bliet kbar u żgħar fil-​Britannja, l-​għadd t’għasafar tal-​bejt naqas b’mod drastiku. F’xi nħawi dawn għebu għalkollox. Madankollu, l-​għasafar tal-​bejt għadhom jeżistu bil-​gzuz fi bliet Ewropej oħra, bħal Pariġi u Madrid. Dr. Denis Summers-Smith, espert dinji fuq l-​għasfur tal-​bejt, jgħid: ‘Dan huwa wieħed mill-​iktar misteri notevoli fin-​natura f’dawn l-​aħħar 50 sena.’

L-għasafar tal-​bejt naqsu b’65 fil-​mija fl-​inħawi rurali. Huwa mifhum li x’aktarx dan ġara minħabba li fil-​biedja jintużaw metodi biex tiżdied il-​produzzjoni. Speċi oħra t’għasafar ukoll naqsu ħafna fl-​inħawi rurali. Imma dan il-​fatt ma jispjegax għala l-​għasafar tal-​bejt naqsu bi 92 fil-​mija fil-​bliet. L-​ambjentalista Michael McCarthy jasal għall-​konklużjoni li l-​fatt li l-​għasafar tal-​bejt għebu b’mod drammatiku “huwa indikazzjoni ċerta li xi ħaġa marret żmerċ ħafna fl-​ekosistema taʼ l-​għasfur tal-​bejt—u forsi f’tagħna wkoll.” Nittamaw li xi darba nsiru nafu eżatt x’mar żmerċ u kemm hija gravi s-​sitwazzjoni.