“Huma Jibdlu x-​Xwabel Tagħhom f’Sikek tal-​Moħriet”—Meta?

ĦDEJN il-​bini tal-​Ġnus Magħquda fil-​Belt taʼ New York hemm statwa famuża taʼ wieħed raġel li qiegħed jibdel xabla f’sikka tal-​moħriet. Din ix-​xbieha hija bbażata fuq il-​profeziji tal-​Bibbja taʼ Isaija kapitlu 2, vers 4, u Mikea kapitlu 4, vers 3. Kif u meta se jitwettaq dan il-​kliem?

Rapport li deher dan l-​aħħar f’The New York Times kellu t-​titlu “Il-​Bejgħ Globali taʼ l-​Armi Jitlaʼ għal $30 Elf Miljun [Lm14-il elf miljun]”! Fl-​1999, min kienu l-​pajjiżi prinċipali li kienu jipprovdu din il-​varjetà kbira t’armi? Fl-​ewwel post, kien hemm l-​Istati Uniti b’bejgħ taʼ Lm6 elef miljun. Fit-​tieni post, kien hemm ir-​Russja b’inqas minn nofs dak l-​ammont. Madankollu, ir-​Russja kważi biegħet id-​doppju tas-​sena taʼ qabel. Imbagħad kien hemm il-​Ġermanja, iċ-​Ċina, Franza, il-​Britannja, u l-​Italja. L-​istess rapport kompla jgħid: “Bħal fil-​passat, bejn wieħed u ieħor żewġ terzi taʼ l-​armi kollha nbigħu lil nazzjonijiet li qed jiżviluppaw.”

Matul is-​seklu 20 kien hawn żewġ gwerer dinjin u ħafna gwerer kbar oħra. Dawn ħallew mijiet taʼ miljuni taʼ nies mejta u feruti. Għaldaqstant, dak li jkun jasal biex jistaqsi, “Il-​ġnus meta se jitgħallmu l-​paċi minflok il-​gwerra?” Il-​Bibbja tindika li l-​ġnus se jduru għall-​paċi “fl-​aħħar jiem.” (Isaija 2:2) Fil-​fatt, din il-​profezija diġà qed titwettaq, għaliex kważi sitt miljun Xhud taʼ Jehovah ħallew lilhom infushom “jitgħallmu mingħand il-​Mulej.” Bħala riżultat, ‘kbir huwa s-​sliem tagħhom.’—Isaija 54:​13, Saydon.

Dalwaqt Jehovah se jġib fi tmiem l-​armi u l-​gwerer kollha u dawk li huma favurihom, għax hu ‘se jeqred lil dawk li qegħdin jeqirdu d-​dinja.’ Jekk tixtieq tkun taf iktar dwar din il-​bidla meraviljuża, jekk jogħġbok iżżommx lura milli tikkuntattja lix-​Xhieda taʼ Jehovah fejn toqgħod jew ikteb fl-​indirizz addattat imniżżel f’paġna 5.—Apokalissi 11:18.