Xita Radjoattiva Kwistjoni li Tinkwieta lil Ħafna

WARA li saru xi testijiet t’armi nukleari fis-​snin 50, fis-​snien tal-​ħalib tat-​tfal instab l-​istronzju 90 (Sr90), element li jirriżulta minn reazzjonijiet nukleari, tirrapporta l-​gazzetta Globe and Mail tal-​Kanada. F’dak iż-​żmien, dan kien jingħata t-​tort għaż-​żjieda f’daqqa taʼ kanċer fost it-​tfal.

Issa, bosta snin wara, ix-​xjenzati mseħbin mal-​Proġett tar-​Radjazzjoni u s-​Saħħa Pubblika fl-​Istati Uniti jinsabu inkwetati għal darb’oħra. Dr. Janet Sherman, speċjalista fil-​mediċina interna li qed taħdem mal-​proġett, tispjega li l-​livelli taʼ Sr90 fis-​snien tal-​ħalib taʼ tfal li twieldu mill-​1990 ’l hawn qed jilħqu dawk li eżistew matul is-​snin meta t-​testijiet taʼ l-​armi nukleari ma kinux isiru taħt l-​art.

Minfejn ġej l-​Sr90? Fost is-​sorsi possibbli li xi xjenzati jsemmu hemm l-​inċidenti nukleari tal-​passat, ir-​radjazzjoni minn impjanti nukleari li jkunu jaħdmu sew, jew l-​ittestjar taʼ bombi li kien isir ħafna snin ilu.a Ġej minfejn ġej, il-​bnedmin jieħdu l-​Sr90 billi jieklu ikel minn pjanti kontaminati u jixorbu ħalib minn baqar li jkunu kielu ħaxix imniġġes. Peress li l-​Sr90 huwa simili għall-​kalċju b’mod kimiku, il-​bnedmin jaħżnu l-​materjal radjoattiv f’għadamhom, u jżidu r-​riskju tal-​kanċer fl-​għadam u tal-​lewkimja.

Il-​gazzetta Globe tesprimi wkoll it-​tħassib dwar li ġenerazzjonijiet fil-​futur jistgħu jintlaqtu mir-​radjazzjoni. Il-​gazzetta tispjega li meta l-​iskart nukleari jitneħħa mill-​parti ċentrali taʼ reattur nukleari, dan ikun madwar miljun darba iktar radjoattiv minn meta tqiegħed fiha. Huwa maħsub li gozz fuel użat li jkun għadu kemm tneħħa minn din il-​parti ċentrali huwa tant qattiel li individwu li jkun wieqaf metru biss ’il bogħod minnu jmut b’avvelenar tar-​radjazzjoni fi żmien siegħa, tkompli tgħid il-​gazzetta.

Billi l-​bniedem huwa mhedded b’xita radjoattiva, huwa realistiku li nittamaw f’futur fiż-​żgur? Meta fil-​bidu nħalqu l-​art u l-​affarijiet ħajjin fiha, il-​Bibbja tgħidilna li kollox kien “tajjeb ħafna.” (Ġenesi 1:31) Nistgħu nkunu fiduċjużi fil-​wegħda tal-​Bibbja li dalwaqt il-​pjaneta tagħna se ssir ġenna. L-​ikel u l-​ilma mniġġsin minħabba r-​radjazzjoni se jkunu memorja tal-​passat.—Salm 65:​10-14 [65:​9-13, NW]; Apokalissi 21:​1-4.

[Nota taʼ taħt]

[Sors taʼ l-​Istampa f’paġna 31]

Ritratt: U. S. Department of Energy photograph